ឈ្វេងយល់ពីជំងឺដុំសាច់ក្នុងពោះវៀនធំ និងវិធីជួយកាត់បន្ថយការដុះដុំសាច់ក្នុងពោះវៀនធំ

ពោះវៀនធំ គឺជាផ្នែកមួយដ៏សំខាន់នៃប្រព័ន្ធរំលាយអាហារ ដែលជាបំពង់មួយតភ្ជាប់ពីពោះវៀនតូចទៅដល់រន្ធគូថ។ វាមានតួនាទីស្រូបយកទឹក និងសារធាតុរ៉ែដែលនៅសល់ពីកាកសំណល់អាហារ បម្លែងវាទៅជាលាមក ហើយបញ្ជូនចេញពីរាងកាយ។ យ៉ាងណាមិញ មនុស្សមួយចំនួនហាក់មិនបានចាប់អារម្មណ៍ ឬខ្វល់ខ្វាយអំពីបញ្ហាសុខភាពពោះវៀនធំនោះទេ ​ដូច្នេះថ្ងៃនេះ កម្ពុជាថ្មី នឹងនាំលោកអ្នកមកឈ្វេងយល់អំពី ជំងឺដុំសាច់ក្នុងពោះវៀនធំ និងវិធីជួយកាត់បន្ថយការដុះដុំសាច់ក្នុងពោះវៀនធំ។

បើតាមប្រភពពីមន្ទីរពេទ្យព្រះអង្គឌួង ជំងឺដុំសាច់ក្នុងពោះរៀនធំ គឺជាសកម្មភាពមួយដែលអ្នកជំងឺមានដុះដុំសាច់នៅលើជញ្ជាំងខាងក្នុងនៃពោះវៀនធំ ហើយដុំសាច់ទាំងនោះអាចជាដុំសាច់ស្លូត ឬអាចជាដុំសាច់មហារីក។

នៅពេលដែលលោកអ្នកចេញរោគសញ្ញា ដូចជាឈឺចុកពោះ / រាក / ទល់លាមករ៉ាំរ៉ៃ ដែលមិនអាចមកស្រាយបាន ឬបន្ទោបង់មានឈាម ស្រកទម្ងន់ ឬបាត់បង់គ្រាប់ឈាមដោយមិនសមហេតុផល ត្រូវទៅទទួលការឆ្លុះពោះវៀនធំជាបន្ទាន់។

ប្រភពដដែល បានបញ្ជាក់ថា ការឆ្លុះពោះវៀនធំ មិនបណ្តាលឱ្យមានគ្រោះថ្នាក់ដល់អ្នកជំងឺឡើយ ហើយថែមទាំងអាចឱ្យអ្នកជំងឺទទួលបានការធ្វើរោគវិនិច្ឆ័យទាន់ពេល និងការព្យាបាលដ៏មានប្រសិទ្ធភាព មុនពេលវាបង្កបញ្ហាសុខភាពធ្ងន់ធ្ងរ។

សម្រាប់វិធីដែលអាចជួយកាត់បន្ថយការដុះដុំសាច់ក្នុងពោះវៀនធំ ត្រូវថែរាង/រក្សាទម្ងន់ខ្លួន ឬសម្រកទម្ងន់សន្សឹមៗចំពោះអ្នកធាត់,​ ហាត់ប្រាណទៀងទាត់ជាប្រចាំរៀងរាល់ថ្ងៃ, បរិភោគបន្លែ ផ្លែឈើឱ្យបានច្រើន, កាត់បន្ថយការបរិភោគសាច់ អាហារផ្អាប់ ប្រៃ ផ្អែម និង/ឬប្រេងខ្លាញ់ច្រើន, ទទួលការឆ្លុះពោះវៀនតាមវ័យកំណត់ និងពេលមានរោគសញ្ញាដូចបានជំរាបខាងលើ។

ដើម្បីទទួលបាននូវគុណភាព និងសុវត្ថិភាពនៃការព្យាបាលបញ្ហាខាងលើ សូមទៅពិគ្រោះ ពិនិត្យ និងព្យាបាលជាមួយវេជ្ជបណ្ឌិតឯកទេស៕