ហ្វីលីពីន​មិន​ប្រាកដ​ថា​ចង់​ទិញ​យន្តហោះ F-16 ទេ ទោះ​អាមេរិក​បើក​ភ្លើង​បៃតង​​ក៏​ដោយ

រដ្ឋមន្ត្រីការពារជាតិហ្វីលីពីន លោក Gilberto Teodoro បាននិយាយថា ប្រទេស​របស់​លោក​មិនប្រាកដថាចង់ទិញយន្តហោះចម្បាំង F-16 ទេ បើទោះបីជាទីក្រុងវ៉ាស៊ីនតោនបានយល់ព្រមលក់យន្តហោះរហូតដល់ ២០​គ្រឿងទៅ​ឲ្យ​ទីក្រុងម៉ានីលក៏ដោយ។

លោក Teodoro កាល​ពី​ថ្ងៃ​ទី​២ ខែមិថុនា បានរៀបរាប់​ថា ហ្វីលីពីន​មិនបានទទួលសំណើផ្លូវការពី​អាមេរិកលើកិច្ចសន្យាទិញយន្តហោះចម្បាំង F-16 ឡើយ។ លោក​ក៏​បាន​បន្ថែម​ដែរ​ថា ប្រព័ន្ធ​ផ្សព្វផ្សាយ​បាន​និយាយ​បំផ្លើស​ពី​លទ្ធភាព​ដែល​ហ្វីលីពីន​បញ្ជា​ទិញ​យន្តហោះ​ចម្បាំង​ប្រភេទ​នេះ។

លោកបាននិយាយនៅក្រៅកិច្ច​ប្រជុំ​សន្តិសុខ Shangri-La ក្នុងប្រទេសសិង្ហបុរីថា «ទោះបីជាយើងទទួលបានសំណើក៏ដោយ ក្រសួងការពារជាតិហ្វីលីពីនមិនទាន់ដឹងថាតើយើងចង់ទិញយន្តហោះទាំងនោះឬអត់។ យើងមិនទាន់សម្រេចចិត្តអំពីពេលវេលា និងប្រភេទយន្តហោះចម្បាំងពហុតួនាទីដែលត្រូវទិញនោះទេ»។

ទីភ្នាក់ងារសហប្រតិបត្តិការសន្តិសុខការពារជាតិរបស់មន្ទីរបញ្ចកោណ (DSCA) បានប្រកាសកាលពីថ្ងៃទី​១​ ខែមេសាថា ក្រសួងការបរទេស​អាមេរិកបានអនុម័តកិច្ចសន្យាដ៏មានសក្តានុពលដែលមានតម្លៃ ៥,៦​ពាន់លានដុល្លារ ដើម្បីផ្តល់​ឲ្យ​ហ្វីលីពីននូវយន្តហោះចម្បាំង F-16C Block 70/72 ចំនួន ១៦​គ្រឿង និង​យន្តហោះចម្បាំង F-16D Block 70/72 ចំនួន ៤​គ្រឿង ព្រម​ទាំង​ឧបករណ៍ពាក់ព័ន្ធមួយចំនួនទៀត។

ការ​ប្រកាស​នេះ​​មិន​មាន​ន័យ​ថា ​កិច្ច​សន្យា​ត្រូវ​បាន​ចុះ​ហត្ថលេខា​ឬ​ថា​ភាគី​ទាំង​ពីរ​បាន​បញ្ចប់​ការ​ចរចា​លើ​លក្ខខណ្ឌ​នៃ​កិច្ច​ព្រម​ព្រៀង​នោះ​ទេ។ ក្រសួងការបរទេស​អាមេរិកជារឿយៗអនុម័តលើការនាំចេញសព្វាវុធ មុនពេលដំណើរការចរចាបានបញ្ចប់ ហើយនេះមិនមែនជាសញ្ញាបង្ហាញថា អតិថិជនរបស់ទីក្រុងវ៉ាស៊ីនតោននឹងទិញឧបករណ៍ទាំងអស់ក្នុងតម្លៃដែលប្រកាសដោយ DSCA ដែរ។

សម្រាប់មន្ត្រីហ្វីលីពីនមួយចំនួន កិច្ចព្រមព្រៀង F-16 គឺជាសញ្ញានៃការប្តេជ្ញាចិត្តរយៈពេលវែងរបស់ទីក្រុងវ៉ាស៊ីនតោនចំពោះសម្ព័ន្ធមិត្តរបស់ខ្លួន និងជាទំនុកចិត្តថា ទីក្រុងម៉ានីលមានសមត្ថភាពប្រតិបត្តិការឧបករណ៍ទំនើប។

ទោះជាយ៉ាងណាក៏ដោយ ភ្លាមៗបន្ទាប់ពីការប្រកាសរបស់ DSCA មន្ត្រីហ្វីលីពីនមួយចំនួនបានចោទសួរថាតើប្រទេសនេះនឹងចំណាយប្រាក់យ៉ាងច្រើនបែបនេះដោយរបៀបណា ដោយគ្មានជំនួយពីសហរដ្ឋអាមេរិក។ ទីក្រុងម៉ានីលចំណាយប្រហែល ៦​ពាន់លានដុល្លារ ឬ ១,៣% នៃ GDP របស់ខ្លួនលើវិស័យការពារជាតិជារៀងរាល់ឆ្នាំ នេះបើយោងតាមរបាយការណ៍របស់វិទ្យាស្ថានស្រាវជ្រាវសន្តិភាពអន្តរជាតិ Stockholm (SIPRI)។

ក្រសួងការបរទេស​អាមេរិកក្នុងខែមិថុនា ឆ្នាំ​២០២១ ក៏ធ្លាប់​បានអនុម័តលើកិច្ចសន្យាដែលមានតម្លៃជាង ២,៤​ពាន់លានដុល្លារ ដើម្បីលក់​មីស៊ីល និង​យន្តហោះចម្បាំង F-16 ចំនួន ១២​គ្រឿងទៅ​ឲ្យ​ហ្វីលីពីន​ផង​ដែរ ប៉ុន្តែ​កិច្ចព្រមព្រៀងនេះ​មិន​ទាន់​ត្រូវបានអនុវត្ត​​នៅ​ឡើយ​ទេ៕

ដោយ៖ ឈាង