KPT+

រឿងដែលគួរធ្វើ នៅពេលជីវិតចង់វាយយើងផ្តួល

បានផុស

៣ years មុន

នៅ

ថ្ងៃព្រហស្បតិ៍ ៣១ ធ្នូ ២០២០

ដោយ

យើងម្នាក់ៗជួបប្រទះនឹងការជំពប់ដួលខ្លះៗនៅក្នុងជីវិតរបស់យើង ស្លាកស្នាមផ្លូវចិត្តខ្លះស្រាល ខ្លះធ្ងន់ សឹងអាចសម្លាប់យើងបាន ត្រូវគេបោក ត្រូវគេចោមគ្នាធ្វើបាប ត្រូវគេមើលងាយ ត្រូវគេបំភ្លេចចោលត្រូវគេស្អប់ទំាងដែលមិនបានធ្វើអ្វីសោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ធ្ងន់ជាងនេះទៀត អ្នកដែលកំពុងអានខ្លះ ទើបត្រូវបាត់បង់ការងារ លក់ផ្ទះដែលខ្លួនស្រលាញ់ ចាញ់ការភ្នាល់ ត្រូវគេបញ្ឈប់ពីការងារ ។

ពេលខ្លះយើងត្រូវបង្ខំចិត្ត ធ្វើជាញញឹមហើយខំប្រឹងស្រវាស្រទេញទៅធ្វើការងារមួយ ដែលមិនត្រូវសោះទៅតាមផែនការរបស់យើង។

ហេតុផលទំាងនេះ ពេលខ្លះដាល់យើងឱ្យដួល ហើយយើងហាក់ចង់លែងតស៊ូ ក្រោកឡើងមកវិញទៀត ព្រោះអស់កម្លាំងកាយចិត្ត លង់ជ្រៅទៅក្នុងអារម្មណ៍ឈឺចាប់និងការសង្ស័យ មិនស្រឡះចិត្ត ប៉ុន្តែ ជឿ KPT ទៅ ទាំងនេះគឺជារឿងធម្មតាប៉ុណ្ណោះ វាជាជីវិត ។

អាថ៌កំបាំងនៃការយកឈ្នះជីវិត គឺឆ្លងកាត់ការលំបាកទំាងអស់នេះឱ្យហើយសិន។ ខ្មែរនិយាយថា ហែលរួចគឺឈ្នះហើយមិនទាន់ហែលគឺនៅវែងទៀត! មិនមានអ្នកណាគេចរួចទេ។

ឆ្លងតាមអ្នកធ្លាប់ឆ្លងកាត់ យើងគប្បីរៀនធ្វើចិត្តជាមួយមេរៀនសំខាន់ៗពីរបីចំណុចនេះ៖

១ ទទួលទៅថា មានរឿងខ្លះវាលើសពីអ្វីដែលយើងអាចគ្រប់គ្រង

ឧទាហរណ៍ប្រសិនបើអាជីវកម្មរបស់យើងបរាជ័យហើយជំពាក់គេច្រើន យើងមិនអាចទៅផឹកស្រាដើម្បីសងបំណុលទេ យើងត្រូវផ្លាស់ប្តូរសកម្មភាព ហើយរកវិធីដោះស្រាយដោយវិជ្ជមានជាជាងបំផ្លាញខ្លួនឯងចោល។ កុំខ្លាចសងដល់ថ្ងៃស្លាប់ ព្រោះស្លាប់ទៅគឺទទេ ពេលស្លាប់មានរាប់លាន ក៏អត់ន័យ សំខាន់កាលនៅរស់បានក្លាហានកម្រិតណាក្នុងការប្រឆាំងនិងកណ្តាប់ដៃនៃជីវិត?

២ ព្រមទទួលយក ការបែកគ្នា

ប្រសិនបើមនុស្សជាទីស្រលាញ់ណាម្នាក់បានចាកចេញទៅហើយដោយជំងឺ ដោយអំពើក្បត់ដោយស្ថានភាពរស់នៅមិនអាចជួបគ្នា ការឈឺចាប់នោះទោះយូរប៉ុណ្ណា ក៏គង់មិនអាចផ្លាស់ប្តូរវាបានវិញដែរ អ្វីដែលកើតឡើងហើយ ឱ្យវាកើតទៅចុះ អ្នកថ្មីមកមិនបាន ប្រសិនអ្នកចាស់មិនចាកចេញ ចំណែកការកើតចាស់ឈឺស្លាប់ជាជីវិត យើងបែកគ្នាព្រាត់ស្លាប់កើតទុក្ខល្មមៗ កុំដល់ថ្នាក់ស្លាប់ទៅតាម។

៣ យល់អំពីតម្លៃពិតនៃជីវិតមនុស្ស

បើអ្នកនៅតែគិតថាមនុស្សជោគជ័យ ព្រោះជិះឡានថ្លៃ ជាតិនេះអ្នកគ្មានថ្ងៃភ្លឺទេ។ ជីវិតមិនសំខាន់ជិះអ្វី រស់វែងប៉ុណ្ណា ឬស្រណុកឡូយឆាយប៉ុណ្ណា សំខាន់អ្នកខ្លាំងប៉ុណ្ណាក្នុងការញញឹមជាមួយទុក្ខលំបាក ហើយយកឈ្នះមហិច្ឆតារបស់ខ្លួនឯងបានប៉ុណ្ណា រៀនសូត្រពីជីវិតបានច្រើនកម្រិតណា ចេះអភ័យទោសឱ្យខ្លួនឯងនិងអ្នកដទៃកម្រិតណា? នៅពេលដែលជីវិតលំបាកលំបិន ជាធម្មតាទេដែលមានយើងអារម្មណ៍ថាមានកំហុស។ ការបន្ទោសខ្លួននិងការស្អប់ខ្លួនឯងមិនអាចជួយអ្វីបានទំាងអស់។ ទោះយ៉ាងណាក៏ដោយគ្រប់គ្នាត្រូវតែរៀនអភ័យទោសឱ្យខ្លួនឯងនិងអ្នកផ្សេង ដើម្បីបំភ្លេចចោលហើយឆ្ពោះទៅមុខ។ កុំបង្ខាំងខ្លួនយើងក្នុងភាពងងឹត។

៤ កុំចូលរួមជាមួយក្រុមណាដែលអួតថាគេនឹងជួយឱ្យយើងមានបាន

មនុស្សគ្រប់គ្នាកើតមកដើម្បីខ្លួនគេ គេកាន់តែមាន គេរឹតតែចង់មានថែមឡើង។ ការប្រមូលយើងឱ្យចូលរួម គឺដើម្បីមហិច្ឆតាជ្រៅរបស់គេ មិនមែនដើម្បីយើងទេ!ឈប់ចាញ់បោកគេទៅ! កុំយកលុយធំៗ ឬខ្ចីបុលធនាគារទៅកាត់អីវ៉ាន់ពីគេ ចូលហ៊ុនជាមួយគេ ឬប្រថុយជាមួយអ្វីមួយដែលមិនមែនជារបស់ខ្លួនយើង។ ចុះបើយើងលក់មិនចេញគ្មាលុយសងបំណុល ចុះបើអ្នកជោគជ័យមុនៗនោះជាជោគជ័យចុងក្រោយ? ចាំណា៎ ធ្វើអ្វីក៏ដោយ តូចប៉ុណ្ណា គួរធ្វើជារបស់យើង ចាញ់ឈ្នះ យើងអស់ចិត្ត ។ កុំធ្វើដើម្បីអ្នកណាផ្សេងដែលយើងចាញ់ពាក្យគេប្រូ ពូកែកុហកហើយប្រើរង្វាន់ធំៗមកលួងយើង។ រង្វាន់ធំ សន្យាខ្លាំង ជោគជ័យងាយ ទំាងបីយ៉ាងនេះ ជាអន្ទាក់ វាជាអន្ទាក់ទេ! ប្រសិនបើវាងាយស្រួលបែបនោះមែន គេមិនចែករំលែកជោគជ័យនោះជាមួយយើងឡើយ។ ភ្ញាក់ខ្លួនឡើង!

ប្រែសម្រួល៖ ស្រស់

ចុចអាន៖ រឿងរ៉ាវដែលមនុស្សមិនអាចគ្រប់គ្រងនិងផ្លាស់ប្ដូរបានក្នុងជីវិត

ចុចអាន៖ សុភាសិតចិន ៨ ឃ្លា ឆ្លុះបញ្ចាំងតម្រូវការពិតក្នុងជីវិតរស់នៅនិងជួយដាស់តឿនចិត្ត

Related Topics:ការលើកទឹកចិត្ត