ក្នុងពេល៤៨ម៉ោង អ៊ីស្រាអែលសម្លាប់ជនជាតិប៉ាឡេស្ទីនជាង ៣០០នាក់ ក្នុងតំបន់ហ្គាហ្សា

ក្នុងរយៈពេល ៤៨ម៉ោងកន្លងមកនេះ កងកម្លាំងអ៊ីស្រាអែលបានសម្លាប់ជនជាតិប៉ាឡេស្ទីនជាង ៣០០នាក់នៅក្នុងតំបន់ហ្គាហ្សា ដែលជាការសម្លាប់ដ៏រង្គាល ជាពិសេសទៅលើអ្នកកំពុងចាំបើកជំនួយ។

យោងតាមការចេញផ្សាយរបស់សារព័ត៌មាន​Al Jazeera នៅថ្ងៃទី០៤ខែកក្កដា ការិយាល័យប្រព័ន្ធផ្សព្វផ្សាយរដ្ឋាភិបាលហ្គាហ្សា បានអះអាងថា យ៉ាងហោចណាស់មនុស្ស ១១៨នាក់ត្រូវបានសម្លាប់ក្នុងរយៈពេល ២៤ម៉ោងចុងក្រោយនេះ ដោយ៣៣នាក់ត្រូវបានសម្លាប់នៅមជ្ឈមណ្ឌលចែកចាយជំនួយមូលនិធិមនុស្សធម៌ហ្គាហ្សា (GHF) ដែលបង្កឱ្យមានការ​ថ្កោលទោស​ពី​អន្តរជាតិ។

ការវាយប្រហារតាមអាកាសបានកំណត់គោលដៅ​លើ​ទីជម្រក សាលារៀន និងជុំរុំ​ជនភៀសខ្លួនដែលមានមនុស្សច្រើនកកកុញ។ របាយការណ៍ពីទីក្រុង Deir el-Balah បានឲ្យដឹងថា ជនស៊ីវិលដែល​រស់ទាំង​អស់សង្ឃឹមកំពុង​ឈរ​រង់ចាំ​យក​អាហារ តែត្រូវបានជួបជាមួយនឹងការបាញ់កាំភ្លើងភ្លាមៗ ដោយមិនមានការជូនដំណឹងជាមុននោះទេ។

បញ្ហានេះជំរុញឲ្យមានការថ្កោលទោសអន្តរជាតិ​កាន់តែ​ច្រើន​ឡើង ដោយអង្គការជំនួយជាង ១៣០ រួមទាំង Oxfam និង Amnesty International កំពុងទាមទារឱ្យបិទ GHF ដោយចោទប្រកាន់ថាវាត្រូវបានប្រើដើម្បីដាក់​អន្ទាក់ និងកំណត់គោលដៅប្រជាជនប៉ាឡេស្ទីនដែលអត់ឃ្លាន។ ចាប់តាំងពី GHF បានចាប់ផ្តើមប្រតិបត្តិការនៅក្នុងខែឧសភា មនុស្សជាង៦៥០ នាក់បានស្លាប់នៅពេលកំពុងស្វែងរកជំនួយ។

ទន្ទឹមនឹងនេះ ក្រុមហាម៉ាសកំពុងពិនិត្យមើលសំណើបទឈប់បាញ់រយៈពេល ៦០ ថ្ងៃ ដែលមានបំណងបញ្ចប់សង្រ្គាម និងជំរុញឱ្យមានការដកទ័ពអ៊ីស្រាអែល។ ការពិភាក្សាកំពុងបន្តចំពេលមានសម្ពាធរបស់សហរដ្ឋអាមេរិក និងវិបត្តិមនុស្សធម៌នៅតែបន្តកើនឡើង៕

អត្ថបទ៖ ប៊ុន សុភាព