ថៃ មានមនុស្សស្លាប់២២នាក់ហើយ ដោយសារគ្រោះទឹកជំនន់ ដ៏សាហាវ

ត្រឹម៣ខែចុងក្រោយនេះ ប្រទេសថៃត្រូវវាយប្រហារធ្ងន់ធ្ងរណាស់ដោយគ្រោះធម្មជាតិជាពិសេសខ្យល់ព្យុះដែលបណ្តាលឲ្យមានទឹកជំនន់និងបំណាក់ដីដ៏សាហាវនៅទូទាំងប្រទេស ខណៈបើយោងតាមរបាយការណ៍ចុងក្រោយបំផុត គិតត្រឹមព្រឹកថ្ងៃអង្គារទី៧ខែតុលាឆ្នាំ២០២៥ តួលេខមនុស្សស្លាប់ដោយទឹកជំនន់ បានកើនដល់២២នាក់ហើយ។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈរបាយការណ៍ពីនាយកដ្ឋានបង្ការនិងកាត់បន្ថយគ្រោះមហន្តរាយថៃ និងត្រូវបានផ្សាយបន្តដោយសារព័ត៌មាន Bangkok Post, ខេត្ត-ក្រុងចំនួន១៩គឺត្រូវវាយប្រហារខ្លាំងបំផុត ​ហើយក្នុងនោះមាន២ខេត្តគឺ Uttaradit និង Ayutthaya បូករួមជាមួយទីក្រុងបាងកក ដែលត្រូវរងទុក្ខធ្ងន់ធ្ងរជាងគេ។

យ៉ាងណាក្តី មានការព្យាករថា ជនរងគ្រោះអាចកើនឡើងជាបន្តទៀត ព្រោះថៃ មិនទាន់អស់ព្យុះបោកបក់លើទេ ជាពិសេសបច្ចុប្បន្ន ព្យុះដែលកំពុងគំរាមកំហែងប្រទេសនេះគឺព្យុះ ម៉ាតម៉ូ។

តាមការព្យាករ ព្យុះ​ ម៉ាតម៉ូ នឹងបង្អុរទឹកភ្លៀងយ៉ាងច្រើនលើសលប់ ដាក់បន្ទុកបន្ថែមទៀតដល់ទឹកទន្លេនិងអាងស្តុកនានានៅប្រទេសថៃ ដែលបានឈានដល់កម្រិតគ្រោះថ្នាក់រួចទៅហើយ។ 

មុននេះ ថៃព្រមានថា បើភ្លៀងនៅតែបន្តធ្លាក់ខ្លាំង ទំនប់ Bhumibol នឹងទប់លែងឈ្នះ ហើយមានតែការបញ្ចេញទឹកបន្ថែមប៉ុណ្ណោះទើបអាចគ្រប់គ្រងស្ថានការណ៍បាន បើមិនដូច្នោះ នឹងមានមានអាសន្នធំជាក់ជាមិនខានឡើយ។

ទំនប់ស្ថិតក្នុងខេត្ត Tak មួយនេះ បានស្តុកទឹកដល់កម្រិត៩០%ទៅហើយនៃសមត្ថភាពរបស់ខ្លួន ដូច្នេះមានន័យថា បើភ្លៀងនៅតែបន្តធ្លាក់ខ្លាំងនិងគ្មានវិធានការបញ្ចេញជាបន្ទាន់ទេនោះ វាប្រឈមនឹងការបាក់ធ្លាយហើយ។

មិនមែនតែទំនប់នេះទេ សូម្បីទំនប់ Sirikit ក្នុងខេត្ត Uttaradit ក៏ជិតទប់លែងឈ្នះដែរ ពោលគឺវាស្តុកទឹកដល់ ៩៦,៣៦% ទៅហើយ៕

អត្ថបទ៖ សុខ សុវណ្ណ

ចុចអាន៖ ថៃប្រឈមអាសន្ន ព្រោះបើភ្លៀងនៅតែបន្តធ្លាក់ខ្លាំង ទំនប់ធំៗនឹងទប់លែងជាប់