សន្តិសុខសង្គម

សមត្ថកិច្ចព្រំដែនស្រុកម៉ាឡៃ ឃាត់ជនបរទេសលួចឆ្លងដែនពីថៃចូលកម្ពុជា ដោយខុសច្បាប់ ៩ នាក់

បានផុស

៥ ខែ មុន

នៅ

ថ្ងៃសុក្រ ២១ វិច្ឆិកា ២០២៥

ដោយ

ជនបរទេសជាជនជាតិចិន និងភូមា ចំនួន ៩ នាក់ ដែលលួចឆ្លងដែនដោយខុសច្បាប់ពីប្រទេសថៃចូលមកកម្ពុជាតាមព្រំដែនកម្ពុជា-ថៃ នៃស្រុកម៉ាឡៃ ខេត្តបន្ទាយមានជ័យ ត្រូវបានសមត្ថកិច្ចចម្រុះតាមព្រំដែនទប់ស្កាត់ កាលពីថ្ងៃទី ២០ ខែវិច្ឆិកា ឆ្នាំ ២០២៥។

លោកវរសេនីយ៍ឯក សួង សៅ មេបញ្ជាការ វរសេនាតូចនគរបាលការពារព្រំដែនគោកលេខ ៨១៥ បានឲ្យដឹងថា អនុវត្តតាមបទបញ្ជាលោកឧត្ដមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ កាលពីវេលាម៉ោង ២១ និង ១០ នាទី ថ្ងៃទី ២០ ខែវិច្ឆិកា ឆ្នាំ ២០២៥ កម្លាំងប៉ុស្តិ៍ស្ពានម៉ាឡៃ ចំនួន ៥ នាក់ ដឹកនាំដោយលោកវរសេនីយ៍ត្រី លី ស៊ាងយ៉ាង មេបញ្ជាការរងទទួលដឹកនាំការងារប៉ុស្តិ៍ស្ពានម៉ាឡៃ ដោយមានការចូលរួមសហការពីកម្លាំងកងពលតូចថ្មើរជើងលេខ ៥១ និងកម្លាំងផ្នែកសឹករងម៉ាឡៃ បានទប់ស្កាត់ជនជាតិបរទេសលួចឆ្លងដែនពីប្រទេសថៃចូលមកប្រទេសកម្ពុជាដោយខុសច្បាប់ ដើម្បីរកការងារធ្វើចំនួន ៩ នាក់ (ស្រី ២ នាក់) ក្នុងនោះ មានជនជាតិចិន ៥ នាក់ (ប្រុស) និងជនជាតិភូមា ៤ នាក់ (ស្រី ២ នាក់) នៅត្រង់ចំណុចភូមិថ្មី ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ។ ករណីខាងលើ កម្លាំងស្ថាប័នពាក់ព័ន្ធ បានប្រគល់បន្តនីតិវិធីទៅអធិការដ្ឋាននគរបាលស្រុកម៉ាឡៃ។