សង្គ្រាម៥ថ្ងៃ សម្ដេច ហ៊ុន សែន អះអាងថា គ្មានទ័ពខ្មែរណាស្លាប់ចោលក្លិនស្អុយក្នុងព្រៃឡើយ

សង្គ្រាមរយៈពេល៥ថ្ងៃកន្លងមកជាមួយថៃ សម្ដេចតេជោ ហ៊ុន សែន អះអាងថា មិនមានសាកសពទាហានខ្មែរណាម្នាក់ដែលត្រូវបានទុកចោលរហូតមានក្លិនស្អុយក្នុងព្រៃនោះឡើយ។ តែផ្ទុយទៅវិញ សម្ដេចតេជោ ថា សាកសពដែលស្អុយតាមទល់ដែន អាចជាកងទ័ពថៃ។  

សម្ដេចតេជោ ហ៊ុន សែន សង្ឃឹមថា ប្រជាជនថៃនឹងស្វែងរកកូនចៅរបស់ខ្លួន ដែលបានបាត់បង់ ព្រោះសាកសពដែលមានក្លិនស្អុយនៅតាមព្រំដែន មិនមែនជាកងទ័ពខ្មែរនោះទេ។ មិនមែនជាសាកសពកងទ័ពខ្មែរ ក៏ដោយសារខ្មែរអត់មានបាត់កងទ័ព ហើយកងទ័ពខ្មែរក៏អត់មានចូលទៅក្នុងដីថៃដែរ។ នេះជាការអះអាងរបស់សម្ដេចតេជោ ហ៊ុន សែន នៅព្រឹកថ្ងៃទី១៧ ខែវិច្ឆិកា ឆ្នាំ២០២៥នេះ ថ្លែងចេញពីពិធីបើកអនុសំវច្ឆរមហាសន្និបាតមន្ត្រីសង្ឃទូទាំងប្រទេស នៅវិទ្យាស្ថានជាតិអប់រំ រាជធានីភ្នំពេញ។

ពីវេទិកាព្រឹកនេះ ប្រធានព្រឹទ្ធសភាកម្ពុជា សម្ដេចតេជោ ហ៊ុន សែន បានថ្លែងយ៉ាងដូច្នេះថា៖ «ទ័ពខ្មែរអត់មានខ្មោចស្អុយទៅលើដីគេទេ ព្រោះយើងអត់បានចូលដីអ្នកណាទេ សង្ឃឹមថា ប្រជាជនថៃស្វែងរកកូនចៅរបស់ខ្លួន ដែលបាត់បង់ អាខ្មោចដែលវាស្អុយតាមទល់ដែនហ៎ តើជាខ្មោចរបស់អ្នកណា បើខ្មែរអត់មានបាត់ទ័ពទេ ហើយខ្មែរក៏អត់មានចូលទៅក្នុងដីគេដែរ»។

ការលើកឡើងរបស់សម្ដេចតេជោខាងលើ ជាការឆ្លើយតបទៅនឹងភាគីថៃដែលតែងលើកឡើងថា សាកសពកងទ័ពខ្មែរស្លាប់ចោលក្លិនស្អុយលើទឹកដីថៃ ដែលបន្សល់ពីសង្គ្រាមរយៈពេល៥ថ្ងៃកន្លងមក។

គួររំលឹកឱ្យដឹងថា ថៃបានបើកការវាយប្រហារមកលើកម្ពុជា នៅព្រឹកថ្ងៃទី២៤ ខែកក្កដា ឆ្នាំ២០២៥ នៅតំបន់ប្រាសាទតាមាន់ ខេត្តឧត្តរមានជ័យ ដោយបានរាលដាលទៅកាន់តំបន់ផ្សេងៗទៀត នៅតាមបណ្តោយព្រំដែនកម្ពុជា-ថៃ។ ការប្រយុទ្ធគ្នារវាងកម្ពុជា និងថៃបានកើតមានឡើង បន្ទាប់ពីភាគីថៃបានផ្ទុះអាវុធមុន នៅចំណុចប្រាសាទតាមាន់។

យោធាឈ្លានពានថៃ​បានវាយប្រហារមកលើកម្ពុជាជាច្រើនទីតាំង ដោយមានការប្រើប្រាស់អាវុធធន់ធ្ងរ និងយន្តហោះចម្បាំង F-16 ផងដែរ។ ក្រោយការប្រយុទ្ធគ្នារយៈពេល៥ថ្ងៃ​ សោកនាដកម្មបានកេីតឡេីង​ ដោយបានធ្វេីឱ្យវីរៈកងទ័ពរបស់កម្ពុជា​ បានពលី​អស់ជាច្រេីននាក់។

បើតាមសម្ដេចតេជោ កងទ័ពខ្មែរដែលបានពលីក្នុងសង្គ្រាម គឺត្រូវបានយកមករៀបចំពិធីបុណ្យយ៉ាងត្រឹមត្រូវ ពោលគឺមិនត្រូវបានបោះបង់ចោលក្នុងព្រៃនោះឡើយ៕

ដោយ៖ ធឿន វ៉ាន់សុង