ព័ត៌មានអន្ដរជាតិ

លោក Khamenei អ្នកកាន់ការធំបំផុតលើយុទ្ធសាស្ត្រនុយក្លេអ៊ែរអ៊ីរ៉ង់

បានផុស

៥ ខែ មុន

នៅ

ថ្ងៃព្រហស្បតិ៍ ១៩ មិថុនា ២០២៥

ដោយ

Chheang

Ayatollah Ali Khamenei ដែលជាមេដឹកនាំកំពូលរបស់អ៊ីរ៉ង់ ចាប់តាំងពីឆ្នាំ១៩៨៩ បានដើរតួនាទីយ៉ាងសំខាន់បំផុត ក្នុងការកំណត់គោលជំហរនុយក្លេអ៊ែររបស់សាធារណរដ្ឋអ៊ីស្លាម ទាំងមនោគមវិជ្ជា និងប្រតិបត្តិការ។ ទោះប្រធានាធិបតីបច្ចុប្បន្ន ឬពីមុនៗ ដូចជា Masoud Pazeshkian, Ebrahim Raisi ឬ Hassan Rouhani បានដឹកមុខដំណើរការការទូតជាសាធារណៈលើកម្មវិធីនុយក្លេអ៊ែរក៏ពិតមែន ក៏អ្នកកាន់ការនិងអំណាចធំចុងក្រោយគឺជា លោក Khamenei ដដែល។

លោក Ayatollah Ali Khamenei (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រាល់ការសម្រេចចិត្តនុយក្លេអ៊ែរទាំងអម្បាលម៉ានរបស់អ៊ីរ៉ង់ ត្រូវបានធ្វើឡើងក្រោមការបង្គាប់បញ្ជាពីមេដឹកនាំកំពូលតែម្នាក់គត់ មិនថាការចាប់ផ្តើមកិច្ចពិភាក្សា ការកំណត់កិច្ចសហប្រតិបត្តិការជាមួយទីភ្នាក់ងារអន្តរជាតិ ឬការជំរុញការចម្រាញ់សារធាតុអ៊ុយរ៉ាញ៉ូមនោះទេ។ ការផ្លាស់ប្តូរគោលនយោបាយសំខាន់ៗទាំងអស់ ត្រូវទាមទារឲ្យមានការយល់ព្រមពីលោក Khamenei ជាមុនសិន។ ទស្សនៈសំខាន់ៗរបស់លោក Khamenei ត្រូវបានជះឥទ្ធិពលដោយមនោគមវិជ្ជាបដិវត្តន៍ គោលការណ៍សាសនា និងការមិនទុកចិត្តលើលោកខាងលិច ហើយអ្វីដែលផ្ដោតសំខាន់គឺការគាំទ្រយ៉ាងពេញទំហឹងលើកម្មវិធីនុយក្លេអ៊ែររបស់ទីក្រុងតេហេរ៉ង់។

📜 ការជះឥទ្ធិពលសំខាន់ៗ

១. គោលលទ្ធិ Fatwa របស់លោក Khamenei ប្រឆាំងនឹងអាវុធនុយក្លេអ៊ែរ

លោក Khamenei បានប្រកាសម្តងហើយម្តងទៀតថា អាវុធនុយក្លេអ៊ែរ គឺជាច្បាប់ហាមប្រាមដោយសាសនាអ៊ីស្លាម។
នៅដើមទស្សវត្សរ៍ឆ្នាំ២០០០ លោកបានចេញសារមួយដោយបញ្ជាក់ថា អ៊ីរ៉ង់នឹងមិនបន្តផលិតអាវុធនុយក្លេអ៊ែរទេ មានតែថាមពលនុយក្លេអ៊ែរសម្រាប់គោលបំណងស៊ីវិលប៉ុណ្ណោះ។
ទោះជាយ៉ាងណាក៏ដោយ អ្នកវិភាគខ្លះចោទជាសំណួរអំពីទម្ងន់ផ្លូវច្បាប់ និងភាពអចិន្ត្រៃយ៍របស់គោលលទ្ធិ Fatwa ដោយពួកគេយល់ឃើញថា វាគ្រាន់តែជាឧបករណ៍នយោបាយ ជាជាងការហាមឃាត់បែបសាសនាដ៏តឹងរ៉ឹង។

២. កិច្ចព្រមព្រៀងនុយក្លេអ៊ែរ JCPOA ឆ្នាំ២០១៥

កិច្ចព្រមព្រៀងនុយក្លេអ៊ែរ ត្រូវបានអនុម័តក្រោមការត្រួតពិនិត្យរបស់លោក Khamenei។
លោកបានអនុញ្ញាតឲ្យមានការចរចា ប៉ុន្តែបានទទូចលើបន្ទាត់ក្រហមសំខាន់ៗ ដូចជា ការហាមឃាត់ការចូលទៅកាន់ទីតាំងយោធារបស់អ៊ីរ៉ង់ និងការដកទណ្ឌកម្មរបស់លោកខាងលិចភ្លាមៗ។
យ៉ាងណា បន្ទាប់ពីកិច្ចព្រមព្រៀងនេះ លោកនៅតែសម្តែងការមិនទុកចិត្តយ៉ាងខ្លាំងលើលោកខាងលិច ជាពិសេសសហរដ្ឋអាមេរិក។

៣. ការដកខ្លួនចេញជាឯកតោភាគីរបស់អាមេរិកពីកិច្ចព្រមព្រៀង ឆ្នាំ២០១៨

បន្ទាប់ពីការចាកចេញជាឯកតោភាគីរបស់រដ្ឋបាលលោក ដូណាល់ ត្រាំ ពីកិច្ចព្រមព្រៀង JCPOA លោក Khamenei បានបញ្ជាឲ្យមានការចម្រាញ់សារធាតុអ៊ុយរ៉ាញ៉ូមឡើងវិញបន្តិចម្ដងៗ។
នេះរួមបញ្ចូលទាំងការបង្កើនការចម្រាញ់សារធាតុអ៊ុយរ៉ាញ៉ូមលើសពីដែនកំណត់ដែលបានព្រមព្រៀងគ្នាពីមុន និងកាត់បន្ថយកិច្ចសហប្រតិបត្តិការជាមួយទីភ្នាក់ងារថាមពលបរមាណូអន្តរជាតិ (IAEA)។
លោក Khamenei បានចោទប្រកាន់ថា លោកខាងលិចមិនបានអនុលោមតាមកិច្ចព្រមព្រៀង ហើយដាក់ទណ្ឌកម្មឡើងវិញលើអ៊ីរ៉ង់ ដែលអ៊ីចឹងហើយការចាប់ផ្ដើមឡើងវិញនៃការចម្រាញ់អ៊ុយរ៉ាញ៉ូមរបស់ទីក្រុងតេហេរ៉ង់គឺជារឿងសមហេតុផល និងស្មើភាពគ្នា ដោយនោះមិនមែនជាសកម្មភាពបំពានកិច្ចព្រមព្រៀងនោះឡើយ។

៤. «ភាពធន់នៃសេដ្ឋកិច្ចប្រឆាំងនឹងទណ្ឌកម្ម» និងអធិបតេយ្យភាពវិទ្យាសាស្ត្រ

លោក Khamenei បានភ្ជាប់ការអភិវឌ្ឍនុយក្លេអ៊ែរទៅនឹងការពង្រឹងសេដ្ឋកិច្ច ដោយថា វាគឺជាការពឹងផ្អែកលើខ្លួនឯង និងសេចក្តីថ្លៃថ្នូររបស់ជាតិ។
លោកអះអាងថា ឯករាជ្យភាពផ្នែកបច្ចេកវិទ្យា រួមទាំងសមត្ថភាពនុយក្លេអ៊ែរដោយសន្តិវិធី គឺជាកត្តាចាំបាច់សម្រាប់ការទប់ទល់នឹងអនុត្តរភាពរបស់លោកខាងលិច។

🧩 ភាពមិនច្បាស់លាស់ជាយុទ្ធសាស្ត្រ

លោក Khamenei បានស្ទាត់ជំនាញលើការប្រើប្រាស់ភាពមិនច្បាស់លាស់នៃកម្មវិធីនុយក្លេអ៊ែរអ៊ីរ៉ង់ ពោលគឺនៅទទូចដដែលថា អ៊ីរ៉ង់មិនស្វែងរកការផលិតអាវុធនោះឡើយ ខណៈពេលដែលខ្លួនក៏នៅមិនឆ្ងាយពីកម្រិតបច្ចេកទេសទាំងនោះដែរ។ យុទ្ធសាស្ត្ររបស់មេដឹកនាំកំពូលអ៊ីរ៉ង់ មានដូចជា៖

ការទុកឲ្យអន្តរជាតិងឿងឆ្ងល់៖ ពិភពលោកទាំងមូល (រួមទាំងអាមេរិក អ៊ីស្រាអែល ឬអឺរ៉ុប) មិនប្រាកដថា អ៊ីរ៉ង់នឹងបង្កើតអាវុធនុយក្លេអ៊ែរឬក៏អត់នោះទេ។ យុទ្ធសាស្ត្ររបស់លោក Khamenei គឺបង្កើតភាពមិនច្បាស់លាស់នេះ ដើម្បីឲ្យប្រទេសផ្សេងទៀតមានការប្រុងប្រយ័ត្ន។ បើប្រទេសនានាមិនដឹងពីចេតនាពិតរបស់អ៊ីរ៉ង់ ពួកគេកាន់តែមានការប្រុងប្រយ័ត្នចំពោះរបៀបដែលពួកគេត្រូវដោះស្រាយជាមួយអ៊ីរ៉ង់។
ការចូលរួមនៅក្នុងកិច្ចពិភាក្សាការទូត៖ តាមរយៈការខិតទៅជិតទៅដល់កម្រិតផលិតអាវុធនុយក្លេអ៊ែរ អ៊ីរ៉ង់អាចប្រើចំណុចនេះជាឧបករណ៍ ដើម្បីទទួលបាននូវអ្វីដែលខ្លួនចង់បាននៅក្នុងការពិភាក្សា។ ជាឧទាហរណ៍ អ៊ីរ៉ង់អាចនិយាយបានថា «បើអ្នកចង់ឲ្យយើងពន្យឺតកម្មវិធីនុយក្លេអ៊ែររបស់យើង សូមដកទណ្ឌកម្មចេញ»។
ការយកចិត្តក្រុមប្រឆាំងនឹងលោកខាងលិច៖ នៅខាងក្នុងប្រទេសអ៊ីរ៉ង់ ក្រុមដ៏មានឥទ្ធិពលមួយចំនួន បានសម្ដែងការប្រឆាំងខ្លាំងទៅនឹងលោកខាងលិច និងគាំទ្រកម្មវិធីនុយក្លេអ៊ែររបស់ទីក្រុងតេហេរ៉ង់។ វិធីសាស្រ្តរបស់លោក Khamenei គឺអភិវឌ្ឍសមត្ថភាពនុយក្លេអ៊ែរ ប៉ុន្តែមិនបង្កើតគ្រាប់បែកទេ ដែលនេះអាចធ្វើឲ្យពួកគេស្ងប់ចិត្តបាន។

🌍 ការយល់ឃើញជាសកល

អ្នកគាំទ្រមើលឃើញថា លោក Khamenei ជាមេដឹកនាំដ៏ឈ្លាសវៃ ដែលព្យាយាមបញ្ចៀសពីសង្គ្រាម ខណៈការពារសិទ្ធិរបស់អ៊ីរ៉ង់។
អ្នករិះគន់គិតថា លោកកំពុងធ្វើពុតជាសន្តិភាព ខណៈការពិតនៅពីក្រោយឆាកកំពុងលួចសម្ងំផលិតអាវុធប្រល័យលោក៕

ដោយ៖ ឈាង