ព័ត៌មានអន្ដរជាតិ

អ្នកវិទ្យាសាស្ត្រនុយក្លេអ៊ែរកំពូលៗអ៊ីរ៉ង់យ៉ាងតិច ១៤នាក់ត្រូវសម្លាប់ក្នុងការវាយប្រហារ១២ថ្ងៃ

បានផុស

៣៥ វិនាទី មុន

នៅ

ថ្ងៃពុធ ២៥ មិថុនា ២០២៥

ដោយ

នៅក្នុងការវាយប្រហារយោធាដ៏ខ្លាំងលើប្រទេសអ៊ីរ៉ង់មិនធ្លាប់មានពីមុនមក អ៊ីស្រាអែលបានសម្លាប់អ្នកវិទ្យាសាស្ត្រកំពូលៗរបស់អ៊ីរ៉ង់យ៉ាងតិច ១៤នាក់ ក្នុងគោលបំណងធ្វើឱ្យកម្មវិធីនុយក្លេអ៊ែររបស់អ៊ីរ៉ង់ធ្លាក់ចុះដោយការលុបបំបាត់អ្នករូបវិទ្យា វិស្វករ និងគីមីវិទូសំខាន់ៗរបស់ប្រទេសនេះ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី២៥ខែមិថុនា។

ទីតាំងផលិតនុយក្លេអ៊ែរក្រោមដីរបស់អ៊ីរ៉ង់ (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ៊ីស្រាអែល បានបញ្ជាក់ថា ខ្លួនបានសម្លាប់អ្នកវិទ្យាសាស្ត្រកំពូលៗរបស់អ៊ីរ៉ង់ចំនួន១៤នាក់ រួមទាំងអ្នកជំនាញរូបវិទ្យា គីមីវិទូ វិស្វករ និងអ្នកជំនាញគ្រឿងផ្ទុះ ដែលត្រូវបានគេជឿថាមានជាប់ពាក់ព័ន្ធដោយផ្ទាល់ក្នុងការបង្កើតអាវុធនុយក្លេអ៊ែរ។ ពួកគេ ៩នាក់ បានស្លាប់នៅក្នុងការវាយប្រហារដំបូងរបស់អ៊ីស្រាអែលកាលពីថ្ងៃទី ១៣ខែមិថុនា។

អ៊ីស្រាអែលបាននិយាយថា អ្នកជំនាញទាំងនេះមានបទពិសោធន៍ជាច្រើនឆ្នាំហើយគឺជាគន្លឹះនៃកម្មវិធីនុយក្លេអ៊ែររបស់អ៊ីរ៉ង់។ អ្នកវិទ្យាសាស្ត្រម្នាក់ក្នុងចំណោមអ្នកវិទ្យាសាស្ត្រជាច្រើន គឺ លោក Mohammad Reza Sedighi Saber ត្រូវបានសម្លាប់នៅក្នុងការវាយប្រហារមួយលើកក្រោយ បន្ទាប់ពីបានរួចជីវិតពីការវាយប្រហារមុនដែលបានសម្លាប់កូនប្រុសជំទង់របស់គាត់។

រដ្ឋាភិបាលអ៊ីស្រាអែល បានអះអាងថា ប្រតិបត្តិការវាយប្រហារនេះនឹងរួមចំណែកពន្យារពេលយ៉ាងយូរដល់ការកសាងសមត្ថភាពរបស់អ៊ីរ៉ង់ក្នុងការអភិវឌ្ឍអាវុធនុយក្លេអ៊ែរ បើទោះជាអ្នកវិភាគព្រមានថា វានឹងមិនលុបបំបាត់ចំណេះដឹងវិទ្យាសាស្ត្ររាប់ទសវត្សរ៍របស់អ៊ីរ៉ង់ក៏ដោយ។ ឯកអគ្គរដ្ឋទូតអ៊ីស្រាអែល លោក Joshua Zarka បាននិយាយថា ការបាត់បង់អ្នកជំនាញទាំងនេះបានធ្វើឱ្យកម្មវិធីនុយក្លេអ៊ែរអ៊ីរ៉ង់ត្រឡប់ទៅរកភាពអន់ថយរាប់សិបច្រើនឆ្នាំ។

អ្នកជំនាញ បានអះអាងថា ខណៈពេលដែលការសម្លាប់រង្គាលលើអ្នកជំនាញធ្វើឲ្យដំណើរការយឺត អ៊ីរ៉ង់នៅតែមានបុគ្គលិកជំនាញ និងប្លង់មេ ដើម្បីកសាងឡើងវិញ។ យ៉ាងណាមេដឹកនាំអឺរ៉ុប បានទទូចថា សកម្មភាពយោធាតែឯងមិនអាចបញ្ចប់មហិច្ឆតានុយក្លេអ៊ែររបស់អ៊ីរ៉ង់ទេ ហើយបន្តជំរុញឱ្យមានដំណោះស្រាយការទូត។

មនុស្សម្នាមើលការខូចខាតអគារនៅទីលាន Nobonyad បន្ទាប់ពីការវាយប្រហារតាមអាកាសរបស់អ៊ីស្រាអែល។ (រូបភាព៖ Getty)

ការសម្លាប់នេះនាំឲ្យមានចម្ងល់ទាក់ទងទៅនឹងផ្លូវច្បាប់ និងសីលធម៌យ៉ាងធ្ងន់ធ្ងរ ខណៈអ្នកជំនាញខ្លះនិយាយថា មិនអីទេ ព្រោះអ្នកវិទ្យាសាស្ត្របានជួយបង្កើតអាវុធ។ ប៉ុន្តែអ្នកផ្សេងទៀតព្រមានថាវាមានគ្រោះថ្នាក់ព្រោះអាចនាំឱ្យប្រទេសជាច្រើនទៀតយកគំរូតាម ខណៈអ៊ីរ៉ង់ចោទប្រកាន់អ៊ីស្រាអែលថាបានបំពានច្បាប់អន្តរជាតិ។

គួរបញ្ជាក់ថាទាំងនេះគឺជាផ្នែកនៃផែនការវាយប្រហារដ៏ធំរបស់អ៊ីស្រាអែល ដើម្បីធ្វើឱ្យខូចខាតដោយសម្ងាត់ និងបញ្ឈប់ការរីកចម្រើនរបស់អ៊ីរ៉ង់ ដូច្នេះអ៊ីរ៉ង់មិនអាចបង្កើតអាវុធនុយក្លេអ៊ែរបានទេ។ ប៉ុន្តែនេះក៏ធ្វើឲ្យជម្លោះរវាងប្រទេសទាំងពីរកាន់តែគ្រោះថ្នាក់ និងតានតឹង៕