ជនជាតិថៃម្នាក់ត្រូវបានសមត្ថកិច្ចកម្ពុជាឃាត់ខ្លួន ពីបទឆ្លងដែនខុសច្បាប់

សមត្ថកិច្ចកម្ពុជា បានធ្វើការឃាត់ខ្លួនជនជាតិថៃម្នាក់​ដែលលួចឆ្លងដែនដោយខុសច្បាប់ គោលបំណងស្វែងរកការងារធ្វើនៅកម្ពុជា។ ការឃាត់ខ្លួននេះបានធ្វើឡើងនៅវេលាម៉ោង ១០ យប់ ថ្ងៃទី ៤ ខែវិច្ឆិកា ឆ្នាំ២០២៥ ដោយកម្លាំងប៉ុស្តិ៍នគរបាលការពារព្រំដែនស្វាយចេក ខណៈដែលជនជាតិថៃរូបនេះកំពុងហែលទឹកឆ្លងអូរទៅប្រទេសថៃវិញ ។

តាមការបំភ្លឺជនជាតិថៃឈ្មោះ ស៊ុម ភប់ខាំវង្ស ភេទប្រុស អាយុ២៩ឆ្នាំ រស់នៅខេត្តចន្ទបូរី ប្រទេសថៃ បាននិយាយថា ខ្លួនបានលួចឆ្លងដែនខុសច្បាប់ចូលមកកម្ពុជា ក្នុងគោលបំណងស្វែងរកការងារធ្វើ ប៉ុន្តែដោយមិនមានការងារឱ្យធ្វើក៏លួចឆ្លងដែនបម្រុងហែលឆ្លងទឹកអូរទៅកាន់ប្រទេសថៃវិញ។ យ៉ាងណាមិញ ជនជាតិថៃរូបនេះ ត្រូវបានសមត្ថកិច្ចការពារព្រំដែន ធ្វើការឃាត់ខ្លួនមកសួរនាំ អំឡុងពេលហែលទឹកត្រឡប់ទៅប្រទេសកំណើតវិញ។

តាមការបំភ្លឺរបស់ជនជាតិថៃបាននិយាយថា កាលពីថ្ងៃទី ៣១ ខែតុលា ឆ្នាំ ២០២៥ ខ្លួនបានទំនាក់ទំនងជាមួយជនជាតិខ្មែរមិនស្គាល់ឈ្មោះ ស្គាល់តែមុខតាមរយៈតេឡេក្រាម ដើម្បីឱ្យនាំខ្លួនចូលមកប្រទេសកម្ពុជាតាមច្រកធម្មជាតិចំណុចភូមិស្វាយ ឃុំបឹងរាំង ស្រុកកំរៀង ខេត្តបាត់ដំបង ដោយគិតសេវាឱ្យមេខ្យល់ជាជនជាតិខ្មែរចំនួន ៣.៥០០ បាត។

បន្ទាប់មករូបគេ ក៏បានធ្វើដំណើរទៅខេត្តបន្ទាយមានជ័យ ក្រុងប៉ោយប៉ែត ដើម្បីរកការងារធ្វើ ប៉ុន្តែរកការងារធ្វើមិនបាន ក៏ត្រឡប់មកស្រុកកំរៀងវិញរួចបានទំនាក់ទំនងជាមួយមេខ្យល់ដើម្បីបង្ហាញផ្លូវឱ្យខ្លួនឆ្លងទៅប្រទេសថៃវិញ។ យ៉ាងណាមិញ ដោយទឹកអូរជន់ខ្លាំងពេកខ្លួនហែលមិនរួច ក៏ត្រូវកម្លាំងនគរបាលការពារព្រំដែនប៉ុស្តិ៍ស្វាយចេក ឃាត់ខ្លួនបញ្ជូនមកអធិការនគរបាលស្រុកកំរៀងតែម្តង។

តាមការត្រួតពិនិត្យ គឺពុំមានសម្ភារៈអ្វីជាប់នឹងខ្លួននោះទេមានតែទូរសព្ទមួយគ្រឿងតែត្រូវលិចទឹកបាត់ហើយ ដោយករណីនេៈផ្នែកជំនាញកំពុងកសាងសំណុំរឿងបញ្ជូនទៅការិយាល័យជំនាញចាត់ការតាមនិតិវិធី ៕

អត្ថបទ ៖ សោ និយមរ័ត្ន