យោធា​​មីយ៉ាន់ម៉ា រងការចោទថា បាន​​ប្រើ​គ្រាប់​បែក​ចង្កោម​វាយ​ប្រហារ​រដ្ឋការ៉ែន​

សហភាពជាតិការ៉ែន (KNU) ដែល​ជា​​​​​​ក្រុម​តស៊ូ​​ប្រយុទ្ធ​​​ប្រឆាំង​​រដ្ឋ​រដ្ឋាភិបាល​យោធា​មីយ៉ាន់ម៉ា បានចោទប្រកាន់របបយោធារបស់មីយ៉ាន់ម៉ា ថាបានប្រើប្រាស់គ្រាប់បែកចង្កោមដែលត្រូវបានហាមឃាត់នៅក្នុងការវាយប្រហារតាមអាកាស​លើភូមិ Paingyak រដ្ឋ Karen ដោយបានសម្លាប់ជនស៊ីវិល ៤នាក់ ក្នុងនោះមានកុមារតូចៗ ៣នាក់ និងគ្រូបង្រៀនម្នាក់។ នេះបើយោងតាមការចេញផ្សាយរបស់សារព័ត៌មាន The Irrawaddy ​កាលពីថ្ងៃទី១១ខែមិថុនា។​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការវាយប្រហារនេះបានកើតឡើងកាលពីថ្ងៃចន្ទ បើទោះបីជាភូមិនេះនៅឆ្ងាយពីតំបន់ជម្លោះប្រដាប់​អាវុធ​​ដ៏​សកម្មក៏ដោយ។ សាក្សីក្នុងតំបន់ បានបញ្ជាក់ថា យន្តហោះចម្បាំងរបស់របបយោធាមីយ៉ាន់ម៉ា​ បានទម្លាក់គ្រាប់បែកទៅលើសាលារៀនបណ្ដោះ​អាសន្ន​មួយ ដោយបានធ្វើឱ្យមនុស្ស ២២នាក់ផ្សេងទៀតរងរបួស ភាគច្រើនជាកុមារ បំផ្លាញលំនៅឋាន​ និងវត្តអារាមមួយ។ KNU អះអាង​ថា របប​យោធា​កំពុង​កំណត់​គោលដៅ​ដោយ​ចេតនា​លើ​សំណង់​ស៊ីវិល ដូចជា​សាលារៀន មន្ទីរពេទ្យ និង​អគារ​សាសនា។

ឧបទ្ទវហេតុនេះកើតឡើងបន្ទាប់ពីការវាយប្រហារថ្មីៗផ្សេងទៀតរបស់របបនេះ រួមទាំងការទម្លាក់គ្រាប់បែកលើអន្តេវាសិកដ្ឋានសាលារៀង​​ និងការវាយប្រហារតាមអាកាសទៅលើពិធីមង្គលការ ដែលបានបណ្តាលឲ្យមនុស្សរាប់សិបនាក់ស្លាប់និងរងរបួស។ របបយោធាក៏ត្រូវបានចោទប្រកាន់ពីបទប្រើប្រាស់គ្រាប់បែកចង្កោម នៅក្នុងការវាយប្រហារលើកមុន ដែលបានសម្លាប់មនុស្ស ២៤នាក់ ដែលភាគច្រើនជាសិស្សសាលានៅក្នុងតំបន់ Sagaing។

គួរបញ្ជាក់ថា ទោះបីជាមីយ៉ាន់ម៉ាមិនបានចុះហត្ថលេខាលើកិច្ចព្រមព្រៀងសកលដែលហាមប្រាមគ្រាប់បែកចង្កោមក៏ដោយ ក៏ការប្រើប្រាស់អាវុធទាំងនេះលើជនស៊ីវិល និងសាលារៀននៅតែត្រូវបានចាត់ទុកថា ជាឧក្រិដ្ឋកម្មសង្គ្រាមក្រោមច្បាប់អន្តរជាតិ៕

អត្ថបទ៖ ប៊ុន សុភាព