ព័ត៌មានអន្ដរជាតិ

អ៊ីរ៉ង់ ប្រហារជីវិតអ្នកវិទ្យាសាស្ត្រនុយក្លេអ៊ែរម្នាក់ ពីបទធ្វើចារកម្មឲ្យអ៊ីស្រាអែល

បានផុស

១១ ខែ មុន

នៅ

ថ្ងៃព្រហស្បតិ៍ ៧ សីហា ២០២៥

ដោយ

Chheang

ប្រព័ន្ធផ្សព្វផ្សាយរដ្ឋ Mizan បានរាយការណ៍កាលពីថ្ងៃពុធទី៦ខែសីហាឆ្នាំ២០២៥ថា អ៊ីរ៉ង់បានប្រហារជីវិតអ្នកវិទ្យាសាស្ត្រនុយក្លេអ៊ែរម្នាក់ ដែលត្រូវបានចោទប្រកាន់ពីបទធ្វើចារកម្មឲ្យអ៊ីស្រាអែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Rouzbeh Vadi ត្រូវបានកាត់ទោសពីបទផ្តល់ព័ត៌មានសម្ងាត់ឲ្យទីភ្នាក់ងារ Mossad របស់អ៊ីស្រាអែល។ យោងតាមប្រព័ន្ធតុលាការអ៊ីរ៉ង់ លោក Vadi បានជួបប្រជុំចំនួន៥ដងជាមួយភ្នាក់ងារ Mossad នៅទីក្រុងវីយែន ហើយបានផ្តល់ឲ្យពួកគេនូវព័ត៌មានអំពីអ្នកវិទ្យាសាស្ត្រនុយក្លេអ៊ែរអ៊ីរ៉ង់ផ្សេងទៀត ដែលក្រោយមកត្រូវបានសម្លាប់ក្នុងអំឡុងពេលការវាយប្រហារតាមអាកាសរបស់អ៊ីស្រាអែលកាលពីខែមិថុនា។

យោងតាមការចុះផ្សាយរបស់ Mizan សកម្មភាពរបស់ Vadi ត្រូវចាត់ទុកជា«អំពើក្បត់ជាតិ» ហើយតុលាការកំពូលបានតម្កល់ទោសប្រហារជីវិត។ ការប្រហារជីវិតនេះ ធ្វើឡើងដោយការព្យួរក បើទោះជាមន្ត្រីមិនបានបញ្ជាក់ពីទីតាំងច្បាស់លាស់ក៏ដោយ។

អ៊ីរ៉ង់ក៏បានប្រហារជីវិតបុរសទីពីរនៅថ្ងៃដដែលផងដែរ។ Mehdi Asgharzadeh ត្រូវបានចោទប្រកាន់ថាជាសមាជិកក្រុមរដ្ឋឥស្លាម និងរៀបចំផែនការបំផ្លិចបំផ្លាញអ៊ីរ៉ង់។

ការប្រហារជីវិតទាំងនេះ កើតឡើងចំពេលមានភាពតានតឹងកាន់តែខ្លាំងនៅក្នុងតំបន់ បន្ទាប់ពីយុទ្ធនាការលើអាកាសរយៈពេល ១២ថ្ងៃរបស់អ៊ីស្រាអែល ដែលផ្តោតលើហេដ្ឋារចនាសម្ព័ន្ធយោធា និងនុយក្លេអ៊ែរអ៊ីរ៉ង់កាលពីខែមិថុនា។ អ៊ីរ៉ង់បានឆ្លើយតបដោយការវាយប្រហារដោយមីស៊ីលនិងយន្តហោះគ្មានមនុស្សបើកប្រឆាំងនឹងអ៊ីស្រាអែលវិញ។

អង្គការសិទ្ធិមនុស្សបានថ្កោលទោសការប្រហារជីវិតនេះ ដោយព្រមានថា ប្រព័ន្ធតុលាការរបស់អ៊ីរ៉ង់ជារឿយៗដំណើរការដោយគ្មានតម្លាភាព ហើយថា ចុងចោទត្រូវបានបដិសេធជាញឹកញាប់នូវតំណាងផ្លូវច្បាប់ត្រឹមត្រូវ។

រដ្ឋាភិបាលអ៊ីរ៉ង់មិនបានធ្វើអត្ថាធិប្បាយបន្ថែមលើករណីនេះទេ ខណៈអ៊ីស្រាអែលក៏មិនបានទទួលស្គាល់ជាផ្លូវការអំពីការជាប់ពាក់ព័ន្ធរបស់លោក Vadi ជាមួយភ្នាក់ងារ Mossad ផងដែរ។ ទោះបីជាយ៉ាងណាក៏ដោយ កន្លងមកមន្ត្រីអ៊ីស្រាអែលធ្លាប់បានបញ្ជាក់អំពីចេតនារបស់ពួកគេ ក្នុងការរំខានដល់កម្មវិធីនុយក្លេអ៊ែររបស់អ៊ីរ៉ង់ តាមរយៈប្រតិបត្តិការស៊ើបការណ៍សម្ងាត់។

អង្គការសហប្រជាជាតិបានសម្តែងការព្រួយបារម្ភចំពោះការកើនឡើងនៃទោសប្រហារជីវិតក្នុងប្រទេសអ៊ីរ៉ង់នៅឆ្នាំនេះ ហើយបានអំពាវនាវឲ្យមានការកាត់ក្តីដោយយុត្តិធម៌ និងដំណើរការត្រឹមត្រូវតាមច្បាប់នៅក្នុងសំណុំរឿងទាំងអស់៕

ដោយ៖ ឈាង