ក្រុម​ការងារ​គណបក្សប្រជាជន​កម្ពុជា នៅ​តែ​គិតគូរ​ពីសុខទុក្ខពលរដ្ឋ ទោះបី​មាន​ជម្លោះ​ព្រំដែន​ក្ដី

កោះកុង ៖ ក្រុមការងារគណបក្សប្រជាជនកម្ពុជាចុះជួយឃុំកណ្តោល ស្រុកបូទុមសាគរ ខេត្តកោះកុង អះអាងថា គណបក្សនៅតែគិតគូរពីសុខទុក្ខរបស់ពលរដ្ឋគ្រប់ពេលវេលា ទោះបី​ជា​ស្ថានការណ៍​នៅ​ព្រំដែន​មិន​សូវ​ល្អ​ក៏​ដោយ។

ខណៈ​កំពុង​មាន​បញ្ហា​ព្រំដែន​ជាមួយ​នឹង​ប្រទេសថៃ ក៏​ក្រុមការងារ​របស់​គណបក្សប្រជាជន​កម្ពុជា​ថ្នាក់កណ្តាល និងថ្នាក់ខេត្តកោះកុង ដែលចុះជួយឃុំកណ្តោល អញ្ជើញ​យក​ទេយ្យទាន​ប្រគេន​ព្រះសង្ឃគង់ព្រះវស្សា និងសំណេះសំណាលជាមួយពលរដ្ឋ ជនពិការ ព្រមទាំងសិស្សានុសិស្សប្រមាណជាង២០០នាក់។

លោក ឈឿន កុសលវីរៈ ប្រធានក្រុមការងារគណបក្សប្រជាជនកម្ពុជាថ្នាក់កណ្តោល និងលោក តាំង ឈុនស្រេង ប្រធានការងារបក្សថ្នាក់ខេត្តកោះកុង ចុះជួយមូលដ្ឋានឃុំកណ្តោល បានថ្លែងឱ្យដឹងនៅថ្ងៃទី១០ ខែតុលា ឆ្នាំ២០២៥ថា គណបក្សប្រជាជនកម្ពុជា ដែលដឹកនាំដោយសម្តេចតេជោ ហ៊ុន សែន ប្រធានគណបក្ស នៅតែដឹងអំពីទុក្ខលំបាករបស់ពលរដ្ឋមូលដ្ឋាន និងប្រឹងប្រែងសម្របសម្រួលដោះស្រាយជូនជានិច្ច ដោយមិនឱ្យប្រជាពលរដ្ឋរងគ្រោះណាម្នាក់អត់បាយហូបនោះទេ។

បើតាមលោក ឈឿន កុសលវីរៈ និងលោក តាំង ឈុនស្រេង បានបន្ថែមទៀតថា គណបក្សប្រជាជនកម្ពុជា នៅក្បែរបងប្អូនប្រជាពលរដ្ឋគ្រប់ពេលវេលាទាំងអស់ ហើយមិនរត់ទៅណាចោលប្រជាពលរដ្ឋនោះទេ ពោលគឺរួមសុខរួមទុក្ខជាមួយគ្នា។ ទៀតសោត ថែមទាំងបានប្រឹងប្រែងថែរក្សាសុខសន្តិភាព ស្ថេរភាពនយោបាយ និងការអភិវឌ្ឍន៍គ្រប់វិស័យឥតឈប់ឈរ។

ក្នុងពិធីលើកស្លាកគណបក្ស និងជួបសំណេះសំណាលជាមួយពលរដ្ឋ ជនពិការជាង២០០នាក់ ក្រុមការងារគណបក្សចុះជួយឃុំកណ្តោល ក៏ជំរុញពលរដ្ឋតាមដានព័ត៌មានណាដែលពិតប្រាកដ ហើយជឿជាក់មកលើគណបក្សប្រជាជនកម្ពុជា ក៏ដូចជារាជរដ្ឋាភិបាលបច្ចុប្បន្ន ជៀសវាងជឿតាមការញុះញង់របស់ក្រុមប្រឆាំងនៅក្រៅប្រទេសដែលតែងបង្កភាពវឹកវរដល់សណ្តាប់ធ្នាប់សង្គម។

ក្រុមការងារគណបក្សប្រជាជនកម្ពុជាថ្នាក់កណ្តាល និងថ្នាក់ខេត្តកោះកុង ក៏លើកទឹកចិត្តដល់ពួកគេប្រឹងប្រែងរៀនសូត្រឱ្យខ្លាំងពូកែ ដើម្បីក្លាយជាធនធានមនុស្សដ៏មានសក្តានុពលជួយអភិវឌ្ឍន៍ជាតិមាតុភូមិប្រទេសឱ្យកាន់តែរីកចម្រើនទៅថ្ងៃអនាគត។

ក្រុមការងារគណបក្សប្រជាជនកម្ពុជាថ្នាក់កណ្តាល និងក្រុមការងារបក្សថ្នាក់ខេត្តកោះកុង បានយកត្រៃចីវរ និងថវិកា​មួយ​ចំនួន​ធំ​ទៅ​ប្រគេនព្រះសង្ឃ ដែលគង់ចាំ​ព្រះវស្សា​អស់កាល៣ខែ​នៅវត្តកណ្តោល ក្នុងឱកាសរដូវកាលពិធីបុណ្យកឋិនទាន និងនំសម្ភារៈសិក្សាដល់សិស្សានុសិស្សផងដែរ៕

អត្ថបទ ៖ សិរីវឌ្ឍនៈ