ព័ត៌មានអន្ដរជាតិ

ពូទីននិងត្រាំ មិនទទួលសំណួរអ្នកកាសែតទេ ខណៈមន្ត្រីរុស្ស៊ី ថា កិច្ចពិភាក្សាលើកនេះជាប្រភពដំណោះស្រាយទៅថ្ងៃមុខ

បានផុស

១១ ខែ មុន

នៅ

ថ្ងៃសៅរ៍ ១៦ សីហា ២០២៥

ដោយ

យោងតាមការចេញផ្សាយរបស់ភ្នាក់ងារព័ត៌មានរុស្ស៊ី អ្នកនាំពាក្យប្រធានាធិបតីរុស្ស៊ី លោក Dmitry Peskov បាននិយាយថា ប្រធានាធិបតីរុស្ស៊ី លោក វ្ល៉ាឌីមៀ ពូទីន និងសហរដ្ឋអាមេរិក លោក ដូណាល់ ត្រាំ បានសម្រេចចិត្តមិនយកសំណួរទេ ពីព្រោះពួកគេបានថ្លែងយ៉ាងទូលំទូលាយនៅក្នុងសន្និសីទសារព័ត៌មានចុងក្រោយ។

លោក ពូទីន និង លោកត្រាំ អង្គុយឲ្យអ្នកកាសែតថត មុនដេញអ្នកកាសែតចេញ។ White House

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្នាក់ងារព័ត៌មាន TASS បានរាយការណ៍ថា នៅពេលត្រូវបានសួរថា ហេតុអ្វីបានជាសន្និសីទសារព័ត៌មានដែលរំពឹងទុកនៅទីបំផុតត្រូវបានធ្វើឡើងក្នុងទម្រង់នៃសេចក្តីថ្លែងការណ៍របស់មេដឹកនាំ លោកបានឆ្លើយតបថា «សេចក្តីថ្លែងការណ៍ដ៏ទូលំទូលាយត្រូវបានធ្វើឡើង»។

តាមលោក Peskov ភាគីរុស្ស៊ីក៏ទទួលស្គាល់ថាការសន្ទនាពិតជាមានភាពវិជ្ជមានខ្លាំងណាស់ ហើយមេដឹកនាំទាំងពីរបាននិយាយដូច្នេះ «នេះគឺជាប្រភេទនៃការសន្ទនាដែលអនុញ្ញាតឱ្យប្រកាន់ខ្ជាប់នូវផ្លូវនៃការស្វែងរកជម្រើសដំណោះស្រាយសន្តិភាពជាមួយគ្នា»។

ប្រធានាធិបតីសហរដ្ឋអាមេរិក លោក ដូណាល់ ត្រាំ នឹងធ្វើដំណើរចាកចេញពីរដ្ឋអាឡាស្កា នៅម៉ោង៨៖៤៥នាទីព្រឹកថ្ងៃសៅរ៍នេះម៉ោងនៅកម្ពុជា ត្រូវនឹងរម៉ោង៥ និង៤៥នាទីល្ងាច ម៉ោងនៅរដ្ឋអាឡាស្កា បន្ទាប់ពីជួបនិយាយគ្នាជាមួយប្រធានាធិបតីរុស្ស៊ី លោក វ៉ា្លឌីមៀរ ពូទីន អស់រយៈពេលប្រមាណ៣ម៉ោង ដោយបញ្ចប់ទៅជាមួយគ្មានកិច្ចព្រមព្រៀងណាមួយសម្រេចជាផ្លូវការនោះទេ។

លោក ដូណាល់ ត្រាំ នឹងចាកចេញពីទីក្រុង Anchorage រដ្ឋអាឡាស្កា ហោះហើរទៅកាន់ទីក្រុងវ៉ាស៊ីនតោន ( Washington ) នៅវេលាម៉ោង៥ និង៤៥នាទីល្ងាច ម៉ោងនៅអាឡាស្កា ខណៈដែល ប្រធានាធិបតីរុស្សី លោក វ៉ា្លឌីមៀរ ពូទីន ត្រូវបានក្រសួងការបរទេសរុស្ស៊ីផ្សព្វផ្សាយនៅមុននេះបន្តិចថា បានចាកចេញពីទឹកដីអាឡាស្កា មុនទៅហើយ បន្ទាប់ពីមេដឹកនាំទាំងពីរថ្លែងនៅសន្និសីទប្រាប់អ្នកយកព័ត៌មាន ដោយមិនទទួលសំណួរសូម្បីតែមួយពីអ្នកសារព័ត៌មាន។

លោក ពូទីន និង លោក ត្រាំ ថ្លែងក្រោយជំនួប នៅទីក្រុង Anchorage រដ្ឋ Alaska។ REUTERS

ប្រធានាធិបតីនៃប្រទេសមហាអំណាចទាំងពីរ បានជួបចរចាទល់មុខគ្នាជាលើកដំបូងដើម្បីបំបែកភាពទាល់ច្រក ចាប់តាំងពីខែមិថុនាឆ្នាំ២០២១នៅពេលដែលប្រធានាធិបតីរុស្ស៊ី លោក វ៉្លាឌីមៀរ ពូទីន បានជួបគ្នាចុងក្រោយជាមួយប្រធានាធិបតីសហរដ្ឋអាមេរិក លោក ចូ បៃដិន នៅទីក្រុងហ្សឺណែវនៅប្រទេសស្វ៊ីស។

ចាប់តាំងពីការលើកទ័ពចូលលុកលុយប្រទេសអ៊ុយក្រែនកាលពីខែកុម្ភៈឆ្នាំ២០២២ មេដឹកនាំនៃប្រទេសមហាអំណាចនុយក្លេអ៊ែរទាំងពីរ មើលមុខគ្នាលែងត្រង់ ដោយសារតែសហរដ្ឋអាមេរិកក្រោមការដឹកនាំរបស់លោក ចូ បៃដិន បានគាំទ្ររដ្ឋភិបាលរបស់លោក វ៉ូឡូឌីមៀរ ហ្សេលេនស្គី ដើម្បីប្រយុទ្ធតទល់ការឈ្លានពានរបស់រុស្ស៊ី ក្រោមការសម្រេចចិត្តរបស់លោក ពូទីន៕

រ៉ាន់ រើយ