ប្រធានគណៈកម្មការមួយរូប លាលែងតំណែង ព្រោះចង់ពាក់ព័ន្ធនឹងអតីតជំទាវទីមួយ

ប្រធានគណៈកម្មការអប់រំជាតិរបស់ប្រធានាធិបតីបានស្នើសុំលាលែងពីតំណែង ថ្ងៃចន្ទនេះតែម្ដង ចំពេលមានការស៊ើបអង្កេតរបស់ទីប្រឹក្សាពិសេសលើការចោទប្រកាន់ថា លោកស្រី Lee Bae-yong បានស៊ីសំណូកជាមួយអតីតជំទាវទីមួយ Kim Keon Hee ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Lee Bae-yong បាននិយាយនៅក្នុងសេចក្តីថ្លែងការណ៍មួយថា តាមពិតទៅ គាត់មានគម្រោងចុះចេញពីដំណែងនៅថ្ងៃតែមួយ ហើយសូមអភ័យទោសចំពោះស្ថានភាពបែបនេះបានកើតឡើង។ លោកស្រីក៏បានបញ្ចាក់ទៀតថា «ទាក់ទងនឹងការពិតនៃអ្វីដែលបានរាយការណ៍នៅក្នុងសារព័ត៌មាន ខ្ញុំនឹងពន្យល់ដោយស្មោះត្រង់នៅក្នុងដំណើរការស៊ើបអង្កេតមួយនេះ»។

យ៉ាងណា កាលពីសប្តាហ៍មុន ក្រុមទីប្រឹក្សាពិសេស Min Joong-ki ដែលមានភារកិច្ចស៊ើបអង្កេតការចោទប្រកាន់អំពើពុករលួយផ្សេងៗជុំវិញអតីតស្ត្រីទីមួយនោះ បានឆ្មក់ចូលផ្ទះរបស់លោកស្រីភ្លាមៗ។

ការវាយឆ្មក់ធ្វើឡើង បន្ទាប់ពីក្រុមនេះត្រូវបានគេរាយការណ៍ថា បានរកឃើញអណ្តើកមាសមួយ និងសំបុត្រដែលទំនងជាបានសរសេរទៅកាន់អតីតប្រធានាធិបតីលោក Yoon Suk Yeol និងភរិយារបស់គាត់គឺលោកស្រី Kim ក្នុងអំឡុងពេលការវាយឆ្មក់ដាច់ដោយឡែកមួយសំដៅទៅលើម្តាយរបស់អតីតស្ត្រីទីមួយ។

ក្រុមនេះសង្ស័យថា អណ្តើកនេះត្រូវបានផ្តល់ជាអំណោយដល់លោកស្រី Kim ជាថ្នូរនឹងការតែងតាំងលោកស្រី Lee Bae-yong ជាប្រធានគណៈកម្មាការដំបូងនៅក្នុងខែកញ្ញា ឆ្នាំ ២០២២។ ក្រោយមក ទើបអាណត្តិរបស់លោកស្រីដំណើរការរហូតដល់ចុងខែនេះ៕

អត្ថបទ៖ សាង ស្រីល័ក្ខ

ចុចអាន៖អតីត​ជំទាវ​ទី​១កូរ៉េ សុំ​ទោស​ជា​សាធារណៈ ​ក្រោយ​​ចោទ​ប្រកាន់សូកប៉ាន់​ និងពុករលួយ