ពូទីន គំរាមបាញ់កម្ទេចទ័ពបរទេស បើឃើញនៅ អ៊ុយក្រែន

ឆ្លើយតបទៅលោក Macron, មេដឹកនាំវិមានក្រឹមឡាំង វ្ល៉ាឌីមៀរ ពូទីន បានគំរាមខ្លាំងៗថា វត្តមានកងទ័ពបរទេសនៅអ៊ុយក្រែន នឹងក្លាយជាគោលដៅស្របច្បាប់របស់រុស្ស៊ី ក្នុងការបាញ់កម្ទេច។ នេះបើតាមការផ្សាយរបស់ Sky News នៅថ្ងៃសុក្រទី៥ខែកញ្ញាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងចេញពីវេទិកាសេដ្ឋកិច្ចបូព៌ាក្នុងទីក្រុង វ្ល៉ាឌីវ៉ូស្តុក, ប្រធានាធិបតីរុស្ស៊ី បញ្ជាក់ថា លោកពូទីនបាននិយាយថា «ប្រសិនបើកងទ័ពណា លេចមុខនៅទីនោះ (អ៊ុយក្រែន) ជាពិសេសក្នុងអំឡុងពេលប្រតិបត្តិការយោធា ពិតណាស់ ពួកគេនឹងក្លាយជាគោលដៅស្របច្បាប់សម្រាប់ការបាញ់កម្ទេច។ គ្មានហេតុផលអ្វីដែលកងទ័ពបរទេស ត្រូវដាក់ពង្រាយនៅអ៊ុយក្រែនទេ ប្រសិនបើមានសន្តិភាពហើយនោះ។ យើងនឹងគោរពតាមកិច្ចព្រមព្រៀងដែលបញ្ចប់សង្គ្រាម»។

ការគំរាមរបស់លោកពូទីន កើតឡើងបន្ទាប់ពីប្រធានាធិបតីបារាំង Emmanuel Macron បញ្ជាក់ក្រោយកិច្ចប្រជុំកំពូល «ក្រុមចម្រុះឆន្ទៈ» នៅវិមានអេលីសេ ក្នុងទីក្រុងប៉ារីស កាលពីថ្ងៃព្រហស្បតិ៍ទី៤ខែកញ្ញាឆ្នាំ២០២៥ ថា មានប្រទេសចំនួន២៦ បានឯកភាពបញ្ជូនទ័ពទៅអ៊ុយក្រែន ក្រោយពេលប្រទេសនេះមានបទឈប់បាញ់ជាមួយរុស្ស៊ី។

តាមការផ្សាយរបស់ BBC, លោក Macron អះអាងថា ទ័ពទាំងនោះនឹងត្រូវដាក់ពង្រាយតាមជើងគោក អាកាសនិងជើងទឹក ដើម្បីធានាសន្តិសុខជូនអ៊ុយក្រែន ក្រោយសង្គ្រាម។

ទោះបីជាយ៉ាងណាក៏ដោយ លោក Macron មិនបញ្ចេញឈ្មោះប្រទេសទាំង២៦នោះជាសាធារណៈទេ គ្រាន់តែបង្ហើបថា សហរដ្ឋអាមេរិក នឹងមិនបញ្ជូនទ័ពជើងគោកទេ ប៉ុន្តែនឹងរួមចំណែកគាំទ្រផ្នែកអាកាស ចែករំលែកការណ៍សម្ងាត់ និងដើរតួជាអ្នកសម្របសម្រួល។

ទន្ទឹមនោះ ប្រធានាធិបតីបារាំងក៏សង្កត់ធ្ងន់ដែរថា កងកម្លាំងនេះមិនមែនចង់ប្រឈមមុខជាមួយរុស្ស៊ីឡើយ ពោលគឺគ្រាន់តែទប់ស្កាត់ការវាយលុកនាពេលអនាគត ក្រោយបទឈប់បាញ់ប៉ុណ្ណោះ  ហើយក៏មិនដាក់ពង្រាយនៅជួរមុខដែរ៕

អត្ថបទ៖ សុខ សុវណ្ណ

ចុចអាន៖ Macron បញ្ជាក់ថា ២៦ប្រទេស ឯកភាពបញ្ជូនទ័ពទៅអ៊ុយក្រែន ក្រោយបទឈប់បាញ់