ព័ត៌មានអន្ដរជាតិ

SIPRI៖ ចិនសម្ងំផលិតក្បាលគ្រាប់នុយក្លេអ៊ែរថ្មីបាន១០០គ្រាប់កាលពីឆ្នាំ២០២៤

បានផុស

១ year មុន

នៅ

ថ្ងៃចន្ទ ១៦ មិថុនា ២០២៥

ដោយ

Chheang

វិទ្យាស្ថានស្រាវជ្រាវសន្តិភាពអន្តរជាតិ Stockholm (SIPRI) បានរាយការណ៍នៅថ្ងៃចន្ទទី១៦ខែមិថុនាឆ្នាំ២០២៥នេះថា ប្រទេសចិនទំនងជាបង្កើនក្បាលគ្រាប់អាវុធនុយក្លេអ៊ែររបស់ខ្លួនបាន១០០គ្រាប់ថ្មីបន្ថែមទៀតនៅឆ្នាំ២០២៤ ដែលនាំឲ្យចំនួនក្បាលគ្រាប់នុយក្លេអ៊ែរសរុបឡើងដល់ប្រមាណ ៦០០គ្រាប់។

យានជំនិះយោធាចិនដែលផ្ទុកមីស៊ីលអន្តរទ្វីប DF-5B អំឡុងព្យុហយាត្រាយោធាឆ្នាំ២០១៩ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

SIPRI បានចង្អុលបង្ហាញថា រដ្ឋាភិបាលទីក្រុងប៉េកាំងកំពុងពង្រីកឃ្លាំងគ្រាប់នុយក្លេអ៊ែររបស់ខ្លួនលឿនជាងប្រទេសណាណាទាំងអស់។ ទន្ទឹមនោះ SIPRI បានឲ្យដឹងទៀតថា ស្តុកនុយក្លេអ៊ែរសកលទាំងមូលបានធ្លាក់ចុះបន្តិចមកត្រឹម ១២ ២៤១គ្រាប់ ប៉ុន្តែវិទ្យាស្ថានស្រាវជ្រាវនេះបានបង្ហាញពីការព្រួយបារម្ភថា «ការប្រកួតប្រជែងអាវុធនុយក្លេអ៊ែរដ៏គ្រោះថ្នាក់កំពុងតែកើតឡើង»។

កូរ៉េខាងជើងត្រូវបានគេប៉ាន់ប្រមាណថាមានក្បាលគ្រាប់នុយក្លេអ៊ែរប្រហែល ៥០គ្រាប់គិតត្រឹមខែមករាឆ្នាំ២០២៥ ដូចគ្នាទៅនឹងឆ្នាំមុន។ យ៉ាងណាមិញ កូរ៉េខាងជើង មានសម្ភារៈ និងធាតុផ្សំគ្រប់គ្រាន់សម្រាប់ផលិតរហូតដល់ ៤០គ្រាប់បន្ថែមទៀត។

ចំណែកឯរុស្ស៊ីវិញនៅរក្សាឃ្លាំងអាវុធធំបំផុតជាងគេលើពិភពលោក ក្នុងចំនួន ៥ ៤៥៩គ្រាប់។

សហរដ្ឋអាមេរិកមានក្បាលគ្រាប់ចំនួន ៥ ១៧៧គ្រាប់។ របាយការណ៍បាននិយាយថា ក្បាលគ្រាប់នុយក្លេអ៊ែររបស់អាមេរិកនិងរុស្ស៊ី បើរួមគ្នា មានប្រហែល ៩០ភាគរយនៃចំនួនសរុបរបស់ពិភពលោក។ SIPRI ក៏បន្ថែមថា អ៊ីស្រាអែលមានក្បាលគ្រាប់ចំនួន ៩០គ្រាប់ ទោះបីជាប្រទេសនេះមិនទទួលស្គាល់ជាសាធារណៈថាមានពួកគេក៏ដោយ៕

ដោយ៖ ឈាង