ព័ត៌មានជាតិ

មន្ត្រីជាន់ខ្ពស់ក្រសួងការបរទេសអាមេរិករំពឹងថាថៃនឹងគោរពសន្យាដោះលែងទាហានខ្មែរវិញ

បានផុស

៨ ខែ មុន

នៅ

ថ្ងៃអង្គារ ២៨ តុលា ២០២៥

ដោយ

មន្ត្រីជាន់ខ្ពស់ក្រសួងការបរទេសអាមេរិកបានប្រាប់ភ្នាក់ងារសារព័ត៌មានអង់គ្លេស Reuters ដោយសង្ឃឹមថាថៃនឹងធ្វើការជាមួយកម្ពុជាលើការដោះលែងទាហានកម្ពុជាទាំង១៨រូបមកកម្ពុជាវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់ Reuters មន្ត្រីជាន់ខ្ពស់ដែលសុំមិនបញ្ចេញឈ្មោះនោះបាននិយាយថា៖ «ការរំពឹងទុករបស់យើងគឺថាដំណើរការនេះ ទាក់ទងទៅនឹងការប្តេជ្ញាចិត្តទាំងអស់ ចាប់ផ្តើមភ្លាមៗនៅពេលដែលពួកគេត្រូវបានចុះហត្ថលេខា»។

គិតរហូតមកដល់ពេលនេះទាហានខ្មែរទាំង១៨នាក់ត្រូវបានថៃចាប់ទៅឃុំខ្លួនអស់រយៈពេល៩១ថ្ងៃហើយ។ ថ្លែងក្នុងពិធីចុះកិច្ចព្រមព្រៀងសន្តិភាពជាមួយកម្ពុជាថ្ងៃទី២៦ ខែតុលា នៅទីក្រុងកូឡាឡាំពួរ ប្រទេសម៉ាឡេស៊ី នៅចំពោះមុខប្រធានាធិបតីអាមេរិក ដូណាល់ ត្រាំ និងមេដឹកនាំពិភពលោកផ្សេងទៀត នាយករដ្ឋមន្ត្រីថៃលោក អានុទីន ចាន់វីរៈគល់ បានថ្លែងថាក្រោយចុះហត្ថលេខានេះថៃនឹងចាប់ផ្ដើមដំណើរការនៃការដោះលែងទាហានកម្ពុជាទាំង១៨នាក់មកឱ្យកម្ពុជាវិញ។

ក្នុងកិច្ចព្រមព្រៀងសន្ដិភាពកម្ពុជា-ថៃ ចំណុចទី៥បានបញ្ជាក់ថា ការដោះលែងទាហានខ្មែរទាំង១៨នាក់មកកម្ពុជាវិញគឺជាការបង្ហាញពីបំណងប្រាថ្នារបស់ថៃក្នុងការលើកកម្ពស់ទំនុកចិត្ត និងការជឿទុកចិត្តគ្នាជាមួយកម្ពុជាឡើងវិញ «ប្រទេសថៃនឹងដោះលែងឈ្លើយសឹកដោយគ្មានបង្អែបង្អង់»៕

អត្ថបទដោយ ហ៊ុន សិរីវឌ្ឍន៍

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា