ល្ងាចនេះថៃ ចាប់ផ្ដើមចាក់សម្លេងឮខ្លាំងៗនៅភូមិជោគជ័យឡើងវិញ បន្ទាប់ពីផ្អាកចាក់៣ថ្ងៃ

ភាគីថៃ បានចាប់ផ្ដើមចាក់សម្លេងរំខានដែលឮខ្លាំងឡើងវិញ ចាប់តាំងវេលាម៉ោង៥៖៣០នាទីល្ងាចថ្ងៃទី១៧ ខែតុលា នៅចំណុចដែលបានរាយបន្លាលួសព័ទ្ធយកដីផ្ទះពលរដ្ឋនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ នេះបើតាមសេចក្ដីរាយការណ៍ចេញពីមូលដ្ឋាន។

បើតាមសេចក្ដីរាយការណ៍ដែលស្រង់សម្ដីពីកងកម្លាំងឱ្យដឹងថា សម្លេងដែលភាគីថៃចាក់ឡើងវិញ  គឺក្នុងកម្រិត៥០០​ ដេស៊ីបែល ដែលអាចឮក្នុងចម្ងាយឆ្ងាយជាងកាលពីការចាក់សំឡេងរំខានលើកមុន។

គួរកត់សម្គាល់ថា ការចាក់សម្លេងរំខាននាល្ងាចថ្ងៃទី១៧ ខែតុលា​ បានចាប់ផ្ដើមឡើងវិញ បន្ទាប់ពីភាគីថៃបានផ្អាកចាក់រយៈពេលថ្ងៃ៣ជាប់គ្នា ក្រោយរងការរិះគន់មិនសំចៃមាត់ពីសំណាក់សមាជិកព្រឹទ្ធសភា, សមាជិករដ្ឋសភា, ប្រធានគណបក្ស, អ្នកជំនាញច្បាប់ និងអ្នកជំនាញសិទ្ធិមនុស្សជាដើម។

យោធាថ្ងៃបានចាប់ផ្ដើមចាក់ធុងបាស់ឮខ្លាំង មានទាំងសំឡេងយន្តហោះចម្បាំង សំឡេងខ្មោច សំឡេងឆ្កែព្រុស ឆ្កែលូ ដ៏ព្រឺព្រួច នៅភូមិព្រៃចាន់ និងភូមិជោគជ័យ ចាប់ពីថ្ងៃ១០ ដល់ ១៣ ខែតុលា ឆ្នាំ២០២៥ ដោយមានបុគ្គលថៃ ជ្រុលនិយមថៃ ឈ្មោះ ចម ផាលាំង  ជាអ្នកផ្ដួចផ្ដើមគំនិត បើកដៃដោយកងទ័ពថៃ និងអាជ្ញាធរខេត្តស្រះកែវ។

ភូមិព្រៃចាន់ និងភូមិជោគជ័យ មានប្រជាពលរដ្ឋសរុប ៩៩០គ្រួសារ ស្មើនឹងជាង៣ពាន់​នាក់​។ ក្នុងភូមិនេះមានជនចាស់ជរា ជនមានពិការភាព អ្នកជំងឺ ស្ត្រីមានផ្ទៃពោះ ស្ត្រី​ទើប​សម្រាលកូន និងក្មេងៗផងដែរ។ ការចាក់សំឡេងរំខានលាន់ឭយ៉ាងកងរំពងរយៈ​ពេល៤យប់កន្លងទៅនេះ បានធ្វើឱ្យប៉ះពាល់ធ្ងន់ធ្ងរដល់ដំណេក ផ្លូវចិត្ត និងស្មារតីរបស់ពលរដ្ឋកម្ពុជា។

តាមសេចក្ដីរាយការណ៍ ការចាក់សំឡេងរំខានពេលនេះ ថៃប្រើឧបករណ៍បំពងសំឡេងចំនួន៤រថយន្ត។ របៀបនៃការចាក់សំឡេងនេះ ពួកគេបានស្ទួចឧបករណ៍មួយចំនួនឡើងទៅលើកម្ពស់៣០ម៉ែត្រ ហើយឧបករណ៍បំពងសំឡេង៣រថយន្តទៀតដាក់នៅខាងក្រោម។ ឧបករណ៍បំពងសំឡេងដែលគេចាក់នេះ ត្រូវបានបញ្ជាក់ថា មានកម្រិតរលកសំឡេងរង្វង់ ៥០០ដេស៊ីបែល ដែលជាកម្រិតរលកសំឡេងខ្ពស់បំផុត ហើយអាចឭចម្ងាយប្រមាណ៣០គីឡូម៉ែត្រ។

ជាទូទៅត្រចៀករបស់មនុស្សអាចទទួលកម្រិតរលកសំឡេងរង្វង់ ១០០ដេស៊ីបែលប៉ុណ្ណោះ។ កម្រិតរលកសំឡេងរហូតដល់៥០០ដេស៊ីបែល នឹងធ្វើឱ្យមនុស្សបែកក្រដាសត្រចៀក ឈឺក្បាល វិលមុខ និងក្អួតចង្អោរ។

ក្រោយពីមានសកម្មភាពចាក់សម្លេងរំខានពលរដ្ឋកម្ពុជាធ្ងន់ធ្ងរបង្កដោយភាគីថៃ គណៈកម្មាធិការសិទ្ធិមនុស្សកម្ពុជា កម្មាធការសិទ្ធិមនុស្សកម្ពុជា បានស្នើឱ្យឧត្តម​ស្នងការ​អង្គការសហប្រជាជាតិ​ទទួល​បន្ទុក​សិទ្ធិ​មនុស្ស​លោក Volker Turk ចុះមកសង្កេតការណ៍ដោយផ្ទាល់ឱ្យបានឆាប់រហ័សបំផុត នៅតំបន់ ព្រំដែនកម្ពុជា-ថៃ ដែលត្រូវបានរាយការណ៍អំពីការរំលោភសិទ្ធិមនុស្សយ៉ាងធ្ងន់ធ្ងរ និងផ្តួចផ្តើមការស៊ើបអង្កេតជាបន្ទាន់ អំពីការប្រើប្រាស់សម្លេងរំខានដោយកងទ័ពថៃ នៅ តាមបណ្តោយព្រំដែនកម្ពុជា-ថៃ និងធានាឱ្យមានការទទួលខុសត្រូវចំពោះការរំលោភ បំពានច្បាប់សិទ្ធិមនុស្សនេះ។

គណៈកម្មាធិការសិទ្ធិមនុស្សកម្ពុជាស្នើឧត្តម​ស្នងការ​អង្គការសហប្រជាជាតិ​ទទួល​បន្ទុក​សិទ្ធិ​មនុស្ស​ ជួយអំពាវនាវឱ្យបញ្ឈប់គ្រប់សកម្មភាព ដែលគំរាមកំហែងផ្លូវចិត្តរបស់ប្រជាជនកម្ពុជា ជា ពិសេសការប្រើប្រាស់សម្លេងរំខាននៅពេលយប់អធ្រាត និងធានាការការពារ និងការផ្តល់ជំនួយវេជ្ជសាស្ត្រនិងផ្លូវចិត្តចាំបាច់ផ្សេងៗ ដល់ជនរង គ្រោះ រួមទាំងស្ត្រី កុមារ និងមនុស្សចាស់ ក៏ដូចជាត្រូវលើកទឹកចិត្តក្នុងការពង្រឹងកិច្ចសន្ទនាតាមព្រំដែនរវាងកម្ពុជានិងថៃដើម្បីទប់ស្កាត់ការ កើតឡើងវិញនូវភាពតានតឹង និងប្រកាន់ខ្ជាប់ការគោរពតាមស្មារតីកិច្ចព្រមព្រៀងស្តី ពីបទឈប់បាញ់រវាងកម្ពុជានិងថៃ នៅថ្ងៃទី២៨ ខែកក្កដា ឆ្នាំ២០២៥ គោលការណ៍ ព្រមព្រៀង ១៣ចំណុច នៃកិច្ចប្រជុំវិសាមញ្ញរបស់គណៈកម្មាធិការកិច្ចការព្រំដែន ទូទៅរវាងកម្ពុជានិងថៃ៕