ពលរដ្ឋនៅឃុំថ្មដូនពៅ ទទួលបានការពិនិត្យព្យាបាល​សុខភាពដោយឥតគិតថ្លៃពីក្រុមគ្រូពេទ្យខេត្តកោះកុង

ប្រជាពលរដ្ឋដាច់ស្រយាលនៅឃុំថ្មដូនពៅ ស្រុកថ្មបាំង ខេត្តកោះកុង បានទទួលការពិនិត្យព្យាបាលជំងឺទូទៅ និងអប់រំថែទាំសុខភាពដោយឥតគិតថ្លៃពីក្រុមគ្រូពេទ្យមន្ទីរបង្អែកខេត្តកោះកុង។

លោក ផឹង ពៅ និងអ្នកស្រី យុទ្ធ សារឿន ជាពលរដ្ឋរស់នៅក្នុងឃុំថ្មដូនពៅ ស្រុកថ្មបាំង បានឱ្យដឹងនៅថ្ងៃទី៣ ខែវិច្ឆិកា ឆ្នាំ២០២៥ ថា យុទ្ធនាការរបស់ក្រុមគ្រូពេទ្យចុះពិនិត្យព្យាបាល និងអប់រំសុខភាពមាត់ធ្មេញដល់ពួកគាត់នៅពេលនេះ ពិតជាល្អខ្លាំងចំពោះមកព្យាបាលជំងឺ គ្រានៅឆ្ងាយដាច់ស្រយាល។

ពលរដ្ឋបានបន្តថា រាល់ពេលឈឺស្កាត់ម្តងៗ ពួកគាត់ត្រូវទៅពិនិត្យដោយធ្វើដំណើរឡើងទៅទីរួមខេត្ត និងចំណាយថវិកាពេលវេលាច្រើន ដូច្នេះនេះវាជាឱកាសរបស់ពួកគាត់ដែលកំពុងជួបប្រទះការខ្វះខាតប្រចាំថ្ងៃ។ ហើយពួកគាត់ ក៏សូមថ្លែងអរគុណដល់ក្រុមគ្រូពេទ្យខេត្តដែលបានយកចិត្តដាក់ខ្ពស់លើការអប់រំសុខភាព និងព្យាបាលជំងឺទូទៅ។

តំណាងលោកវេជ្ជបណ្ឌិត ហៃ ឡៃសុន គឺលោកវេជ្ជបណ្ឌិត ពិន សេរីវឌ្ឍនៈ អនុប្រធានមន្ទីរពេទ្យបង្អែកខេត្តកោះកុង លើកឡើងថា បេសកម្មចុះត្រួតពិនិត្យព្យាបាលជំងឺទូទៅ អប់រំសុខភាពធ្មេញនៅតាមសហគមន៍ជូនពលរដ្ឋ ធ្វើឡើងរាល់១ត្រីមាសម្តង ដើម្បីលើកកម្ពស់សុខភាពសាធារណៈ និងតាមដានស្រាវជ្រាវពីជំងឺដែលពលរដ្ឋកំពុងកើតមាន និងពង្រឹងប្រព័ន្ធបញ្ជូនអ្នកជំងឺមកកាន់មន្ទីរពេទ្យខេត្តបានឆាប់រហ័ស។

លោកវេជ្ជបណ្ឌិត ពិន សេរីវឌ្ឍនៈ អះអាងថា នេះជាបេសកម្មត្រីមាសទី៤ហើយនាចុងឆ្នាំ២០២៥ របស់មន្ទីរពេទ្យបង្អែកខេត្ត។ ជាកស្តែងស្ថានភាពជំងឺរបស់ពលរដ្ឋឃុំថ្មដូនពៅ ភាគច្រើនមានបញ្ហាជំងឺទឹកនោមផ្អែម លើសឈាម ជំងឺរោគស្ត្រី ធ្មេញពុកឈឺ និងជំងឺផ្លូវដង្ហើម៕

អត្តបទ៖ សិរីវឌ្ឍន