អ្នក​​ស្រាវ​​ជ្រាវ​​ជប៉ុន​​បង្កើត​​ចង្កឹះ​​អគ្គីសនី​​ដើម្បី​​ជួយ​បង្កើន​​ជាតិ​​ប្រៃ

អ្នក​ស្រាវ​ជ្រាវ​ជប៉ុន​បាន​បង្កើត​ចង្កឹះ​អគ្គីសនី​ដែល​​អាច​ជួយ​បង្កើន​រស​ជាតិ​ប្រៃ​​ដ៏​មាន​សក្កានុពល​ក្នុង​ការ​ជួយ​អ្នក​ដែលត្រូវ​ការ​កាត់​បន្ថយ​​សូដ្យូម​ក្នុង​របប​អាហារ​របស់​ពួក​គេ។

សហការ​ផលិត​ដោយ​សាស្ត្រាចារ្យ​នៅ​សាកល​វិទ្យាល័យ Meiji លោក​ Homei Miyashita និង​ក្រុម​ហ៊ុន​ផលិត​ភេសជ្ជៈ Kirin Holdings ឲ្យ​ដឹង​ថា ​​ចង្កឹះ​​​នេះ​ជួយ​បង្កើន​​រស​ជាតិ​ដោយ​ការ​ប្រើ​រំញោច​​អគ្គីសនី និង​កុំព្យួទ័រ​ខ្នាត​តូច​ដែល​មាន​ខ្សែ​ជាប់​គល់​ចង្កឹះ​ទាំង​គូ។

លោក Miyashita បាន​និយាយ​ថា ឧបករណ៍​នេះ​ប្រើចរន្ត​អគ្គីសនី​ខ្សោយ​ដើម្បី​​បញ្ជូន​អីយ៉ុង​សូដ្យូម​ពី​អាហារ ឆ្លង​​តាម​រយៈ​​ចង្កឹះ ចូល​ទៅ​ក្នុង​មាត់​ដែល​​ពួក​វា​អាច​បង្កើត​​ជីវ្ហាវិញ្ញាណ​ជាតិ​ប្រៃ។

«ជា​លទ្ធផល រស​ជាតិ​ប្រៃជួយ​បង្កើន​ចំនួន​ដល់​ទៅ​១.៥​ដង»។ លោក​បាន​បញ្ជាក់។

លោក Miyashita និង​មន្ទីរ​ពិសោធ​របស់​ខ្លួន​​បាន​​ព្យាយាម​ស្វែង​រកវិធី​សាស្ត្រ​ជា​ច្រើន​ដែល​បច្ចេកវិទ្យា​អាច​​ធ្វើ​អន្តរកម្ម​​ និង​ជំរុញ​បទ​ពិសោធ​នៃ​អារម្មណ៍​របស់​មនុស្ស។ លោក​ក៏​បាន​បង្កើត​អេក្រង់​ TV ដែល​អាច​​យក​តម្រាប់​តាម​​អាហារ​ផ្សេង​ៗ​ដែរ។

ចង្កឹះ​បង្កើន​រស​ជាតិ​ប្រហែល​ជា​មាន​ជាប់​ពាក់​ព័ន្ធ​ជា​ពិសេស​នៅ​ប្រទេស​ជប៉ុន​ដែល​មាន​​របប​អាហារ​​ប្រពៃណីចូល​ចិត្ត​រស​ជាតិ​ប្រៃ។ ជន​ជាតិ​ជប៉ុន​ពេញ​វ័យ​ជា​មធ្យម​ប្រើ​ប្រាស់​​អំបិល​ប្រហែល​ជា​១០​ក្រាម​​ក្នុង​មួយ​ថ្ងៃ ដែល​ស្មើ​នឹង​ពីរ​ដង​នៃ​ចំនួនស្តង់ដារ​ដែល​ណែនាំ​​ដោយ​អង្គការ​សុខភាព​ពិភព​លោក។

ការ​ទទួល​ទាន​សូដ្យូម​លើស​គឺ​ពាក់​ព័ន្ធ​នឹង​​ការ​កើន​ឡើង​នៃ​ជំងឺ​លើស​ឈាម ដាច់​សរសៃ​ឈាមខួរ​ក្បាល​ និងជំងឺ​ផ្សេង​ៗ​ទៀត។​

អ្នក​ស្រាវ​ជ្រាវ​នៅក្រុម​ហ៊ុន​ Kirin លោក Ai Sato​ បាន​និយាយ​ថា ៖«​ដើម្បី​ការពារ​ជំងឺ​ទាំង​នោះ យើង​ត្រូវ​ការ​កាត់​បន្ថយចំនួន​អំបិល​ដែល​យើង​ទទួល​ទាន។ ប្រសិន​បើ​យើង​​ទទួល​ទាន​អំបិល​តិច​តាម​វិធី​សាមញ្ញ យើង​នឹង​ពិបាក​​ក្នុង​ការ​បន្ថយ​អាហារ​ដែល​យើង​ចូល​ចិត្ត ឬ​ស៊ូទ្រាំ​ទទួល​ទាន​អាហារ​ខ្វះ​ជាតិ​ប្រៃ»។

លោក Miyashita និង Kirin កំពុងកែលម្អគំរូ​ចង្កឹះរបស់ពួកគាត់​ ហើយសង្ឃឹមថា នឹងធ្វើពាណិជ្ជកម្ម​​​​នៅដើមឆ្នាំក្រោយ៕

ប្រែ​សម្រួល៖ វីរបុត្រ
ប្រភព៖ Reuters