WHO ព្រមានខ្លាំងៗថា វីរុសកូនកាត់ “ដែលតាក្រុង” ចាប់ផ្តើមរីករាលដាលហើយ (មានវីដេអូ)

ស្របពេលដែលពិភពលោកកំពុងផ្តោតខ្លាំងលើវិបត្តិសង្គ្រាមរុស្ស៊ី-អ៊ុយក្រែន ហើយហាក់ភ្លេចជំងឺកូវីដ១៩នោះ, ពេលនេះ អង្គការសុខភាពពិភពលោក (WHO) បានចេញការព្រមានថា វីរុសបំប្លែងខ្លួន “ដែលតាក្រុង” ដែលជាកូនកាត់រវាង ដែលតា និង អូមីក្រុង កំពុងចាប់ផ្តើមរីករាលដាលពាសពេញអឺរ៉ុបហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

WHO បាននិយាយក្នុងអំឡុងសន្និសីទខ្លីមួយកាលពីថ្ងៃពុធទី០៩ខែមីនាថា មេរោគនេះត្រូវបានគេរកឃើញថា កំពុងរីករាលដាលនៅក្នុងប្រទេសបារាំង ហូឡង់ និងដាណឺម៉ាក។

ពួកគេក៏បានរកឃើញចំនួន ២ករណី នៅក្នុងសហរដ្ឋអាមេរិកផងដែរ ហើយគ្រោងនឹងបោះពុម្ពរបាយការណ៍ស្តីពីការរកឃើញរបស់ពួកគេនាពេលខាងមុខ។

របាយការណ៍នេះក៏កើតឡើងផងដែរ ចំពេលដែលពិភពលោកឈានដល់ឆ្នាំទី២ នៃជំងឺរាតត្បាត ដោយនៅថ្ងៃសុក្រទី១១ខែមីនានេះ គឺជាថ្ងៃគម្រប់ខួបពីរឆ្នាំដែលអង្គការសុខភាពពិភពលោកប្រកាសថា កូវីដ១៩ជាជំងឺរាតត្បាតទូទាំងពិភពលោក។

WHO បានចេញការព្រមានខ្លាំងៗថា វីរុសបំប្លែងខ្លួនកូនកាត់ “ដែលតាក្រុង” អាចក្លាយជាបញ្ហាចម្បងទាំងនៅអឺរ៉ុប និងសហរដ្ឋអាមេរិក។

យ៉ាងណាក្តី ករណីសរុបនៃវីរុសកូនកាត់ “ដែលតាក្រុង” នៅតែមានកម្រិតទាបនៅឡើយ សូម្បីតែក្នុងប្រទេសដែលការរីករាលដាលពីមនុស្សម្នាក់ទៅមនុស្សម្នាក់ ត្រូវបានរកឃើញក៏ដោយ។

នៅសហរដ្ឋអាមេរិក វីរុសបំប្លែងខ្លួន អូមីក្រុង កំពុងវាយលុកខ្លាំង ដោយមេរោគទម្រង់ដើមរបស់ខ្លួនគឺ BA.1 បានរួមចំណែកប្រមាណ៨៨ភាគរយនៃករណីកូវីដទាំងអស់ ហើយវីរុសបំបាំងកាយ BA.2 មានចំនួន១២ភាគរយ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ WHO មិនទាន់ទទួលស្គាល់ Deltacron ជាវីរុសបំប្លែងខ្លួនថ្មីទេ