ផ្ទុះអាវុធក្នុងក្លឹបនៅទីក្រុងញូវយ៉ក សហរដ្ឋអាមេរិក​ ស្លាប់និងរបួសមនុស្សជាច្រើននាក់

យោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១៨ខែសីហា ការបាញ់ប្រហារក្នុងក្លឹបមួយក្នុងទីក្រុង Brooklyn របស់ទីក្រុងញូវយ៉ក សហររដ្ឋអាមេរិកកាលពីព្រឹកថ្ងៃអាទិត្យ បានបណ្តាលឲ្យមនុស្ស ៣ នាក់ស្លាប់ និង ៩ នាក់ទៀតរងរបួស។

ប៉ូលិសបាននិយាយថា ការវាយប្រហារនេះមានជាប់ពាក់ព័ន្ធខ្មាន់កាំភ្លើងរហូតដល់ទៅ៤នាក់ ផ្តើមចេញពីជម្លោះវាយតប់គ្នាភ្លាមៗ នៅម៉ោង ៣:៣០ ទៀបភ្លឺ។ ក្រោយការបាញ់ប្រហារក្រុមអ្នកស៊ើបអង្កេតបានរកឃើញសំបកគ្រាប់ជាង ៤០សំបក និងអាវុធមួយដើមនៅជិតកន្លែងកើតហេតុ។ ជនរងគ្រោះមានចាប់ពីអាយុ ១៩ ឆ្នាំដល់ ៦១ ឆ្នាំ ដោយពីរនាក់បានស្លាប់នៅក្នុងមន្ទីរពេទ្យខណៈដែលជនរងគ្រោះអាយុ ១៩ ឆ្នាំម្នាក់ទៀតបានស្លាប់នៅក្នុងក្លឹប។

គួរបញ្ជាក់ថាការបាញ់ប្រហារនេះគឺជាការសម្លាប់រង្គាលលើកទីពីរនៅក្នុងទីក្រុងញូវយ៉កក្នុងរយៈពេលប៉ុន្មានសប្តាហ៍នេះ បន្ទាប់ពីការវាយប្រហារកាលពីខែកក្កដានៅទីក្រុង Manhattan ដែលបានបណ្តាលឲ្យមនុស្ស ៤ នាក់ស្លាប់ រួមទាំងមន្រ្តីប៉ូលិសម្នាក់ផងដែរ។ ស្របពេលឆ្នាំនេះការបាញ់ប្រហារនៅក្នុងទីក្រុងញូវយ៉កមានកម្រិតទាបបំផុត ប៉ូលិសថាសោកនាដកម្មទាំងនេះជំរុញឲ្យត្រូវតែមានវិធានការដកកាំភ្លើងខុសច្បាប់ចេញពីទីក្រុងជាបន្ទាន់។

មកដល់ពេលនេះប៉ូលិស​មិន​ទាន់​ចាប់ខ្លួន​បាន​ជនដៃដល់នៅឡើយ​ទេ ហើយ​កំពុង​សាកសួរសាក្សី​ដើម្បី​ទទួល​ព័ត៌មាន ខណៈ​ការស៊ើបអង្កេត​កំពុងបន្ត​៕

អត្ថបទ៖ ប៊ុន សុភាព