ពេលកូនតូចបៅទឹកដោះគោដប ប្រយ័ត្នរឿងមួយចំនួនបណ្តាលឱ្យបៅចូលតែខ្យល់ ធ្វើឱ្យហើមពោះ រលាកពោះវៀន

ពេលក្មេងបឺតដបទឹកដោះគោ ត្រូវមានទឹកដោះគោចូលក្នុងមាត់ បើចូលតែខ្យល់សុទ្ធ ឬលាយឡំខ្យល់ច្រើន ក៏អាចបណ្តាល​ឱ្យ​ក្មេងហើមពោះ និងរលាកពោះវៀនបានដែរ។ នេះបើតាមការឱ្យដឹងពី លោកវេជ្ជបណ្ឌិត ហ៊ាង រតនា ពេទ្យព្យាបាលជំងឺទូទៅ។

អ្នកមានកូនតូចភាគច្រើន តែងមើលរំលងកត្តាតូចៗ​មួយចំនួន ដែលបង្កទៅជាបញ្ហាផ្សេងៗ ហើយប៉ះពាល់ដល់សុខភាព បុត្រធីតា​របស់​ខ្លួន។ វេជ្ជបណ្ឌិតរូបនេះ បានលើកឡើងនូវសកម្មភាពមួយ ដែលអាណាព្យាបាលទាំងអស់ គប្បីត្រូវយកចិត្តទុកដាក់ គឺការដាក់ឱ្យកូនតូចបៅទឹកដោះគោដប ត្រូវមើលថាតើ ទឹកដោះនៅក្នុងដបមាននៅក្នុងផ្នែកក្បាលដោះ​ឬអត់។

មួយវិញទៀត បើសិនជាទឹកដោះនៅក្នុងដបអស់ ក៏មិនត្រូវទុកបន្តឱ្យក្មេងជញ្ជក់លេងដែរ ព្រោះបើធ្វើបែបនេះ អ្វីដែលក្មេងទទួលបាន គឺមានតែខ្យល់ប៉ុណ្ណោះ។ លោកវេជ្ជបណ្ឌិត បញ្ជាក់ថា ចំណុចដែលបានរៀបរាប់ខាងលើ អាចជាដើមហេតុធ្វើឱ្យក្មេងហើមពោះ និងរលាកពោះវៀន។

គួរបញ្ជាក់ថា ជាទូទៅ​ក្មេងតូច​ពេលបៅទឹកដោះគោ ច្រើនតែបិទភ្នែកគេង ប៉ុន្តែមាត់របស់គាត់គឺនៅតែជញ្ជក់ជាធម្មតា ដោយ​មិន​ខ្វល់ថា ដោយទឹកដោះឬអត់នោះទេ។ ដូច្នេះ គប្បីកុំបណ្តែតបណ្តោយកូនតូច ឱ្យបៅដបដែលគ្មានទឹកដោះ នៅក្បាលដប ឬមិនមានទឹកដោះនៅក្នុងដប ជៀសវាងបញ្ហាដូចដែលបានរៀបរាប់ខាងលើ៕

អត្ថបទ៖ សុធាវី