Royal Railway ៖ ប្រេងដែលធ្លាយចេញ ក្នុងឧបទ្ទវហេតុក្រឡាប់រថភ្លើង មិនមែន​នាំចូលពីថៃទេ

ក្រុមហ៊ុន រ៉ូយ៉ាល់ រេលវេ​ (Royal Railway) បានច្រានចោលព័ត៌មានមិនពិតថា ប្រេងឥន្ធនៈ​ដែល​​​​​​​​​បានធ្លាយចេញក្នុងពេលជួបឧបទ្ទវហេតុរថភ្លើងរអិលធ្លាក់ផ្លូវនៅខេត្តពោធិ៍សាត់ ជា​ប្រេង​ដឹកមកពីប្រទេសថៃ។

ការបដិសេធបែបនេះ បានធ្វើឡើង បន្ទាប់ពីអ្នកលេងបណ្តាញសង្គមបានលើកឡើងថា ប្រេង​ឥន្ធនៈ​ដែលដឹកជញ្ជូនតាមខ្សែរថភ្លើង បាននាំចូលមកពីប្រទេសថៃ។

កាលពីថ្ងៃទី ១៧ ខែវិច្ឆិកា ឆ្នាំ ២០២៥ ករណីស្រុតផ្លូវរថភ្លើង បណ្តាលឱ្យទូររថភ្លើងចំនួន៣ទូរ ក្រឡាប់ធ្លាយប្រេងចេញមកក្រៅ នៅចំណុច PK191+600 ខ្សែដែកទិសខាងជើង ស្ថិតនៅ​ភូមិ​ដើមច្រេស ឃុំបឹងខ្នារ ស្រុកបាកាន ខេត្តពោធិ៍សាត់។

ក្រុមហ៊ុន រ៉ូយ៉ាល់ រេលវេ បានបញ្ជាក់ថា ឧបទ្ទវហេតុនេះ ពុំមានបង្កគ្រោះថ្នាក់ដល់អាយុជីវិត ឬមានអ្នករងរបួសនោះទេ។ ក្រុមអ្នកជំនាញបច្ចេកទេសបានចុះទៅទីតាំងភ្លាមៗ ដើម្បីធានា​ សុវត្ថិភាពក្នុងបរិវេណតំបន់កើតហេតុ ដើម្បីធ្វើការស៊ើបអង្កេតលើមូលហេតុនៃឧបទ្ទវហេតុ និងចាប់ផ្តើមស្តារឡើងវិញនូវប្រតិបត្តិការប្រចាំថ្ងៃរបស់ក្រុមហ៊ុន។

ក្នុងនោះផងដែរ សេវាកម្មខ្សែ​រថដឹកអ្នកដំណើរ​ ខ្សែរថដឹកទំនិញ និងសេវាកម្មផ្សេងៗទៀតត្រូវបានកែសម្រួល​តាមតម្រូវ​ការ​​ជាក់ស្តែងភ្លាមៗ​កំឡុងពេលស្តារឡើងវិញ និងបានរួចរាល់ជាស្ថាពរនៅយប់ថ្ងៃតែមួយ។

ក្រុមហ៊ុន រ៉ូយ៉ាល់ រេលវេ បញ្ជាក់ថា៖ «គ្មានការនាំចូល ឬដឹកជញ្ជូនប្រេងឥន្ធនៈ ឬទំនិញ​អ្វីពី​ថៃឡើយចាប់តាំងពីមានជម្លោះ​កម្ពុជា-ថៃ​មក ក្រុមហ៊ុនរ៉ូយ៉ាល់ រ៉េលវេ មិនធ្លាប់នាំចូល ឬនាំចេញផលិតផលណាមួយពីប្រទេសថៃ ឬទៅកាន់ប្រទេសថៃឡើយ រួមទាំងប្រេង​ឥន្ធនៈ​ផងដែរ»។

បច្ចុប្បន្ន គ្មានលំហូរដឹកជញ្ជូនតាមផ្លូវដែកឆ្លងដែនរវាងប្រទេសទាំងពីរនេះឡើយ។ ប្រេងឥន្ធនៈ​ដែលពាក់ព័ន្ធនេះគឺនាំចូលដោយស្របច្បាប់ពីប្រទេសសិង្ហបុរី ប្រេងឥន្ធនៈដែល​កំពុង​ដឹក​ជញ្ជូន​នៅលើខ្សែរថដែលជួបឧបទ្ទវហេតុនេះ ជាកម្មសិទ្ធិរបស់ក្រុមហ៊ុនស្របច្បាប់ កម្ពុជាមួយដែល​មាន​អាជ្ញាប័ណ្ណត្រឹមត្រូវ។

ប្រេងឥន្ធនៈនេះត្រូវបាននាំចូលដោយផ្ទាល់ពីប្រទេសសិង្ហបុរី ដោយអនុវត្តតាមបទប្បញ្ញត្តិទាំងអស់ និងស្របតាមស្តង់ដារគុណភាព ព្រមទាំងមានឯកសារបញ្ជាក់ច្បាស់លាស់។

ការដឹកជញ្ជូនរបស់រថភ្លើងកម្ពុជាគឺនៅក្នុងប្រទេសតែប៉ុណ្ណោះ តួនាទីរបស់​ក្រុមហ៊ុន​ក្នុងការដឹកជញ្ជូន គឺដឹកជញ្ជូនពីកំពង់ផែព្រះសីហុនុ ផ្លូវដែកភាគខាងត្បូង (Southern Line) ទៅកាន់ផ្លូវដែកភាគខាងជើង(Northern Line)។

លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន មានប្រសាសន៍ថា ខ្សែរថភ្លើង​លេខ​៦៥៣៥ បានដឹកប្រេងចំនួន២៥ទូរ របស់ក្រុមហ៊ុនសូគីម៉ិច (ប្រភពនាំចូលពីប្រទេសឹង្ហបុរី តាមកំពង់ផែស្វ័យ័តក្រុងព្រះសីហនុ) ដោយចេញដំណើរពីស្ថានីយភ្នំពេញ ឆ្ពោះទៅស្ថានីយ​បឹងព្រីង ខេត្តបាត់ដំបង ដើម្បីចែកចាយនៅខេត្តភាគពាយ័ព្យប្រទេស​កម្ពុជា មិនមែនជាប្រេង​នាំចូលពីប្រទេសថៃ ដូចការប៉ាន់ស្មាន និងការអត្ថាធិប្បាយដោយគ្មានប្រភពព័ត៌មាន និងការ​ផ្ទៀងផ្ទាត់ត្រឹមត្រូវនោះឡើយ៕

អត្ថបទ៖ ឡេង ដេត