អាជ្ញាធរខណ្ឌកំបូល ដឹកនាំកម្លាំងចុះសម្អាតដី លើចិញ្ចើមសួនច្បារ និងតាមមាត់លូលើផ្លូវជាតិលេខ៤

អាជ្ញាធរខណ្ឌកំបូល ចុះយុទ្ធនាការ សម្អាតដីខ្សាច់លើសួនច្បារ និងកាកសំណល់តាមមាត់លូ ក្នុងសង្កាត់ចំនួន ២ នៃខណ្ឌកំបូល ដើម្បីបញ្ចៀសការលិចលង់។ នារសៀលថ្ងៃទី ១០ ខែកក្កដា ឆ្នាំ២០២៦នេះ លោក ទ្រី ណារ៉េត អភិបាលរងខណ្ឌកំបូល បានដឹកនាំមន្រ្តីក្រោមឪវាទ ចុះធ្វើការសម្អាតដីលើចិញ្ចើមសួនច្បារសាធារណ: និងតាមមាត់លូ នៅតាមបណ្ដោយផ្លូវជាតិលេខ៤ ស្ថិតក្នុងភូមិសាស្រ្តសង្កាត់កន្ទោក  និងសង្កាត់កំបូល ខណ្ឌកំបូល រាជធានីភ្នំពេញ។

លោក ទ្រី ណារ៉េត អភិបាលរងខណ្ឌកំបូល បានអោយដឹងថា ដោយអនុវត្តតាមការណែនាំរបស់លោក ឃឹម ស៊ុនសូដា អភិបាល អភិបាលខណ្ឌកំបូល ដើម្បីចុះយុទ្ធនាការសម្អាតដី ខ្សាច់ ដែលហូរច្រោះនៅលើចិញ្ចើមសួនច្បារសាធារណៈ ព្រមទាំងប្រមូលកាកសំណល់ដែលកកស្ទះតាមមាត់លូ ក៏ដូចជាកែលម្អសោភ័ណភាព បង្កើនអនាម័យបរិស្ថាន បញ្ចៀសការលិចលង់ ដើម្បីសុវត្ថិភាពក្នុងការធ្វើដំណើរតាមដងផ្លូវជាតិលេខ៤ ក្នុងភូមិសាស្ត្រសង្កាត់កន្ទោក និងសង្កាត់កំបូល។

ជាចុងក្រោយ អាជ្ញាធរខណ្ឌកំបូល អំពាវនាវដល់ប្រជាពលរដ្ឋ អាជីវករ ដែលរស់នៅតាមសងខាងផ្លូវជាតិលេខ៤ មេត្តាចូលរួមថែរក្សាអនាម័យ វេចខ្ចប់ទុកដាក់កាកសំណល់ឱ្យបានត្រឹមត្រូវ និងកុំបោះសម្រាមចូលក្នុងប្រព័ន្ធលូ ដែលនាំឱ្យស្ទះផ្លូវទឹកហូរ ៕ អត្ថបទ ៖ រដ្ឋា