លោក ត្រាំ រៀបចំ​កិច្ចប្រជុំ​ពិសេស​ស្ដីពី​ហ្គាហ្សា រំពឹងថាសង្រ្គាមនឹងដោះស្រាយបាន​នៅចុងឆ្នាំ

បេសកជនពិសេសរបស់សហរដ្ឋអាមេរិក លោក Steve Witkoff បានប្រកាសថា លោកប្រធានាធិបតី ដូណាល់ ត្រាំ នឹងធ្វើជាប្រធានកិច្ចប្រជុំកម្រិតខ្ពស់ស្តីពីតំបន់​ហ្គាហ្សានៅសេតវិមាន​នា​ថ្ងៃ​ពុធ​ទី​២៧​ខែ​សីហា​ឆ្នាំ​២០២៥​នេះ ដើម្បីពិភាក្សាអំពីផែនការ«ថ្ងៃទៅ​មុខ»សម្រាប់​ទឹកដី​ដែល​កំពុង​រង​គ្រោះ​ព្រោះ​សង្គ្រាម។

រដ្ឋាភិបាល​អាមេរិក បានបង្ហាញទំនុកចិត្តថា សង្រ្គាមរវាងអ៊ីស្រាអែល និងក្រុមហាម៉ាស នឹងត្រូវបានដោះស្រាយ​នៅ​មុនដំណាច់ឆ្នាំនេះ។ កិច្ចប្រជុំនេះ ធ្វើ​ឡើងរយៈពេល​​៧​ខែបន្ទាប់​ពី​លោក ត្រាំ ចូល​កាន់​តំណែង​ជាផ្លូវការ។ នៅ​អំឡុង​​យុទ្ធនាការឃោសនា​បោះឆ្នោត​ឆ្នាំ​មុន លោក ត្រាំ សន្យាថានឹងបញ្ចប់ជម្លោះយ៉ាងឆាប់រហ័ស ប៉ុន្តែ​មក​ទល់​នឹង​ពេល​នេះ​នៅតែមិនទាន់សម្រេច។ ខណៈពេលដែលអាណត្តិរបស់គាត់បានចាប់ផ្តើមជាមួយនឹងបទឈប់បាញ់រយៈពេល​២​ខែ សង្រ្គាមបានបន្ត ហើយវិបត្តិមនុស្សធម៌នៅហ្គាហ្សាកាន់តែអាក្រក់ខ្លាំង ជាមួយនឹងរូបភាពថ្មីៗនៃកុមារដែលស្រេក​ឃ្លានដែល​បានជំរុញ​ឲ្យ​មានការរិះគន់ជាសកលលើអ៊ីស្រាអែល។

លោក Witkoff បាននិយាយថា ទាំងអ៊ីស្រាអែល និងក្រុមហាម៉ាស បានបង្ហាញពីការបើកចំហក្នុងការបន្តការពិភាក្សាឆ្ពោះទៅរកដំណោះស្រាយមួយ។ សង្រ្គាមដែលបង្កឡើងដោយការវាយប្រហារនៅខែតុលា​ឆ្នាំ​២០២៣ របស់ក្រុមហាម៉ាសលើប្រទេសអ៊ីស្រាអែល បានបណ្តាល​ឲ្យ​មានអ្នកស្លាប់ជនជាតិប៉ាឡេស្ទីនជាង ៦២ ០០០​នាក់ ខណៈ​ការផ្លាស់ទីលំនៅកំពុង​កើន​ឡើង ហើយ​វិបត្តិស្រេក​ឃ្លាន​កាន់តែ​យ៉ាប់យ៉ឺន៕

ដោយ៖ ឈាង