អាជ្ញាធរសង្កាត់អូរឫស្សី ​ចាប់ផ្តើម​អនុវត្ត​​ការ​ផាកពិន័យ ម្ចាស់​លែង​គោ​ក្របី​ដើរ​ពាស​វាលពាសកាល

អាជ្ញាធរសង្កាត់អូរឫស្សី ក្រុងក្រចេះនឹងចាត់វិធានការផ្លូវច្បាប់ និងផាកពិន័យចំពោះម្ចាស់សត្វគោក្របី ដែលនៅតែបន្តលែង​សត្វគោក្របីនៅតាមទីសាធារណៈ និងទីប្រជុំជនដែលធ្វើឲ្យប៉ះពាល់បរិស្ថាន និងបង្កគ្រោះថ្នាក់ចរាចរណ៍ជាបន្តបន្ទាប់។

នេះបើយោងតាមសេចក្តីជូនដំណឹងរបស់រដ្ឋបាលសង្កាត់អូរឫស្សីដោយបានបញ្ជាក់ថា ច្បាប់ចរាចរណ៍ផ្លូវគោក ជំពូកទី៥ នៃមាត្រា ៣៣ ចុះថ្ងៃទី០៩ ខែមករា ឆ្នាំ២០១៥ ស្តីពីការលែងសត្វពាហនៈដើរពាសវាលពាសកាលនៅតាមដងផ្លូវសាធារណៈ និងទីប្រជុំជនកាលពីថ្ងៃទី២៤ ខែតុលា ឆ្នាំ២០២៥។

រដ្ឋបាលសង្កាត់អូរឫស្សីបានរំលឹកជាថ្មីដល់ប្រជាពលរដ្ឋ ដែលចិញ្ចឹមសត្វពាហនៈ (គោ ក្របី) ក្នុងមូលដ្ឋានសង្កាត់អូរឫស្សីក្រោយ​ពិនិត្យឃើញបញ្ហាគ្រោះថ្នាក់ចរាចរណ៍ ដែលបង្កឡើងដោយសត្វគោ-ក្របី ខណៈ​ដែលម្ចាស់សត្វចិញ្ចឹមទាំងនោះមិនដែលចេញមុខមកដោះស្រាយសំណងជូនជនរងគ្រោះ ដែលជាហេតុនាំឱ្យគ្រួសាររងគ្រោះប្តឹងមកអាជ្ញាធរភូមិសង្កាត់​។

កន្លងមករដ្ឋបាលសង្កាត់អូរឫស្សី បានធ្វើការអប់រំផ្សព្វផ្សាយណែនាំ និងធ្វើកិច្ចសន្យាដល់ប្រជាពលរដ្ឋ ដែលជាម្ចាស់សត្វចិញ្ចឹម​ជាច្រើនលើករួចមកហើយ ប៉ុន្តែក៏នៅមានម្ចាស់សត្វចិញ្ចឹមមួយចំនួនតូចនៅតែបន្តលែងសត្វចិញ្ចឹមឱ្យដើរ​ពាស​វាល​ពាសកាលនៅតាមដងផ្លូវសាធារណៈដដែល ជាពិសេសនៅលើដងផ្លូវដែលនាំឱ្យមានគ្រោះថ្នាក់ចរាចរណ៍កើតឡើង។ ម្យ៉ាងទៀតសត្វ (គោ ក្របី) ទាំងនោះបានដើរស៊ីដំណាំដាំដុះរបស់ប្រជាពលរដ្ឋ និងបានជុះអាចម៍ដាក់លើផ្លូវធ្វើ​ឱ្យ​ខូច​សណ្តាប់ធ្នាប់ សោភណភាព អនាម័យបរិស្ថាន ឬអាចបង្កគ្រោះថ្នាក់ផ្សេងៗជាយថាហេតុ។

ដើម្បីចូលរួមចំណែកក្នុងការកាត់បន្ថយគ្រោះថ្នាក់ចរាចរលើផ្លូវសាធារណៈ និងចូលរួមថែរក្សាសណ្តាប់ធ្នាប់របៀប រៀប​រយ លើកកម្ពស់អនាម័យ បរិស្ថាន សោភណ្ឌភាព តាមដងផ្លូវ តាមទីប្រជុំជន និង​តាមទីសាធារណៈ អាជ្ញាធរសង្កាត់អូរឫស្សី ក្រើនរំឭកដល់ប្រជាពលរដ្ឋដែលចិញ្ចឹមសត្វ (គោ ក្របី ពពែ) ត្រូវដាក់ក្នុងទ្រូង ឬក្រោលឱ្យបានត្រឹមត្រូវ និងហាមលែងដើរតាមដឹងផ្លូវសាធារណៈ ទីប្រជុំជននិងស៊ីដំណាំដាំដុះប្រជាពលរដ្ឋនៅតាមភូមិដូចសព្វថ្ងៃ។

ដូច្នេះចាប់ពីថ្ងៃជូនដំណឹងនេះតទៅ អាជ្ញាធរសង្កាត់អូរឫស្សីនឹង​មានវិធានការចុះចាប់និងប្រមូលសត្វ (គោ ក្របី) ព្រមទាំង​ហៅ​ម្ចាស់សត្វ (គោ ក្របី) ដែលលែងពាសវាលពាសកាលមកធ្វើកិច្ចសន្យានិងផាកពិន័យតាមច្បាប់ ដែល​បានកំណត់៕

អត្ថបទ៖ ប្រុញ វិធិន