ឆ្នាំសិក្សាថ្មី ទូទាំងប្រទេសមានសិស្សចុះឈ្មោះចូលរៀន​ជាង ​៣ ​លាន​ ៣ សែន​នាក់ ចាប់​ពី​មត្តេយ្យ​ដល់​មធ្យម​សិក្សា

ក្រសួងអប់រំយុវជន និងកីឡាបានឱ្យដឹងថា សម្រាប់ឆ្នាំសិក្សា២០២៥-២០២៦ សិស្សានុសិស្សចុះឈ្មោះ​ចូល​រៀន​ចាប់​ពីមត្តេយ្យសិក្សារហូតដល់មធ្យមសិក្សា​ទុតិយភូមិ មាន​ប្រមាណ ៣ លាន ៣ សែន ៦ ម៉ឺន និងគ្រូបង្រៀនមានប្រមាណ ១៣ ម៉ឺននាក់។

ក្រសួងអប់រំយុវជន និងកីឡាបានបើកបវេសនកាលឆ្នាំសិក្សាថ្មី២០២៥-២០២៦ កាលពីថ្ងៃទី ០១ ខែវិច្ឆិកាឆ្នាំ២០២៥ ដោយមានសាលារៀនជាង ៩៥០០ បានបើកដំណើរការសិក្សាតាមការគ្រោងទុក។

ថ្លែងក្នុងពិធីបើកបវេសនកាលឆ្នាំសិក្សា ២០២៥-២០២៦ នៅព្រឹកថ្ងៃទី ១ វិច្ឆិកា ឆ្នាំ ២០២៥ ជានិមិត្តរូប នៅវិទ្យាល័យ ហ៊ុន សែន ចុងកាល់ ខេត្តឧត្តរមានជ័យ លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡាបានលើកឡើងថា សាលារៀនសាធារណៈនៅទូទាំងប្រទេសចំនួន ៩៥៤១ មានលទ្ធភាពចាប់ផ្តើមបវេសនកាលឆ្នាំសិក្សា ២០២៥-២០២៦ តាមការគ្រោងទុក។ ចំណែកសាលារៀនចំនួន ៥ នៅមិនទាន់អាចបើកបានដំណើរការ​បាននៅឡើយទេ ក្នុងនោះមាន ១ សាលានៅខេត្តបន្ទាយមានជ័យ ២ សាលានៅខេត្តឧត្តរមានជ័យ និង​២ សាលាទៀត នៅខេត្តព្រះវិហារដោយសារសាលារៀននៅមានគ្រាប់​មិនទាន់ផ្ទុះ ដែលមិនទាន់បានរំដោះចេញបណ្តាលមកពី​សង្គ្រាមឈ្លានពានពីប្រទេសជិតខាង។

យ៉ាងណាក៏ដោយ ក្រសួង មន្ទីរ និងអង្គភាពពាក់ព័ន្ធបានកំពុងរៀបចំឱ្យមានការបង្រៀននៅតាមផ្ទះ, ការរៀនបណ្តោះអាសន្ននៅ​តាម​សាលារៀននៅជិតបំផុត, ការបែងចែកវេនសិក្សាព្រឹក និងរសៀល, និងការបង្រៀននៅក្នុងជំរំ។

លោកឧបនាយករដ្ឋមន្ត្រីបានបញ្ជាក់ថា ក្រសួងក៏បានកំពុងខិតខំកៀរគរ និងផ្តល់​សម្ភារៈចាំបាច់មួយចំនួន​សម្រាប់ការសម្រួល​ដំណើរការរៀនសូត្រ ដោយសូមយកឱកាសនេះដែរ ថ្លែងអំណរគុណដល់ការចូលរួមរបស់សប្បុរសជននានា ក្នុងការគាំទ្រ ដែលបានផ្តល់នូវគ្រឿងឧបភោគបរិភោគ សម្ភារៈកីឡា ភេសជ្ជៈ និងសម្ភារៈប្រើប្រាស់ចាំបាច់ផ្សេងៗមួយចំនួនទៅដល់ លោកគ្រូ អ្នកគ្រូ និងសិស្សានុសិស្ស ដែលរងផលប៉ះពាល់ដោយសារជម្លោះព្រំដែននេះផងដែរ។

លើសពីនេះទៀតក្រសួងអប់រំ យុវជន និងកីឡាបានដាក់ចេញនូវវិធានការលើកទឹកចិត្ត ឱ្យមានការចងសម្ព័ន្ធភាពរវាងមន្ទីរអប់រំយុវជន និងកីឡារាជធានី ខេត្តជាមួយនឹងខេត្ត ដែលរងផលប៉ះពាល់ពីជម្លោះព្រំដែន ដើម្បីផ្តល់ការគាំទ្រ និងស្តារ​ហេដ្ឋារចនាសម្ព័ន្ធអប់រំ ដែលបានរងខ្ទេចខ្ទាំពីសង្គ្រាម ក៏ដូចជាការអភិវឌ្ឍសាលារៀន នៅតាមជាយដែនឱ្យមានភាពគត់មត់នៅក្នុងរយៈពេលខ្លីខាងមុខ និងក្នុងរយៈពេលវែង៕

អត្ថបទ៖សំអឿន