ព្រឹទ្ធសភា៖ សម្ដេចតេជោតែងស្នើអន្តរជាតិជួយអន្តរាគមន៍ក្នុងជម្លោះព្រំដែន​ជាមួយថៃ

រាល់ជំនួបជាមួយមិត្តបរទេស សម្ដេចតេជោ ហ៊ុន សែន ប្រធានព្រឹទ្ធសភា តែងតែបានស្នើកិច្ចអន្តរាគមន៍ពីភាគីអន្តរជាតិក្នុងជម្លោះព្រំដែនរវាងកម្ពុជានិងថៃ ដែលកំពុងបន្តអូសបន្លាយ ខណៈកម្ពុជាប្រកាន់យកដំណោះស្រាយដោយសន្តិវិធីជាមួយភាគីថៃ។

នេះជាខ្លឹមសារគូសបញ្ជាក់របស់ព្រឹទ្ធសភា តាមរយៈសេចក្ដីប្រកាសព័ត៌មានស្តីពីលទ្ធផលនៃសម័យប្រជុំព្រឹទ្ធសភា នាថ្ងៃទី១៦ ខែតុលា ឆ្នាំ២០២៥ ក្រោមវត្តមានដឹកនាំរបស់សម្ដេចតេជោ ហ៊ុន សែន ដែលមានវត្តមានសមាជិកព្រឹទ្ធសភាចូលរួមចំនួន៦០រូប។

ព្រឹទ្ធសភាបានលើកឡើងដោយក្ដីកត់សម្គាល់ថា៖ «នៅចំពោះមុខភាពគឃ្លីននៃការឈ្លានពានរបស់ថៃមកលើបូរណភាពទឹកដីកម្ពុជា សម្តេចអគ្គមហាសេនាបតីតេជោ បានបង្ហាញឫសគល់ និងស្ថានភាពពិតនៃជម្លោះព្រំដែន ការព្យាយាមអត់ធ្មត់ និងការប្រកាន់គោលជំហររបស់កម្ពុជាក្នុងការដោះស្រាយជម្លោះដោយសន្តិវិធី អនុលោមតាមច្បាប់អន្តរជាតិ»។

សម្ដេចតេជោ ហ៊ុន សែន ក៏បានស្នើឱ្យភាគីមិត្តជួយអន្តរាគមន៍ទប់ស្កាត់ការពង្រីកជម្លោះ ហើយជំរុញឱ្យមានការគោរព និងអនុវត្តនូវបទឈប់បាញ់ ដែលបានឯកភាពព្រមព្រៀងគ្នា ដើម្បីអាចវិលទៅរកប្រក្រតីភាពនៃទំនាក់ទំនងឡើងវិញ។

ក្នុងន័យនេះ ព្រឹទ្ធសភា បានគូសបញ្ជាក់ថា សកម្មភាពការទូតសភាត្រូវបានបន្តពង្រីកកាន់តែសកម្មឡើងបន្ថែមទៀតពីសំណាក់សម្ដេចតេជោ ហ៊ុន សែន ប្រធានព្រឹទ្ធសភា ដើម្បីរួមចំណែកដល់រាជរដ្ឋាភិបាលក្នុងកិច្ចខិតខំពង្រឹងកិច្ចការទូត សំដៅធានាសន្តិភាព ស្ថិរភាព និងវិបុលភាពយូរអង្វែងរបស់កម្ពុជា តំបន់ និងពិភពលោក ក្នុងពេលដែលសភាពការណ៍តំបន់ និងពិភពលោក កំពុងមានភាពច្របូកច្របល់ខ្លាំង និងហានិភ័យខ្ពស់កើតចេញពីការបន្តប្រកួតប្រជែងយុទ្ធសាស្ត្រ-ភូមិសាស្ត្ររបស់ប្រទេសមហាអំណាច ភាពតានតឹងនៃជម្លោះ ការរីកសាយនៃសង្គ្រាមក្នុងតំបន់មួយចំនួនលើពិភពលោក និងរាប់ទាំងជម្លោះព្រំដែនកម្ពុជា-ថៃ ដែលបង្កដោយភាគីថៃ។

សូមបញ្ជាក់ថា បើតាមរបាយការណ៍សង្ខេបរបស់ព្រឹទ្ធសភា ក្នុងមុខងារកិច្ចសហប្រតិបត្តិការអន្តរជាតិ ក្នុងរយៈពេល៣ខែមកនេះ សម្តេចតេជោ ហ៊ុន សែន ក្នុងនាមជាប្រមុខរដ្ឋស្តីទី និងក្នុងនាមជាប្រធានព្រឹទ្ធសភាកម្ពុជា បានទទួលជួបសវនាការ និងពិភាក្សាការងារជាមួយភ្ញៀវអន្តរជាតិ ឯកអគ្គរាជទូត ឯកអគ្គរដ្ឋទូត និងស្ថាប័ននានាចំនួន២៤លើក ព្រមទាំងអញ្ជើញបំពេញទស្សនកិច្ចផ្លូវការនៅប្រទេសវៀតណាម៕