សុខភាព

មូលហេតុចម្បង ២ ដែលអាចឲ្យមានដំបៅក្រពះ!

បានផុស

៣ years មុន

នៅ

ថ្ងៃអង្គារ ១២ តុលា ២០២១

ដោយ

ជំងឺដំបៅក្រពះ ជាជំងឺនៃការបាត់នូវស្រទាប់កោសិកានៃក្រពះ។ វាបណ្ដាលមកពីការបាត់លំនឹងនៃស្រទាប់ការពារនៃក្រពះ និងការបញ្ចេញនូវអាស៊ីតក្រពះ។ ជំងឺនេះអាចធ្វើឲ្យអ្នកជំងឺសម្រាកពេទ្យ មិនអាចធ្វើការងារបាន និងអាចធ្វើឲ្យបាត់បង់អាយុជីវិត។ ការស្វែងយល់ពីជំងឺនេះ អាចជួយអោយយើងទប់ស្កាត់នូវផលវិបាកនៃជំងឺដំបៅក្រពះ ។

Peptic Ulcer Disease Drug Pipeline: What You Need to Know

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក) មូលហេតុចម្បង ២ ដែលអាចឲ្យមានដំបៅក្រពះ៖

១) មេរោគក្រពះ (មេរោគ Helicobater Pylori):

មានច្រើនទៅលើប្រទេសក្រីក្រ និងប្រទេសកំពុងអភិវឌ្ឍ ដោយប្រទេសទាំងនេះ ភាពមានអនាម័យនៅមានកម្រិតនៅឡើយ ដែលអាចឆ្លងមេរោគពីមនុស្សម្នាក់ទៅមនុស្សម្នាក់បាន។ ពេលដែលអ្នកជំងឺបរិភោគអាហារដែលមានមេរោគនេះចូលទៅក្នុងក្រពះ មេរោគនោះនឹងទំនៅលើកោសិកាក្រពះ បន្ទាប់មកវាធ្វើឲ្យមានការបញ្ចេញនូវអាស៊ីតក្រពះជាច្រើន និងធ្វើឲ្យមានការរលាកក្រពះ ដែលយូរៗទៅធ្វើឲ្យមានជាដំបៅក្រពះ។ បើមិនមានការព្យាបាលអោយបានត្រឹមត្រូវទេនោះ វាអាចបង្កឲ្យមានជំងឺមហារីកក្រពះ។

Gastric Ulcer,Peptic Ulcer Treatment in Tiruppur - Iswarya Siddha Hospital, Tiruppur

២) ថ្នាំឈឺសន្លាក់:

ការប្រើថ្នាំឈឺសន្លាក់ដោយមិនមានវេជ្ជបញ្ជាត្រឹមត្រូវ អាចធ្វើឲ្យមានបញ្ហាដំបៅក្រពះព្រោះថ្នាំនេះធ្វើឲ្យស្រទាប់ការពារកោសិកាក្រពះថយចុះ ដែលអាចឲ្យអាស៊ីតក្រពះបំផ្លាញនូវស្រទាប់កោសិការបស់ក្រពះ។ បើអ្នកជំងឺដំបៅក្រពះនៅតែបន្តប្រើថ្នាំនេះទៀត នឹងអាចធ្វើឲ្យមានការហូរឈាមក្រពះ ឬធ្លាយក្រពះដែលអាចធ្វើឲ្យអ្នកជំងឺបាត់បង់ជីវិត បើមិនបានព្យាបាលឲ្យបានត្រឹមត្រូវ។

ខ) រោគសញ្ញា៖

ជាទូទៅជំងឺនេះស្តែងចេញនូវអាការៈដូចខាងក្រោមៈ

– ឈឺចាប់ពោះផ្នែកចុងដង្ហើម ឬផ្នែកខាងស្តាំខាងលើ

– ឈឺចាប់នៅផ្នែកខាងខ្នង ឬបោះដៃផុត

– ឈឺនៅពេលឃ្លាន ហើយថយការឈឺចាប់ពេលទទួលទានអាហាររួចហើយ

– អាចមានការក្អួតចង្អោរ

– មានអារម្មណ៍ថាពិបាកក្នុងការរំលាយអាហារ

អ្នកជំងឺអាចមានមេរោគសញ្ញា ឬគ្មានរោគសញ្ញា ជួនកាលអ្នកជំងឺអាចដឹងថាមានបញ្ហាដំបៅក្រពះដោយសារមានផលវិបាកដូចជា ការហូរឈាម ឬការធ្លាយក្រពះ ។

Stomach and Duodenal Ulcers (Peptic Ulcers) | Johns Hopkins Medicine

គ) ការធ្វើរោគវិនិច្ឆ័យ៖

ការឆ្លុះក្រពះ (Gastroscopy) ជាវិធីដ៏ល្អក្នុងការធ្វើរោគវិនិច្ឆ័យជំងឺដំបៅក្រពះ ហើយអាចច្រឹបយកបំនែកតូចនៃកោសិកាត្រង់ដំបៅក្រពះ ឬកោសិកាល្អដើម្បីធ្វើការវិភាគកោសិកានោះ ថាជាដំបៅក្រពះធម្មតា ឬដំបៅមហារីក ហើយអាចរកមេរោគក្រពះទៀតបានដោយមិនមានគ្រោះថ្នាក់អ្វីនោះទេ។ អ្នកជំងឺអាចធ្វើការឆ្លុះក្រពះ ដោយមិនដាក់ថ្នាំសណ្តំ ឬដាក់ថ្នាំសណ្តំ ។

ឃ) ផលវិបាកនៃជំងឺដំបៅក្រពះ មាន ២ ធំៗ៖

– ការហូរឈាមក្រពះ: ស្តែងឡើងដោយមានការក្អួតឈាម, បន្ទោបង់លាមកមានឈាមខ្មៅស្លេកស្លាំង វិលមុខ ។ល។ ក្នុងករណីនេះ អ្នកជំងឺត្រូវបញ្ជូនមកមន្ទីរពេទ្យជាបន្ទាន់ ដើម្បីឃាត់ឈាមដែលហូរ តាមរយៈការឆ្លុះក្រពះ ហើយប្រើថ្នាំ និងបញ្ចូលឈាមឲ្យបានត្រឹមត្រូវ។

– ការធ្លាយក្រពះ៖ អ្នកជំងឺមានអាការៈដូចជា ឈឺចាប់ខ្លាំង អត់ផោម អត់បន្ទោបង់ ពេលស្ទាបពោះមានសភាពរឹងដូចឈើ។ អ្នកជំងឺត្រូវមកមន្ទីរពេទ្យជាបន្ទាន់ ដើម្បីធ្វើរោគវិនិច្ឆ័យឲ្យបានត្រឹមត្រូវជាមុន នឹងធ្វើការវះកាត់ជាបន្ទាន់ ព្រោះអ្នកជំងឺអាចស្លាប់ភ្លាមៗ បើមិនបានព្យាបាលឲ្យបានត្រឹមត្រូវ និងទាន់ពេលវេលានោះទេ។

Gastric and Duodenal Ulcers: How to Tell the Difference

«ក្រុមការងារថែទាំព្យាបាលឯកទេសផ្នែកក្រពះ ថ្លើម និងពោះវៀននៃមន្ទីរពេទ្យកាល់ម៉ែតសំណូមពរលោក លោកស្រីមេត្តាយកចិត្តទុកដាក់ និងតាមដានសុខភាពរបស់លោកអ្នកជាប់ប្រចាំដោយអញ្ជើញមកពិគ្រោះយោបល់ជាមួយវេជ្ជបណ្ឌិតឯកទេសជំនាញកុំខាន ករណីមានរោគសញ្ញាខាងលើ។»

អត្ថបទ៖ រស្មី

Related Topics:ជំងឺក្រពះ