ថៃប្រឈមអាសន្ន ព្រោះបើភ្លៀងនៅតែបន្តធ្លាក់ខ្លាំង ទំនប់ធំៗនឹងទប់លែងជាប់

ពីមួយថ្ងៃទៅមួយថ្ងៃ គ្រោះធម្មជាតិនៅប្រទេសថៃកាន់តែធ្ងន់ធ្ងរទៅៗ ឈានដល់ធ្វើឲ្យទំនប់ Bhumibol រងបន្ទុកខ្លាំងសឹងទប់លែងឈ្នះ ហើយមានតែការបញ្ចេញទឹកបន្ថែមប៉ុណ្ណោះទើបអាចគ្រប់គ្រងស្ថានការណ៍បាន បើមិនដូច្នោះ នឹងមានមានអាសន្នធំជាក់ជាមិនខានឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Bangkok Post នៅថ្ងៃចន្ទទី៦ខែតុលាឆ្នាំ២០២៥, បច្ចុប្បន្ន ទំនប់ស្ថិតក្នុងខេត្ត Tak មួយនេះ បានស្តុកទឹកដល់កម្រិត៩០%ទៅហើយនៃសមត្ថភាពរបស់ខ្លួន ដូច្នេះមានន័យថា បើភ្លៀងនៅតែបន្តធ្លាក់ខ្លាំងនិងគ្មានវិធានការបញ្ចេញជាបន្ទាន់ទេនោះ វាប្រឈមនឹងការបាក់ធ្លាយហើយ។

យ៉ាងណាមិញ ការទម្លាយច្បាស់ជាបណ្តាលឲ្យខេត្តស្ថិតនៅតាមខ្សែទឹកខាងក្រោមត្រូវជន់លិចធ្ងន់ធ្ងរ ប៉ុន្តែគ្មានជម្រើសផ្សេងឡើយ។

យោងតាមអាជ្ញាធរអគ្គិសនីថៃ (Egat), ត្រឹម២៤ម៉ោងចុងក្រោយ ទំនប់នេះមានទឹកចូលរហូតដល់ ៩២.១៤លានម៉ែត្រគូបទៅហើយ ដែលភាគច្រើនគឺដោយសារភ្លៀងធ្លាក់ខ្លាំងក្នុងខេត្ត ឈៀងម៉ៃ ធ្វើឲ្យបរិមាណទឹកសរុបក្នុងទំនប់ កើនដល់ជាង ១២ពាន់លានម៉ែត្រគូប ស្មើនឹង៩០%នៃសមត្ថភាពស្តុកសរុប។

មិនមែនតែទំនប់នេះទេ សូម្បីទំនប់ Sirikit ក្នុងខេត្ត Uttaradit ក៏ជិតទប់លែងឈ្នះដែរ ពោលគឺវាស្តុកទឹកដល់ ៩៦,៣៦% ទៅហើយ។

អាជ្ញាធរមានផែនការរួចទៅហើយ ដើម្បីបញ្ចេញទឹក៣៥លានម៉ែត្រគូបប្រចាំថ្ងៃចូលទៅក្នុងទន្លេ Nan បើស្ថានការណ៍មិនស្រួល ហេតុនេះ គ្មានអ្វីត្រូវសង្ស័យឡើយ ខេត្តនៅក្រោមៗនឹងលិចលង់ធ្ងន់ធ្ងរជាក់ជាមិនខាន៕

អត្ថបទ៖ សុខ សុវណ្ណ

ចុចអាន៖ ទំនប់ធំ២របស់ថៃ ជិតទប់លែងឈ្នះ ព្រោះព្យុះប៊ូឡូយ  នៅតែជះឥទ្ធិពលខ្លាំង