អ្នកជំនាញ លើកទឹកចិត្តពលរដ្ឋកម្ពុជាទទួលការព្យាបាលឱ្យទាន់ពេលវេលា ចំពោះជំងឺរលាកថ្លើមបេ និងសេ 

សម្ព័ន្ធលុបបំបាត់ជំងឺរលាកថ្លើម HEA បានផ្តួចផ្តើមគំនិតរៀបចំ វេទិកាលុបបំបាត់ជំងឺរលាកថ្លើម លើកទី៣ ក្នុងគោលបំណងបង្កើតឱ្យមានជំនួបរវាងវេជ្ជបណ្ឌិតកម្ពុជាក្នុងការពិភាក្សាចំណេះដឹង និងការចែករំលែកបទពិសោធន៍ក្នងការព្យាបាល ផ្តោតសំខាន់ទៅលើជំងឺរលាកថ្លើមប្រភេទបេ និងសេដែលនៅតែជាកង្វល់ដល់សុខភាពសាធារណៈ និងរាជរដ្ឋាភិបាលកម្ពុជា។ ជាមួយគ្នានេះ វេជ្ជបណ្ឌិតជំនាញ លើកទឹកចិត្តឱ្យពលរដ្ឋកម្ពុជាយកចិត្តទុកដាក់ និងទទួលការព្យាបាលឱ្យបានទាន់ពេលវេលាចំពោះជំងឺរលាកថ្លើមបេ និងសេ។

វេទិកាលុបបំបាត់ជំងឺរលាកថ្លើមលើកទី ៣ ជំនួបវេជ្ជបណ្ឌិតឯកទេសថ្លើម ធ្វើឡើងកាលពីចុងសប្តាហ៍មុននៅសណ្ឋាគារ Hyatt Regency Phnom Penh ក្រោមវត្តមានគណអធិបតីភាព វេជ្ជបណ្ឌិត លី សូវ៉ាន់ ទីប្រឹក្សាក្រសួងសុខាភិបាល ប្រធានគណៈកម្មការលុបបំបាត់ជំងឺរលាកថ្លើមនៅកម្ពុជា និងជាប្រធាននាយកដ្ឋានប្រយុទ្ធនឹងជំងឺឆ្លង វាគ្មិនកិត្តិយស និង ភ្ញៀវកិត្តិយសដែលរួមមានសាស្រ្តចារ្យ វេជ្ជបណ្ឌិតឯកទេសថ្លើម អញ្ជើញចូលរួមសរុបជាង ១៥០ រូប។ 

ក្នុងឱកាសនោះ កិច្ចពិភាក្សា និងប្រធានបទសំខាន់ៗជាច្រើនត្រូវបានលើកឡើងមកចែករំលែកក្នុងអង្គពិធីទាំងមូល ជាពិសេស ការលើកទឹកចិត្តឱ្យប្រជាពលរដ្ឋកុំមានការរុញរាក្នុងការទទួលការព្យាបាល ដូចជា ការធ្វើតេស្តរកមើលមេរោគរលាកថ្លើមបេ និងសេ និងសេវាដែលពាក់ព័ន្ធផ្សេងៗតាមវេជ្ជបញ្ជា ព្រោះជំងឺស្ងប់ស្ងាត់ ទាំងពីរនេះអាចឆ្លងទៅក្នុងរាងកាយរបស់មនុស្ស ដោយមិនមានចេញរោគសញ្ញា ឬអាការអ្វីគួរឱ្យកត់សម្គាល់ លុះត្រាតែសភាពថ្លើមវិវត្តទៅរកដំណាក់កាលធ្ងន់ធ្ងរបាត់ទៅហើយ។ 

នៅក្នុងវគ្គ កិច្ចពិភាក្សា និងសំណួរចម្លើយ ធ្វើឡើងដោយមានការចូលរួមពីវាគ្មិនកិត្តិយស ៥រូប រួមមាន លោកសាស្ត្រាចារ្យ ឱម សិរីវិជិត ប្រធានសមាគមគ្រូពេទ្យកម្ពុជាផ្នែកប្រដាប់រំលាយអាហារ លោកវេជ្ជបណ្ឌិត សាន់ ចាន់ណា វេជ្ជបណ្ឌិតឯកទេសជំងឺថ្លើម ក្រពះ ពោះវៀន ឬសដូងបាតនៅមន្ទីរពេទ្យកាល់ម៉ែត្រ លោកវេជ្ជបណ្ឌិត គឹម ចំរើនសាន្ត ជាអតីតមន្រ្តីជំនាញ អង្គការគ្រូពេទ្យគ្មានព្រំដែនប្រចាំនៅកម្ពុជា និងជាវេជ្ជបណ្ឌិតបង្គោលប្រចាំសម្ព័ន្ធលុបបំបាត់ជំងឺរលាកថ្លើម លោកវេជ្ជបណ្ឌិត កែវ សំឡី ប្រធានកម្មវិធីលុបបំបាត់ជំងឺរលាកថ្លើមដោយវីរុស នៃក្រសួងសុខាភិបាល និង លោក វេជ្ជបណ្ឌិត ធា វុទ្ធី ជាវេជ្ជបណ្ឌិតឯកទេសជំងឹថ្លើម ក្រពះ ពោះវៀន ឬសដូងបាត​ នៅមន្ទីរពេទ្យព្រះអង្គឌួង ដែលបានចូលរួមឆ្លើយតប និងបកស្រាយរាល់ចម្ងល់នានា សម្រាប់ជា អត្ថប្រយោជន៍ ដល់ អង្គវេទិកាទាំងមូល។ 

ទន្ទឹមនឹងនេះ លោកវេជ្ជបណ្ឌិត សាន់ ចាន់ណា វេជ្ជបណ្ឌិតឯកទេសជំងឺថ្លើម ក្រពះ ពោះវៀន ឬសដូងបាតនៅមន្ទីរពេទ្យកាល់ម៉ែត្របានលើកឡើង ត្បិតថាជំងឺរលាកថ្លើមប្រភេទបេ ជាជំងឺដែលជាមិនដាច់ ប៉ុន្តែយើងអាចគ្រប់គ្រងវាបានតាមរយៈការទទួលការព្យាបាលឱ្យទាន់ពេលវេលា និងប្រញាប់មកជួបអ្នកឯកទេសថ្លើម បើសិនជាសង្ស័យ ឬរកឃើញថាខ្លួនបាន និងកំពុងផ្ទុកមេរោគរលាកថ្លើម។ 

លោកវេជ្ជបណ្ឌិតបានបន្តថា បើសិនជាអ្នកដែលដឹងថាបានឆ្លង ឬកំពុងផ្ទុកមេរោគរលាកថ្លើម ប្រភេទបេ មិនប្រញាប់ទៅទទួលការព្យាបាលពីគ្រូពេទ្យជំនាញឱ្យទាន់ពេលវេលាទេ នោះសភាពថ្លើមរបស់អ្នកជំងឺអាចវិវត្ត ទៅរកដំណាក់កាលធ្ងន់ធ្ងរដូចជា ក្រិន ឬមហារីកថ្លើមដែលពិបាកនៅក្នុងការគ្រប់គ្រង។ 

បើតាមអង្គការសុខភាពពិភពលោកបានចុះផ្សាយថា អ្នកជំងឺរលាកថ្លើមប្រភេទបេ ៩ ក្នុងចំណោម ១០ នាក់នៅជុំវិញពិភពលោក មិនបានដឹងថា ខ្លួនបានឆ្លងមេរោគមួយនេះទេ រហូតដល់មានការវិវត្ត នៃសភាពជំងឺរលាកថ្លើម រួចបាត់ទៅហើយ ។ 

ជាមួយគ្នានេះផងដែរ កញ្ញា ម៉េង សក្ដា អ្នកតំណាងសម្ព័ន្ធលុបបំបាត់ជំងឺរលាកថ្លើម HEA បានប្រាប់ថា ការចូលរួមលើកកម្ពស់ទាំងគុណភាពនៃការព្យាបាល និងការជួយសម្រួលតម្លៃសេវាដែលពាក់ព័ន្ធមួយចំនួនចំពោះជំងឺរលាកថ្លើមប្រភេទបេ និងសេ ជូនដល់ សាធារណជនគឺជាបេសកកម្មរបស់ HEA កន្លងមកនេះ ក្រោមការសហការជាមួយដៃគូភាគីដែលពាក់ព័ន្ធរួមមាន រាជរដ្ឋាភិបាល វេជ្ជបណ្ឌិតជំនាញ និងបងប្អូនសាធារណជន។ 

កញ្ញាបន្តថា ដើម្បីជំរុញបេសកកម្មមួយនេះឱ្យកាន់តែមានភាពប្រសើរឡើងឆ្ពោះទៅរកការចូលរួមលុបបំបាត់ជំងឺរលាកថ្លើមនៅកម្ពុជានៅឆ្នាំ ២០២៣ HEA បន្តខ្នះខ្នែងក្នុងការបញ្រ្ជាបចំណេះដឹងសំខាន់ៗតាមរយៈការធ្វើយុទ្ធនាការផ្សព្វផ្សាយនៅលើបណ្ដាញសង្គម ការរៀបចំជាសិក្ខាសិលាបណ្ដុះបណ្ដាលសម្រាប់ក្រុមគ្រូពេទ្យ ក៏ដូចជាវេទិការចែករំលែកចំណេះដឹងដែលពាក់ព័ន្ធ ដែលវេទិកាលើកនេះជាលើកទីប្រាំហើយដែល HEA បានរៀបចំឡើង។ 

ជាក់ស្តែង មនុស្សប្រមាណជាង ៣០៤ លាននាក់ជុំវិញពិភពលោកកំពុងរស់នៅជាមួយមេរោគរលាកថ្លើមប្រភេទបេ និងសេរ៉ាំរ៉ៃ  និងអ្នកស្លាប់ដោយសារមេរោគរលាកថ្លើមទាំងពីរប្រភេទនេះមានចំនួន ៣៥០០ នាក់ជារៀងរាល់ថ្ងៃ កាលពីឆ្នាំ២០២២។ នេះ បើតាមអង្គការសុខភាពពិភពលោក WHO ។ 

ការចុះផ្សាយរបស់ WHO ក្នុងឆ្នាំដដែល បានបង្ហាញថា អ្នកជំងឺរលាកថ្លើមប្រភេទបេប្រហែល ២២០ លាននាក់ និងអ្នកជំងឺរលាកថ្លើមប្រភេទសេប្រហែល ៣៦ លាននាក់ មិនបានធ្វើរោគវិនិច្ឆ័យនោះទេ ខណៈសេវាព្យាបាលដែលពាក់ព័ន្ធ និងការមើលថែទាំអ្នកជំងឺនៅតែស្ថិតនៅក្នុងកម្រិតមួយដែលទាប៕