លោក ត្រាំ លុបចោល​ទណ្ឌកម្ម​ដែល​ធ្លាប់​ដាក់​ជិត២០ឆ្នាំ​លើ​រដ្ឋាភិបាល​ស៊ីរី

កាល​ពី​ថ្ងៃ​ចន្ទ​ទី​៣០​ខែ​មិថុនា​ឆ្នាំ​២០២៥ ប្រធានាធិបតី ដូណាល់ ត្រាំ បានចុះហត្ថលេខាលើបទបញ្ជាប្រតិបត្តិជាផ្លូវការ សម្រាប់ការ​ដក​ទណ្ឌកម្ម​របស់សហរដ្ឋអាមេរិកលើរដ្ឋាភិបាលស៊ីរី ដែលជាការកត់សម្គាល់​នៃ​ការផ្លាស់ប្តូរដ៏សំខាន់​មួយ​នៅក្នុងគោលនយោបាយក្រុង​វ៉ាស៊ីនតោន។

អ្នក​នាំ​ពាក្យ​សេតវិមាន លោកស្រី Karoline Leavitt បាន​ឲ្យ​ដឹង​ថា ចំណាត់ការ​នេះ គឺ​ជា​ការ​បញ្ចប់សេចក្ដី​​ប្រកាស «គ្រាអាសន្នជាតិ» របស់សហរដ្ឋអាមេរិកដែលមាន​​រយៈពេលជិតពីរទសវត្សរ៍ ប្រឆាំងនឹងស៊ីរី។

នៅក្រោមបទបញ្ជា​ប្រតិបត្តិ​នេះ ទណ្ឌកម្មដែលផ្តោតលើ​រដ្ឋាភិបាលកណ្តាល វិស័យសេដ្ឋកិច្ច និងស្ថាប័នរដ្ឋរបស់ស៊ីរី ត្រូវបានដកចេញ ដើម្បីគាំទ្រដល់ការកសាងឡើងវិញក្រោយសង្គ្រាម និងសមាហរណកម្មសេដ្ឋកិច្ច។ ទោះយ៉ាងណាក៏ដោយ ទណ្ឌកម្មនៅតែមាន​សម្រាប់៖

• អតីតប្រធានាធិបតី Bashar al-Assad ពាក់ព័ន្ធ​នឹង​ការរំលោភសិទ្ធិមនុស្ស
• បុគ្គលពាក់ព័ន្ធនឹង​អាវុធគីមី ការជួញដូរគ្រឿងញៀន និង​អំពើភេរវកម្ម
• ក្រុមដែលមានទំនាក់ទំនងជាមួយ​ ISIS និង​ប្រូក​ស៊ី​អ៊ីរ៉ង់

រដ្ឋមន្ត្រីការបរទេសស៊ីរីលោក Asaad al-Shibani បាននិយាយថា ការបញ្ចប់​ទណ្ឌកម្ម​លើ​ស៊ីរីរបស់លោក ត្រាំ នឹង«បើកទ្វារនៃការកសាងឡើងវិញ និងការអភិវឌ្ឍ​ដែលរង់ចាំជាយូរ​ណាស់​មកហើយ»។ លោក​បន្ថែម​ថា ​វិធានការ​នេះ​នឹង​«ដក​ចេញ​នូវ​​ឧបសគ្គ» ដែល​​ប្រឆាំង​នឹង​ការ​ស្ទុះ​ងើប​​នៃ​សេដ្ឋកិច្ច​ និង​​ការ​បើក​ប្រទេស​​ចូល​ទៅ​ក្នុង​សហគមន៍​អន្តរជាតិ។

សូម​ជម្រាប​ថា ការ​ចុះហត្ថលេខាលើបទបញ្ជាប្រតិបត្តិ​នេះ ធ្វើ​ឡើង​បន្ទាប់​ពី​លោក ត្រាំ បានសន្យាថានឹងដកទណ្ឌកម្ម ក្នុងអំឡុងពេលកិច្ចប្រជុំខែឧសភានៅប្រទេសអារ៉ាប៊ីសាអូឌីត ជាមួយមេដឹកនាំបណ្តោះអាសន្នរបស់ប្រទេសស៊ីរី លោក Ahmed al-Sharaa។ រដ្ឋាភិបាលរបស់​លោក Sharaa បាន​ឡើង​កាន់​អំណាច​ ក្រោយ​លោក Assad ​ត្រូវ​បាន​ផ្ដួល​រលំ​​ដោយ​ក្រុម​ឧទ្ទាម​ក្នុងខែធ្នូឆ្នាំ​២០២៤៕

ដោយ៖ ឈាង