ព័ត៌មានអន្ដរជាតិ

លោក Rubio៖ អ៊ីស្រាអែលវាយអ៊ីរ៉ង់ ជាទង្វើឯកតោភាគី ហើយអាមេរិកមិនជាប់ពាក់ព័ន្ធទេ

បានផុស

២ ម៉ោង មុន

នៅ

ថ្ងៃសុក្រ ១៣ មិថុនា ២០២៥

ដោយ

Chheang

រដ្ឋមន្ត្រីការបរទេសអាមេរិក លោក Marco Rubio បាននិយាយជាផ្លូវការនៅថ្ងៃសុក្រទី១៣ខែមិថុនានេះថា សហរដ្ឋអាមេរិកមិនបានជាប់ពាក់ព័ន្ធនៅក្នុងការវាយប្រហារយោធារបស់អ៊ីស្រាអែលប្រឆាំងនឹងប្រទេសអ៊ីរ៉ង់ឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអត្ថាធិប្បាយរបស់លោក Rubio ធ្វើឡើងចំពេលកំពុងមានការកើនឡើងនៃភាពតានតឹងនៅទូទាំងតំបន់មជ្ឈិមបូព៌ា និងការព្រួយបារម្ភជាសកលដែលថាសង្គ្រាមអាចនឹងផ្ទុះឡើងធំ។ ប្រមុខការទូតកំពូលរបស់អាមេរិក បានពណ៌នាអំពីការវាយប្រហាររបស់អ៊ីស្រាអែលថាជា «សកម្មភាពឯកតោភាគីដែលបានធ្វើឡើងក្នុងការការពារខ្លួន» ហើយបានសង្កត់ធ្ងន់ថា «សហរដ្ឋអាមេរិកមិនជាប់ពាក់ព័ន្ធក្នុងមធ្យោបាយ រូបរាង ឬទម្រង់ណាមួយក្នុងការរៀបចំផែនការ ឬប្រតិបត្តិប្រតិបត្តិការទាំងនោះទេ»។

លោក Rubio បានរៀបរាប់យ៉ាងដូច្នេះថា «យប់នេះអ៊ីស្រាអែលបានចាត់វិធានការឯកតោភាគីប្រឆាំងនឹងអ៊ីរ៉ង់។ យើងមិនពាក់ព័ន្ធនឹងការវាយប្រហារប្រឆាំងនឹងអ៊ីរ៉ង់ទេ ហើយអាទិភាពកំពូលរបស់យើងគឺការពារកងកម្លាំងអាមេរិកនៅក្នុងតំបន់។ អ៊ីស្រាអែលបានណែនាំយើងថា ពួកគេជឿថាសកម្មភាពនេះគឺចាំបាច់សម្រាប់ការការពារខ្លួន។ ប្រធានាធិបតី (ដូណាល់) ត្រាំ និងរដ្ឋបាល បានចាត់វិធានការចាំបាច់ទាំងអស់ ដើម្បីការពារកងកម្លាំងរបស់យើង និងរក្សាទំនាក់ទំនងជិតស្និទ្ធជាមួយដៃគូក្នុងតំបន់របស់យើង។ ខ្ញុំសូមបញ្ជាក់ឲ្យច្បាស់៖ អ៊ីរ៉ង់មិនគួរកំណត់គោលដៅផលប្រយោជន៍ ឬបុគ្គលិករបស់សហរដ្ឋអាមេរិកទេ»។

សូមបញ្ជាក់ថា រដ្ឋមន្ត្រីការពារជាតិអ៊ីស្រាអែល Israel Katz បានបញ្ជាក់ពីការវាយប្រហារប្រទេសអ៊ីរ៉ង់ នៅព្រឹកថ្ងៃសុក្រ ដោយស្នូរផ្ទុះត្រូវបានគេឮនៅក្នុងទីក្រុងតេហេរ៉ង់ ចំណែកអ៊ីស្រាអែល ក៏ប្រកាសដាក់ច្បាប់រដ្ឋក្នុងគ្រាអាសន្នហើយដែរ ព្រោះថាសង្គ្រាមធំអាចនឹងផ្ទុះឡើង។ ការវាយប្រហារនេះកើតឡើងមិនយូរប៉ុន្មានបន្ទាប់ពី សារព័ត៌មានអាមេរិកមួយចំនួនបានចុះផ្សាយដូចៗគ្នាថា ប្រទេសអ៊ីស្រាអែល កំពុងត្រៀមវាយអ៊ីរ៉ង់ ខណៈទីក្រុងវ៉ាស៊ីនតោន ក៏បានជម្លៀសមន្ត្រីទូតរបស់ខ្លួនចេញពីតំបន់ជាច្រើននៅមជ្ឈិមបូព៌ារួចហើយដែរ៕

ដោយ៖ ឈាង

ចុចអាន៖ Breaking News! អ៊ីស្រាអែល វាយប្រហារអ៊ីរ៉ង់ហើយ! សង្គ្រាមធំអាចផ្ទុះឡើង