ព័ត៌មានអន្ដរជាតិ

ក្រោយស្បថចូលកាន់តំណែងរដ្ឋមន្ត្រីក្រសួងវប្បធម៌ ផែថងតាន ចង់ដើរតាមគន្លងកូរ៉េខាងត្បូង

បានផុស

១០ ខែ មុន

នៅ

ថ្ងៃអាទិត្យ ៦ កក្កដា ២០២៥

ដោយ

ក្រោយពេលស្បថចូលកាន់តំណែងជារដ្ឋមន្ត្រីក្រសួងវប្បធម៌កាលពីថ្ងៃទី៥ កក្កដា ផែថងថាន ស៊ីណាវ៉ាត្រ បានបង្ហាញជំហរផ្ទាល់ខ្លួនក្នុងការដឹកនាំថា នឹងជំរុញអំណាចទន់ (Soft Power) របស់ថៃ ឲ្យដើរតាមគន្លងរបស់កូរ៉េខាងត្បូង ដូចដែល លោកស្រីបានសន្យាកន្លងមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយករដ្ឋមន្ត្រីដែលត្រូវព្យួរតំណែងរូបនេះបានបញ្ចាក់យ៉ាងម៉ឺងម៉ាត់ថា ទោះបីពេលនេះមានសភាពអាក្រក់បន្តិច ដែលលោកស្រីឈប់បំពេញតួនាទីនាយករដ្ឋមន្ត្រីក្នុងការគ្រប់គ្រងប្រទេសថៃ។ ប៉ុន្តែខ្លួនចង់តស៊ូដើម្បីតំណែងរដ្ឋមន្ត្រីក្រសួងវប្បធម៌ឲ្យបានពេញទំហឹង។

តាមរយៈបទសម្ភាសន៍ជាមួយក្រុមអ្នកសារព័ត៌មានក្នុងថ្ងៃស្បថចូលកាន់តំណែងជារដ្ឋមន្ត្រីក្រសួងវប្បធម៌ កូនពៅលោក ថាក់ស៊ីនបាននិយាយថា «ខ្ញុំបានមកធ្វើការក្នុងតួនាទីជារដ្ឋមន្ត្រីក្រសួងវប្បធម៌ នេះជាលើកដំបូងរបស់ខ្ញុំក្នុងនាមជារដ្ឋមន្ត្រី ដូច្នេះខ្ញុំត្រូវណែនាំខ្លួនឯង។ ខ្ញុំចង់ធ្វើរឿងមួយនោះគឺ ក្រសួងវប្បធម៌គួរតែរីកចម្រើន និងក្លាយជាអស្ចារ្យដូចប្រទេសកូរ៉េខាងត្បូង ដែលមានក្រសួងវប្បធម៌ជាក្រសួងសំខាន់ក្នុងការបង្កើតប្រាក់ចំណូលជូនប្រជាពលរដ្ឋតាមគោលនយោបាយអំណាចទន់ ដែលធ្លាប់និយាយជាមួយប្រជាជន។ ក្រសួងវប្បធម៌ នឹងជាគន្លឹះក្នុងការជំរុញអាជីពថ្មី ឬឱកាសថ្មីសម្រាប់បងប្អូនជនជាតិថៃរបស់យើង»។

យ៉ាងណាក៏ដោយ ផែថងថាន ស៊ីណាវ៉ាត្រ បាននិយាយថា លោកស្រីរីករាយ និងមានកិត្តិយសដែលបានធ្វើជារដ្ឋមន្ត្រីក្រសួងវប្បធម៌លើកនេះ។

ជាមួយគ្នានេះ ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក Phumtham Vejjayachai ក៏បានលើកឡើងអំពីគោលនយោបាយ ដោយសង្កត់ធ្ងន់យ៉ាងច្បាស់ថា លោកបានកំណត់ពេលបង្ក្រាបគ្រឿងញៀនក្នុងរយៈពេល៣ខែ៕