កូរ៉េខាងត្បូង ផ្តល់ទិដ្ឋាការបណ្តោះអាសន្នដល់ទេសចរចិនមុន​កិច្ចប្រជុំ​កំពូល APEC

យោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី០៦ខែសីហា កូរ៉េខាងត្បូងបានប្រកាសថា ខ្លួននឹងអនុញ្ញាតឱ្យទេសចរចិនចូលប្រទេសខ្លួនដោយគ្មានទិដ្ឋាការចាប់ពីថ្ងៃទី ២៩ ខែកញ្ញា ឆ្នាំ ២០២៥ដល់ខែមិថុនា ឆ្នាំ ២០២៦ ក្នុងកិច្ចខិតខំប្រឹងប្រែងដើម្បីជំរុញទេសចរណ៍ និងគាំទ្រសេដ្ឋកិច្ចនៅមុនកិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នាពេលខាងមុខ។

ការផ្លាស់ប្តូរនេះធ្វើឡើងបន្ទាប់ពីការសម្រេចចិត្តរបស់ប្រទេសចិនមុននេះក្នុងការផ្តល់ការលើកលែងទិដ្ឋាការដល់ប្រជាជនកូរ៉េខាងត្បូង និងអ្នកដំណើរបរទេសផ្សេងទៀត។ ក្រសួងទេសចរណ៍របស់កូរ៉េខាងត្បូងសង្ឃឹមថា គោលនយោបាយដែលបានកំណត់មុនថ្ងៃឈប់សម្រាកនៅដើមខែតុលារបស់ប្រទេសចិន នឹងបង្កើនចំនួនភ្ញៀវទេសចរ និងសកម្មភាពសេដ្ឋកិច្ច។

ការសម្រេចចិត្តនេះក៏ត្រូវបានគេមើលឃើញថាជាជំហានឆ្ពោះទៅរកការកែលម្អទំនាក់ទំនងរវាងប្រទេសចិន និងកូរ៉េខាងត្បូង ជាពិសេសនៅក្រោមការគ្រប់គ្រងថ្មីរបស់ប្រធានាធិបតី Lee Jae Myung។

គួរបញ្ជាក់ថាគោលនយោបាយគ្មានទិដ្ឋាការគឺជាផ្នែកមួយនៃកិច្ចខិតខំប្រឹងប្រែងទូលំទូលាយក្នុងការធ្វើឱ្យវិស័យទេសចរណ៍របស់ប្រទេសកូរ៉េខាងត្បូងមានភាពរស់រវើកឡើងវិញ៕

អត្ថបទ៖ ប៊ុន សុភាព