លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញ​សួរ​សុខទុក្ខ​យោធិន​កំពុង​សម្រាក​ព្យាបាល​នៅ​មន្ទីរពេទ្យកាល់ម៉ែត្រ

ភ្នំពេញ ៖ រសៀលថ្ងៃទី១៨ ខែធ្នូ ឆ្នាំ២០២៥ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានអញ្ជើញមកសួរសុខទុក្ខ និងលើកទឹកចិត្តដល់បងប្អូនយោធិន ដែល​កំពុង​សម្រាកព្យាបាលជំងឺនៅមន្ទីរពេទ្យកាល់ម៉ែត្រ ដោយផ្ទាល់។

ក្នុងឱកាសនោះ លោកជំទាវបណ្ឌិត បានពាំនាំនូវពាក្យផ្តាំផ្ញើសួរសុខទុក្ខ ប្រកបដោយក្តីបារម្ភ និងការយកចិត្តទុកដាក់ខ្ពង់ខ្ពស់បំផុត ពីសំណាក់ សម្ដេចអគ្គមហាសេនាបតីតេជោ ហ៊ុន សែន, សម្ដេចកិត្តិព្រឹទ្ធបណ្ឌិត និង សម្ដេចមហាបវរធិបតី ហ៊ុន ម៉ាណែត ជូនចំពោះយោធិនទាំងអស់ដែលកំពុងទទួលការព្យាបាល។

ជាមួយគ្នា​នេះ​ផង​ដែរ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ក៏បាននាំយកអំណោយជាគ្រឿងបរិភោគ សម្ភារៈប្រើប្រាស់ និងថវិកាមួយចំនួន មកប្រគល់ជូនបងប្អូនយោធិនគ្រប់ៗរូប ដើម្បីជាការលើកទឹកចិត្ត និងបង្ហាញពីការយកចិត្តទុកដាក់របស់ថ្នាក់ដឹកនាំចំពោះវីរកងទ័ព ដែលបានលះបង់កម្លាំងកាយចិត្ត ដើម្បីបម្រើជាតិមាតុភូមិ។

លោកជំទាវបណ្ឌិត បានសម្តែងនូវការលើកទឹកចិត្ត និងជូនពរដល់យោធិនដែលរងរបួសទាំងអស់ សូមឱ្យមានសុខភាពល្អមាំទាំ ឆាប់ជាសះស្បើយ និងខិតខំថែរក្សាសុខភាពឱ្យបានរឹងមាំ ខណៈដែលថ្នាក់ដឹកនាំនៅតែបន្តគិតគូរ និងជំរុញឱ្យក្រុមគ្រូពេទ្យយកចិត្តទុកដាក់ព្យាបាល និងមើលថែយ៉ាងដិតដល់ រហូតដល់បងប្អូនយោធិនជាសះស្បើយពេញលេញ ដោយប្ដេជ្ញាមិនបោះបង់បងប្អូនវីរកងទ័ពឡើយ៕