ព័ត៌មានជាតិ

អភិបាលរងខេត្តកោះកុង ជំរុញដល់មន្ត្រីពន្ធនាគារ តាមដានពិនិត្យស្ថានភាពការរស់នៅរបស់ជនជាប់ឃុំឱ្យល្អមានសណ្ដាប់ធ្នាប់

បានផុស

៦ ខែ មុន

នៅ

ថ្ងៃព្រហស្បតិ៍ ២០ វិច្ឆិកា ២០២៥

ដោយ

លោកអភិបាលរងខេត្តកោះកុង បានណែនាំស្នើឱ្យថ្នាក់ដឹកនាំ និងមន្ត្រីពន្ធនាគារខេត្ត បន្តតាមដានត្រួតពិនិត្យពីស្ថានភាព នៃការគ្រប់គ្រង និងការរស់នៅរបស់អ្នកទោសឱ្យមានសណ្ដាប់ធ្នាប់ល្អ បញ្ចៀសកើតមានបាតុភាពខុសប្រក្រតីណាមួយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហាក់ ឡេង អភិបាលរងខេត្តកោះកុង ថ្លែងនៅថ្ងៃទី ២០ ខែវិច្ឆិកា ឆ្នាំ ២០២៥ នេះថា ថ្នាក់ដឹកនាំ និងមន្ត្រីពន្ធនាគារខេត្ត សូមបន្តខិតខំធ្វើការតម្កល់ផលប្រយោជន៍អង្គភាព និងសន្តិសុខសាធារណៈជាធំ ហើយត្រូវមានម្ចាស់ការគ្រប់គ្រងអគាររបស់ខ្លួនឱ្យបានល្អ កុំឱ្យមានបាតុភាព ឬបទល្មើសណាមួយកើតឡើង។

ថ្លែងក្នុងពិធីជួបសំណេះសំណាលជាមួយនឹងជនជាប់ឃុំនៅក្នុងពន្ធនាគារ និងថ្នាក់ដឹកនាំពន្ធនាគារខេត្តកោះកុង លោកអភិបាលរងខេត្ត បានបន្តថា ការងារគ្រប់គ្រង និងការត្រួតពិនិត្យពីស្ថានភាពរស់នៅរបស់ជនជាប់ឃុំនៅក្នុងពន្ធនាគារខេត្ត ដើម្បីធានាប្រសិទ្ធភាពការងារ និងបញ្ចៀសការកើតមានបាតុភាពខុសប្រក្រតីណាមួយ។ ទោះយ៉ាងណា លោកក៏បានកោតសរសើរអំពីកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីពន្ធនាគារខេត្ត បានអនុវត្តការងារគ្រប់គ្រងសណ្ដាប់ធ្នាប់អ្នកទោសបានល្អប្រសើរហើយ។

លោកអភិបាលរងខេត្ត លើកឡើងទៀតថា អ្នកទោសទាំងឡាយដែលកំពុងទទួលទោសត្រូវគោរពវិន័យ និងខិតខំកែប្រែខ្លួនទៅតាមច្បាប់កំណត់ ករណីមិនអនុវត្តពេញលេញទេនោះច្បាស់ជាពុំមានឈ្មោះក្នុងបញ្ជីបន្ធូរបន្ថយទោសឡើយ។ អ្វីដែលពិសេសនៅចំពោះមុខ គឺដាច់ខាតមិនត្រូវមានការសេព ឬប្រព្រឹត្តបទល្មើសគ្រឿងញៀនក្នុងពន្ធនាគារទេ។

ទន្ទឹមនោះដែរ លោក ហាក់ ឡេង រំពឹងទុកជាមុនថា នៅពេលទណ្ឌិតណាម្នាក់កែប្រែខ្លួនទៅតាមកម្រិតទោសរបស់ខ្លួន និងប្រឹងប្រែងរៀនសូត្រជំនាញវិជ្ជាជីវៈក្នុងពន្ធនាគារ គ្រាចេញពីពន្ធនាគារ នឹងក្លាយជាធនធានមនុស្សដ៏សំខាន់ដែលសង្គមជាតិត្រូវការចូលរួមអភិវឌ្ឍន៍។

ចំណែកលោកឧត្តមអគ្គានុរក្សថ្នាក់លេខ ២ ចាន់ ចំណាន ប្រធានពន្ធនាគារខេត្តកោះកុង បានបង្ហាញថា សព្វថ្ងៃពន្ធនាគាររបស់លោកបានអនុវត្តតួនាទីភារកិច្ចប្រកបដោយការទទួលខុសត្រូវខ្ពស់លើការគ្រប់គ្រងអ្នកទោសដែលកំពុងជាប់ឃុំ តបតាមការណែនាំគោលការណ៍របស់ថ្នាក់ដឹកនាំ។

លោក ចាន់ ចំណាន ក៏បានរំលេចទៀតថា ពន្ធនាគារខេត្តកោះកុង ត្រូវយកចិត្តទុកដាក់ត្រួតពិនិត្យឯកសារឱ្យបានត្រឹមត្រូវ គ្រប់គ្រងសណ្ដាប់ធ្នាប់ ការស្លៀកពាក់របស់ជនជាប់ឃុំឱ្យបានល្អ និងសម្អាតបរិស្ថានជុំវិញអគារឱ្យស្អាតជានិច្ច។ រីឯតាមច្រកតាមកងព័ន្ធ និងនៅតាមអគារ ត្រូវពង្រឹងការងារត្រួតពិនិត្យឆែកឆេរ រុករកវត្ថុហាមឃាត់ និងបទល្មើស ដែលខុសនឹងបទបញ្ជាផ្ទៃក្នុងពន្ធនាគារ និងច្បាប់របស់រដ្ឋ។

គួរជម្រាបថា បច្ចុប្បន្ន ពន្ធនាគារខេត្តកោះកុង មានអ្នកទោសសរុប ៨៨៧ នាក់/ស្រី ៦៨ នាក់។ ក្នុងនោះ ជនត្រូវចោទ ៦៥ នាក់ ជនជាប់ចោទ ៨៧ នាក់ ពិរុទ្ធជន ២៦៥ នាក់ និងទណ្ឌិតចំនួន ៤៧០ នាក់។ ជាក់ស្តែង ក្រុមអ្នកទោសទាំងនោះ ត្រូវបានទទួលវគ្គបណ្ដុះបណ្ដាលជំនាញវិជ្ជាជីវៈ គាំទ្រផ្នែកសុខភាព គ្មានការកេងប្រវ័ញ្ច ឬធ្វើទុក្ខបុកម្នេញជនជាប់ឃុំ អប់រំពីផលប៉ះពាល់ដោយសារគ្រឿងញៀន និងអប់រំផ្នែកពុទ្ធសាសនាជាដើម ដើម្បីពង្រឹងសមត្ថភាពពួកគាត់ពេលចេញពីពន្ធនាគារប្រែក្លាយជាពលរដ្ឋល្អក្នុងសង្គមជាតិ៕

អត្ថបទ ៖ សិរីវឌ្ឍនៈ