មេភូមិភាគ៤ថៃ ចុះទៅខេត្តភាគខាងត្បូង ព្រោះស្ថានការណ៍មិនសូវស្រួល

មេភូមិភាគ៤ថៃ​ បានធ្វើដំណើរទៅខេត្ត Narathiwat នៅព្រំដែនភាគខាងត្បូង បន្ទាប់ពីទទួលព័ត៌មានថា ស្ថានការណ៍នៅទីនោះ មិនសូវស្រួល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃអង្គារទី១២ខែសីហាឆ្នាំ២០២៥ លោក Paisal Nusang បានជិះឧទ្ធម្ភាគចក្រមើលតំបន់ព្រំដែនភ្នំនៃខេត្តនេះ ក្រោយទទួលរបាយការណ៍ថា មានក្រុមសកម្មប្រយុទ្ធ ជួញដូរអាវុធនិងគ្រាប់រំសេវពីប្រទេសជិតខាង ចូលដីថៃ ក្នុងគោលបំណងត្រៀមធ្វើសកម្មភាពហិង្សា។ 

ក្នុងអំឡុងពេលធ្វើដំណើរនោះ លោកប្រាប់ឲ្យកងទ័ពតាមដានស្ថានការណ៍ និងត្រៀមខ្លួនជានិច្ចដើម្បីដោះស្រាយ ក្នុងករណីមានហេតុការណ៍ណាមួយកើតឡើង។

សូមជម្រាបជាថ្មី អំពើហិង្សានៅភាគខាងត្បូងប្រទេសថៃ គឺជាជម្លោះដែលកើតមានឡើងជាយូរមកហើយរវាងរដ្ឋាភិបាលថៃនិងក្រុមបះបោរផ្តាច់ខ្លួនមូស្លីម។

យោងតាមតួលេខចុងក្រោយពីក្រុមស្រាវជ្រាវ Deep South Watch, គិតចាប់តាំងពីឆ្នាំ២០០៤មក មនុស្សស្លាប់នៅក្នុងអំពើហិង្សានោះ មានជាង ៧ ៥០០នាក់ ខណៈជាង ១៣ ៥០០នាក់ រងរបួស។ ក្នុងចំណោមមនុស្សស្លាប់ក៏រួមមានមន្ត្រីយោធានិងប៉ូលិស ផងដែរ។

រដ្ឋាភិបាលថៃ បានព្យាយាមដោះស្រាយបញ្ហានេះតាមរយៈកិច្ចចរចាសន្តិភាពជាមួយក្រុមបះបោរធំៗ ដូចជា Barisan Revolusi Nasional ដោយមានការជួយសម្របសម្រួលពីម៉ាឡេស៊ី។ ទោះបីជាមានការចរចាក៏ដោយ ក៏អំពើហិង្សានៅតែបន្តកើតមានឡើងម្ដងម្កាលរហូតមកដល់បច្ចុប្បន្ន៕

អត្ថបទ៖ សុខ សុវណ្ណ

ចុចអាន៖ ថៃ កំពុងក្រពុលមុខខ្លាំង ខ្លាចទេសចរបរទេសឈប់ទៅលេង ក្រោយហេតុការណ៍ ដុតជនជាតិម៉ាឡេស៊ី