ក្រុមអ្នកគាំទ្រអាវក្រហមប្រមូលផ្តុំគ្នាញាំអាហារនៅក្រៅពន្ធនាគារ ដើម្បីបង្ហាញក្ដីស្រឡាញ់ដល់ថាក់ស៊ីន

យោងតាមការចេញផ្សាយរបស់សារព័ត៌មាន Khaosod កាលថ្ងៃទី ២០ ខែកញ្ញា ឆ្នាំ ២០២៥ អ្នកគាំទ្រក្រុមអាវក្រហមបានប្រមូលផ្តុំគ្នានៅខាងក្រៅពន្ធនាគារ Klong Prem ក្នុងទីក្រុងបាងកក ប្រទេសថៃ ដើម្បីបង្ហាញការគាំទ្រនិងក្ដីស្រឡាញ់ដល់អតីតនាយករដ្ឋមន្ត្រីថាក់ស៊ីន ស៊ីណាវ៉ាត្រ ដែលបច្ចុប្បន្នកំពុងជាប់ពន្ធនាគារ។

ក្រុមនេះដឹកនាំដោយ Niyom Nopparat ឬហៅកាត់ថា Kae Samthuis បានប្រារព្ធកម្មវិធីអាហារសាមគ្គីនៅខាងក្រោះពន្ធនាគារថាក់ស៊ីន ដោយចែករំលែកបាយដំណើប និងផឹកភេសជ្ជៈពណ៌ក្រហមដើម្បីបង្ហាញពីការគាំទ្រ។ ពួកគេបានសម្តែងការព្រួយបារម្ភអំពីអ្វីដែលពួកគេមើលឃើញថាអយុត្តិធម៌នៅក្នុងប្រព័ន្ធច្បាប់របស់ប្រទេសថៃ ហើយបានសរសើរគោលនយោបាយរបស់លោកថាក់ស៊ីន ដូចជាការថែទាំសុខភាពជាទូទៅ និងលំនៅដ្ឋានតម្លៃសមរម្យ ដែលបានជួយមនុស្សរាប់លាននាក់។

ជាមួយគ្នានេះ អតីតសមាជិកសភា លោក Worachai Hema បានសង្កត់ធ្ងន់លើសារៈសំខាន់នៃការគាំទ្រខាងសីលធម៌សម្រាប់អ្នកទោស ដោយបញ្ជាក់ថា ការលើកទឹកចិត្តជួយអ្នកទោសមានអារម្មណ៍ថាមានទំនាក់ទំនងជាមួយពិភពខាងក្រៅ។ អ្នករៀបចំក៏បានសង្កត់ធ្ងន់ថា ព្រឹត្តិការណ៍នេះធ្វើឡើងដោយស្ម័គ្រចិត្ត ស្របច្បាប់ និងគោរពសេចក្តីសម្រេចរបស់តុលាការ ដោយមានវត្តមាននគរបាល និងបុគ្គលិកសម្របសម្រួល ដើម្បីរក្សាសណ្តាប់ធ្នាប់។ ការ​ជួបជុំ​នេះ​មាន​គោល​បំណង​ជា​និមិត្តរូប​នៃ​ការ​រួបរួម បង្ហាញ​សេចក្តី​ស្រឡាញ់​ចំពោះ​លោក ថាក់ស៊ីន និង​អំពាវនាវ​ឲ្យ​មាន​យុត្តិធម៌ និង​លទ្ធិប្រជាធិបតេយ្យ​នៅ​ប្រទេស​ថៃ។

គួរបញ្ជាក់ថាលោកថាក់ស៊ីន ស៊ីណាវ៉ាត្រា កំពុងជាប់ពន្ធនាគារ ដោយសារតែតុលាការបានរកឃើញថា លោកមានទោសពីបទពុករលួយ និងរំលោភអំណាចក្នុងពេលធ្វើជានាយករដ្ឋមន្ត្រី។ លោកបាន​គេច​ពី​ពន្ធនាគារ​ដោយ​រស់នៅ​បរទេស ប៉ុន្តែ​ក្រោយ​ត្រឡប់​មក​ប្រទេស​ថៃ​វិញ លោក​ត្រូវ​បាន​គេ​បញ្ជូន​ទៅ​កាត់ទោស ហើយបច្ចុប្បន្នកំពុងត្រូវបានឃុំនៅក្នុងពន្ធនាគារ Klong Prem ក្នុងទីក្រុងបាងកក សម្រាប់រយៈពេល១ឆ្នាំ៕

អត្ថបទ៖ ប៊ុន សុភាព

អត្ថបទ៖ ប៊ុន សុភាព