វិស្វករ ជាធនធានបញ្ញវន្តវិស្វកម្មជាតិ រួមចំណែកអភិវឌ្ឍន៍ប្រទេសជាតិ

លោក សុខុម រិទ្ធីវុធ អគ្គលេខាធិការគណៈវិស្វករកម្ពុជាមានប្រសាសន៍ថា វិស្វករជាធនធានបញ្ញវន្តវិស្វកម្មជាតិ និងជាកំលាំងចលករមិនអាចខ្វះបាន ក្នុងការរួមចំណែកអភិវឌ្ឍន៍ប្រទេសជាតិ ប្រកបដោយចីរភាព ដែលតម្រូវឱ្យវិស្វករមានការសិក្សាស្វែងយល់ និងតាមឱ្យទាន់នូវការវិវត្តបច្ចេកវិទ្យានាពេលបច្ចុប្បន្ន និងអនាគត។

លោក សុខុម រិទ្ធីវុធ អគ្គលេខាធិការគណៈវិស្វករកម្ពុជា មានប្រសាសន៍បែបនេះ នៅក្នុងសិក្ខាសាលាផ្សព្វផ្សាយស្តីពី “សារៈប្រយោជន៍នៃការចុះបញ្ជីវិស្វករនៅគណៈវិស្វករកម្ពុជា” ដែលរៀបចំឡើងនាព្រឹកថ្ងៃទី១២ ខែវិច្ឆិកា ឆ្នាំ២០២៥ នៅខេត្តក្រចេះ។

សិក្ខាសាលាផ្សព្វផ្សាយនេះ រៀបចំឡើងក្នុងគោលបំណងដើម្បីបញ្ជ្រាបការយល់ដឹងអំពីសារៈប្រយោជន៍នៃការចុះបញ្ជីវិស្វករនៅគណៈវិស្វករកម្ពុជា និងលិខិតបទដ្ឋានគតិយុត្តនានាពាក់ព័ន្ធនឹងវិស័យ វិស្វកម្ម ដល់វិស្វករ និងនិស្សិតផ្នែកវិស្វកម្ម ដែលមានបំណងប្រកប ឬកំពុងប្រកបវិជ្ជាជីវៈវិស្វកម្ម ក្នុងព្រះរាជាណាចក្រកម្ពុជា។

បច្ចុប្បន្នគណៈវិស្វករកម្ពុជា ជាសមាជិកស្ថាប័នសហព័ន្ធវិស្វកម្ម អាស៊ាន (AFEO) ក៏ដូចជា សេវា និងគណៈកម្មាធិការសម្របសម្រួលវិស្វករអាជីពឆ្នើមអាស៊ាន (ACPECC) តាមរយៈកិច្ចព្រមព្រៀង ទទួលស្គាល់គ្នាទៅវិញទៅមកលើសេវាវិស្វកម្ម ដែលជាស្ពានតភ្ជាប់វិជ្ជាជីវៈវិស្វកម្ម វិស្វកម្មរបស់វិស្វករអាជីពជាតិទៅក្នុងតំបន់ តាមរយៈការទទួលស្គាល់គុណវុឌ្ឍទៅវិញទៅមក ដោយទទួលបាននូវគោរមងារ ជាវិស្វកអាស៊ាន និងវិស្វករអាជីពអាស៊ាន ដែលបើកឱកាស ការងារដ៏ទូលំទូលាយ៕

អត្ថបទ៖ ប្រុញ វិធិន