សុខភាព

កុំលេងសើចជាមួយជំងឺហើមសួត វាអាចឆក់យកជីវិតអ្នកបាន ប្រសិនបើមិនប្រុងប្រយ័ត្ន

បានផុស

៥ years មុន

នៅ

ថ្ងៃអង្គារ ១៩ តុលា ២០២១

ដោយ

អ្នកជំងឺដែលមានរោគសញ្ញានៃការហើមសួតស្រួចស្រាវ តែងចូលមកផ្នែកសង្គ្រោះបន្ទាន់ជាញឹកញាប់ ដែលជាប្រភេទរោគសញ្ញាមួយធ្ងន់ធ្ងរអាចបណ្តាលឲ្យអ្នកជំងឺស្លាប់បាន។ ដូច្នេះការធ្វើរោគវិនិច្ឆ័យត្រូវធ្វើឲ្យបានឆាប់រហ័ស និងការព្យាបាលឲ្យមានប្រសិទ្ធិភាពខ្ពស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការហើមសួតស្រួចស្រាវ (ភាសាខ្មែរយើងជាទូទៅនិយាយថា ទឹកចូលសួត) គឺការមានដក់ទឹកនៅក្នុងសាច់សួតយើងដែលអាចកើតឡើងសន្សឹមៗ ឬកើតឡើងយ៉ាងគំហុកតែម្តង។

១) មូលហេតុ៖

ក. ហើមសួតស្រួចស្រាវបណ្តាលមកពីបេះដូង (Œdème pulmonaire cardiogénique ou hémodynamique) ដែលបណ្តាលឲ្យសម្ពាធឈាមក្នុងអាក់ទែពុលម៉ូណែឡើងខ្ពស់ ហើយឲ្យទឹកប្លាស្មាចេញពីសរសៃឈាមចូលក្នុងសាច់សួត។ ដែលមានមូលហេតុដូចជាៈ

– បេះដូងយើងកង្វះសមត្ថភាពរុញច្រានឈាមចេញពីបេះដូង (បេះដូងខាងឆ្វេង)

– បេះដូងយើងមានវិបត្តិចង្វាក់បេះដូង

– បេះដូងយើងមានជំងឺប្រឺសបេះដូង

– សម្ពាធឈាមឡើងខ្ពស់ភ្លាមៗ

Pulmonary Edema: Symptoms, Causes, and Treatment

ខ. ហើមសួតស្រួចស្រាវបណ្តាលមកពីដាច់ស្រទាប់ដែលខណ្ឌសរសៃឈាម និងសាច់សួត(Œdème pulmonaire lésionnel) ហើយបណ្តាលឲ្យទឹកប្លាស្មាចេញពីសរសៃឈាមចូលទៅក្នុងសាច់សួត។ ដែលមូលហេតុបណ្តាលមកពីៈ

– ជំងឺសួតដែលបណ្តាលមកពីពពួកបាក់តេរី ឬវីរុស

– ការបង្ករោគដោយជំងឺផ្សេងៗ ហើយបណ្តាលឲ្យសុក (Choc septique)

– ការហឺតចូលសួតនូវឧស្ម័ន ដែលមានជាតិពុល (Inhalation de gaz toxique)

– ការហៀរទឹកក្រពះចូលសួត (inhalation du liquide gastrique)

– ការប៉ះទង្គិចទៅលើសួតដោយមូលហេតុផ្សេងៗ

២) រោគសញ្ញា៖

– ហត់ដង្ហក់ចាប់ផ្តើមឡើងភ្លាមៗជាពិសេសនៅពេលយប់

– មុនការហត់ដង្ហក់ ចាប់ផ្តើមឡើងដោយរមាស់ក ក្អកខ្លាំងជាប់គ្នាអត់មានស្លេះ ហើយប្រហែល ២ ឬ ៣នាទី ក្រោយមកមានស្លេស មានពពុះសៗ ជួនកាលមានលាយឈាមប្រាៗទៀតផង

– មានលឺសំឡេងខ្សាវៗនៅក្នុងករបស់អ្នកជំងឺ (grésillement laryngé)

– អ្នកជំងឺឡេះឡះខ្លាំង បែកញើសត្រជាក់ ស្វាយបបូរមាត់ និងចុងដៃចុងជើង

– រោគសញ្ញាធ្ងន់ធ្ងរ៖

• ចង្វាក់ដង្ហើមខ្សោយហើយយឺត

• ឡើងស្វាយ ឬ ឡើងខ្ជឹងពេញខ្លួន

• អ្នកជំងឺមិនអាចនិយាយបាន ស្មារតីថយចុះ ឡេះឡះ

• សម្ពាធឈាមស៊ីស្តូលិចតិចជាង ១១០មីលីម៉ែត្របារ៉តរហូតដល់សុក

• ការប្រែប្រួលរោគសញ្ញាគ្លីនិកលឿន

៣) មធ្យោបាយការពារ៖

– ចំពោះអ្នកដែលមានជំងឺបេះដូង ដើម្បីបន្ថយហានិភ័យនៃការហើមសួត ត្រូវតមប្រៃ រក្សាលំនឹងសម្ពាធឈាម ព្យាបាលឲ្យបានឆាប់រហ័សរាល់មូលហេតុ ដែលធ្វើឲ្យជំងឺបេះដូងវិវត្តទៅជាធ្ងន់ធ្ងរ

– ត្រូវមានអនាម័យល្អក្នុងការរស់នៅ៖

• មិនពិសារបារី មិនពិសាគ្រឿងស្រវឹង ឬពិសាតិចតួច តាមដានទម្ងន់ខ្លួនឯង កម្រិតបរិមាណស្ករ និងខ្លាញ់ដែលបរិភោគប្រចាំថ្ងៃ

• ហាត់កីឡា ឬហាត់ប្រាណយ៉ាងតិចឲ្យបានម្តងក្នុងមួយសប្តាហ៍

« ប្រសិនបើមានរោគសញ្ញាដូចបានជម្រាបជូនខាងលើ និងដើម្បីបន្ថយហានិភ័យអាយុជីវិតនៃការហើមសួតស្រួចស្រាវ សូមអស់លោកអ្នកមកជួបពិគ្រោះ និងធ្វើរោគវិនិច្ឆ័យជាមួយគ្រូពេទ្យជំនាញឯកទេសនៅមន្ទីរពេទ្យកាល់ម៉ែត ឲ្យបានទាន់ពេលវេលា ដើម្បីទទួលបានការព្យាបាល ប្រកបដោយប្រសិទ្ធភាពខ្ពស់។»

អត្ថបទ៖ រស្មី

Related Topics:ជំងឺហើមសួត