ព័ត៌មានជាតិ

មន្ត្រីជាន់ខ្ពស់លើកទឹកចិត្តឲ្យរៀបចំគម្រោងស្រាវជ្រាវលើការកែច្នៃកសិផល និងវិស័យទេសចរណ៍ជំរុញវិនិយោគនៅភូមិភាគឦសាន

បានផុស

៣ ខែ មុន

នៅ

ថ្ងៃអាទិត្យ ១៨ មករា ២០២៦

ដោយ

មន្ត្រីជាន់ខ្ពស់រាជរដ្ឋាភិបាល បានលើកទឹកចិត្តឱ្យក្រុមការងាររៀបចំគម្រោងសិក្សាស្រាវជ្រាវ លើការកែច្នៃកសិផល និង វិស័យទេសចរណ៍ឱ្យបានគ្រប់ជ្រុងជ្រោយដើម្បីជំរុញការវិនិយោគក្នុងភូមិភាគឦសាន។

នៅក្នុងឱកាសដឹកនាំកិច្ចប្រជុំលេខាធិការដ្ឋានក្រុមការងារជំរុញការវិនិយោគក្នុងភូមិភាគឦសាន “ក.វ.ឦសាន” លោកបណ្ឌិតសភាចារ្យ ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្រ្តី និងជាប្រធានក្រុមការងារជំរុញការវិនិយោគក្នុងភូមិភាគឦសានបានឱ្យដឹងថា ការរៀបចំគម្រោងសិក្សាស្រាវជ្រាវ អំពីការជំរុញការវិនិយោគនៅភូមិភាគឦសាន ឱ្យបានគ្រប់ជ្រុងជ្រោយគឺដើម្បីកំណត់បញ្ហាប្រឈមចំពោះមុខ និងរៀបចំជាយុទ្ធសាស្ត្រសម្រាប់ដោះស្រាយបញ្ហាប្រឈមរយៈពេលមធ្យម ដើម្បីជាមូលដ្ឋានសម្រាប់ការស្នើសុំវិធានការដោះស្រាយ ពីរាជរដ្ឋាភិបាល។

លោកបណ្ឌិតសភាចារ្យ ហ៊ាន សាហ៊ីប បានលើកឡើងថា សម្រាប់ឆ្នាំ២០២៦, លេខាធិការដ្ឋាន ក.វ.ឦសាន បានត្រៀមរៀបចំយុទ្ធនាការផ្សព្វផ្សាយកម្មវិធីពិសេស និងពង្រីកទំនាក់ទំនង ជាមួយវិនិយោគិន និងភាគីពាក់ព័ន្ធ ដើម្បីជំរុញការវិនិយោគ និងដោះស្រាយបញ្ហាប្រឈមជូនវិនិយោគិន ដោយផ្សារភ្ជាប់ជាមួយនឹងការសម្របសម្រួលការអនុវត្តគម្រោងវិនិយោគជាប្រចាំ ដើម្បីលើកកម្ពស់ប្រសិទ្ធភាព នៃគោលការណ៍លើកទឹកចិត្ត ការសម្រួលនីតិវិធី និងការទទួលបានហិរញ្ញប្បទានសម្រាប់ការវិនិយោគ បានឆាប់រហ័ស តាមអភិក្រមការងារ “ច្រកចេញ-ចូលតែមួយ” ដូចមានចែងក្នុងវិធានផ្ទៃក្នុង ស្តីពី «នីតិវិធីការងារ និង ការពិនិត្យលើការស្នើរបស់វិស័យឯកជន»។

លោកបណ្ឌិតសភាចារ្យ ហ៊ាន សាហ៊ីប បានណែនាំឱ្យក្រុមការងារត្រៀមរៀបចំកិច្ចប្រជុំអនុម័តគម្រោងវិនិយោគ, ពិភាក្សាលើផែនការសកម្មភាពប្រចាំឆ្នាំ ២០២៦, អភិក្រមការងារច្រកចេញ-ចូលតែមួយ, ព្រមទាំងការរៀបចំគម្រោងសិក្សាស្រាវជ្រាវ ដើម្បីជំរុញការវិនិយោគក្នុងភូមិភាគឦសាន។

ជាមួយនេះដែរពង្រឹងការគ្រប់គ្រងសម្បទានដីសេដ្ឋកិច្ចក្នុងភូមិភាគឦសាន, ការរៀបចំប្រព័ន្ធគ្រប់គ្រងទិន្នន័យ និង ព័ត៌មាន និង ការពង្រឹងសមត្ថភាពរបស់មន្រ្តីគម្រោងប្រចាំការ នៅតាមការការិយាល័យរបស់ ក.វ.ឦសាន ក៏ត្រូវបានគ្រោងអនុវត្តផងដែរ សំដៅគាំទ្រភារកិច្ចជំរុញការវិនិយោគរបស់ ក.វ.ឦសាន ដែលត្រូវបានដាក់ចេញ តាមរយៈ «កម្មវិធីពិសេសជំរុញការវិនិយោគក្នុងខេត្តទាំងបួន នៅភូមិភាគឦសាន នៃព្រះរាជាណាចក្រកម្ពុជា ឆ្នាំ ២០២៥-២០២៨»៕

អត្ថបទ៖ សំអឿន