ផ្លែឈើ និងបន្លែ ៥ប្រភេទ សម្រាប់អ្នកមានបញ្ហាក្រពះមិនគួរមើលរំលង

មនុស្សគ្រប់រូបស្ទើរតែមានបញ្ហាក្រពះគ្រប់ៗគ្នា ព្រោះតែរបបអាហារផ្សេងៗ ការទទួលទានអាហារមិនត្រូវស្តង់ដារ មិនទៀងម៉ោង ដែលបណ្តាលមកពីកត្តាផ្សេងៗដូចជា ការបង្អត់អាហារ ដើម្បីសម្រកទម្ងន់ ឬ មិនបានទទួលទានអាហារពេលព្រឹក និងពេលល្ងាចជាដើម។

ទាំងអស់នេះហើយ សុទ្ធតែជាមូលហេតុដែលបណ្តាលឱ្យមានបញ្ហារលាកក្រពះផ្សេងៗ ប្រសិនជាមិនឆាប់រកមធ្យោបាយព្យាបាលទេ បញ្ហាក្រពះរបស់អ្នកនឹងកាន់តែមានភាពធ្ងន់ធ្ងរ។ តើអ្នកគួរបរិភោគផ្លែឈើ និងបន្លែប្រភេទណាខ្លះ ដើម្បីអាចជួយឱ្យបញ្ហាក្រពះមានភាពធូរស្រាលជាងមុន។​

ខាងក្រោមនេះ គឺជាផ្លែឈើ និងបន្លែ ៥មុខ ដែលអាចជួយសម្រួលដល់បញ្ហាក្រពះបានប្រសើរជាងមុន។

១.ខ្ញី

ខ្ញី ជាមើមរុក្ខជាតិ ដែលជួយប្រយោជន៍ជាច្រើនដល់សង្គមមនុស្ស វាក្លាយជាបន្លែសម្រាប់ធ្វើម្ហូប ហើយក៏ជាឱសថផ្សេងៗសម្រាប់ជួយព្យាបាលជំងឺបែបធម្មជាតិទៀតផង។ ខ្ញី ក៏ជួយដល់ជំងឺក្រពះផងដែរ ក៏ជួយទប់ស្កាត់កុំឱ្យមានអាការៈក្អួតចង្អោរខ្លាំង ព្រោះជាទូទៅ ជំងឺក្រពះ តែងតែមានអាការៈក្អួតចង្អោរនៅពេលព្រឹក។ មួយទៀត ខ្ញី ជួយឱ្យមានអាការៈស្រួលខ្លួនជាងមុន និងអារម្មណ៍ស្រស់ស្រាយ ប្រសិនជាអ្នកអាចបរិភោគទឹកខ្ញីបានជារៀងរាល់ព្រឹក។

២.ផ្លែល្ហុង

ផ្លែល្ហុង នឹងជួយដល់ការរំលាយអាហារ ផ្ទុកសារធាតុ papain ដែលជាអង់ស៊ីមដ៏មានឥទ្ធិពលក្នុងការបំបែកប្រូតេអ៊ីននៅក្នុងអាហារដែលអ្នកញ៉ាំ ធ្វើឱ្យងាយស្រួលក្នុងការរំលាយ។ ក្រៅពីជួយដល់ការរំលាយអាហារ ផ្លែល្ហុង ក៏ជួយដល់ការបន្ទោរបង់ល្អប្រសើរ និងអាការៈហើមពោះវៀនដល់មនុស្សពេញវ័យ។

៣.ចេកខ្ចី

ចេកខ្ចី​ត្រូវបានគេជឿថា ជួយព្យាបាលជំងឺក្រពះបានល្អប្រសើរ ព្រោះនៅក្នុងចេកខ្ចី មានផ្ទុកនូវសារធាតុ pectin ច្រើន​​ ដែលជាសារធាតុមួយជួយកាត់បន្ថយអាការៈរលាកក្រពះ និងកាត់បន្ថយការរាគរូស ក្អួតចង្អោរបានយ៉ាងមានប្រសិទ្ធភាព។ ចំពោះចេកខ្ចី មុននឹងទទួលទាន អ្នកអាចយកទៅស្ងផរឱ្យឆ្អិន រួចកិនលាយអំបិលបន្តិច ដើម្បីឱ្យមានរសជាតិ។

៤.ទឹកដូង

នៅក្នុងទឹកដូង​ មានផ្ទុកនូវសារធាតុ អេឡិចត្រូលីតច្រើន ដែលជួយឱ្យរាងកាយដែលបាត់បង់កម្លាំង និងខ្វះជាតិទឹករបស់អ្នក មានអាការៈល្អប្រសើរត្រឡប់មកវិញ។ ទឹកដូង ក៏មានផ្ទុកនូវសារធាតុប៉ូតាស្យូមខ្ពស់ ធ្វើឱ្យជាតិទឹកនៅក្នុងខ្លួន ដែលបានបាត់បង់មានភាពកើនឡើងផងដែរ។

៥.ផ្លែប័រ

ផ្លែប័រ គឺជាផ្លែឈើមួយប្រភេទ ដែលសម្បូរទៅដោយជាតិសរសៃ និងមានសារធាតុចិញ្ចឹមសំខាន់ៗ ដូចជាប៉ូតាស្យូម ដែលជួយឱ្យមុខងាររំលាយអាហារមានភាពល្អប្រសើរ។ ប៉ុន្តែ ទោះបីជាវាល្អចំពោះការរំលាយអាហារ ក៏អ្នកត្រូវបរិភោគផ្លែប័រ ក្នុងកម្រិតមធ្យម ទោះបីផ្លែប័រនេះ មានផ្ទុកនូវសារជាតិចិញ្ចឹមច្រើន តែវាក៏មានជាតិខ្លាញ់ខ្ពស់ផងដែរ។

សូមជម្រាប់ថា សម្រាប់អ្នកដែលមានបញ្ហាក្រពះធ្ងន់ធ្ងរ គួរប្រយ័ត្ន និងចៀសវាងប្រភេទអាហារ ឬ ផ្លែឈើ ដែលផ្ទុកនូសារធាតុអាស៊ីតខ្ពស់ ដូចជាផ្លែប៉េងប៉ោះ ផ្លែក្រូច ផ្លែម្នាស់ និងអាហារកែច្នៃជាដើម វានឹងធ្វើឱ្យអាការៈកាន់តែធ្ងន់ធ្ងរទៅៗ៕

ដោយ៖ អុន ស្រីមាន