ព័ត៌មានជាតិ

រដ្ឋបាលក្រុងប៉ោយប៉ែត កំពុងស្ថាបនាផ្លូវថ្មើរជើងសម្រុកបញ្ចប់នៅចុងខែមករានេះ

បានផុស

៦ ខែ មុន

នៅ

ថ្ងៃសៅរ៍ ២៤ មករា ២០២៦

ដោយ

រដ្ឋបាលក្រុងប៉ោយប៉ែត កំពុងដំណើរការរៀបចំផ្លូវថ្មើរជើងជាផ្នែកមួយដើម្បីលើកកម្ពស់សោភណភាពក្រុងជាប់ព្រំដែនឲ្យកាន់តែស្រស់ស្អាត ស្របពេលដែលក្រុងប៉ោយប៉ែតបានក្លាយជាទីប្រជុំជនប្រមូលផ្តុំដោយអគារពាណិជ្ជកម្ម លំហូរពលរដ្ឋរស់នៅ និងទេសចរចេញចូល។

លោក គាត ហ៊ុល អភិបាលនៃគណៈអភិបាលក្រុងប៉ោយប៉ែតបានឲ្យកម្ពុជាថ្មីដឹងថា ផ្លូវថ្មើរជើងដែលអាជ្ញាធរក្រុងកំពុងសាងសង់មានប្រវែង ១ ៦០០ ម៉ែត្រ ស្ថិតនៅតាមបណ្តោយផ្លូវជាតិលេខ ៥ ចាប់ពីស្ថានីយរថភ្លើងរហូតដល់ច្រកទ្វារព្រំដែនអន្តរជាតិប៉ោយប៉ែត។

លោកថា ដំណើរការសាងសង់កំពុងសម្រុក ហើយគ្រោងនឹងបញ្ចប់នៅចុងខែមករានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្លូវថ្មើរជើងដែលអាជ្ញាធរក្រុងប៉ោយប៉ែតកំពុងស្ថាបនាមានទទឹង ៣ ម៉ែត្រ ខណៈការសាងសង់ត្រូវរៀបចំឱ្យមានផ្ទៃរាបស្មើ ខុសពីពេលមុនដែលពលរដ្ឋសាងសង់ខ្ពស់ទាបនៅតាមមុខលំនៅដ្ឋានរៀងៗខ្លួន។ នៅពេលស្ថាបនារួច អាជ្ញាធរនឹងមិនអនុញ្ញាតឱ្យមានការលក់ដូរ ឬដាក់សម្ភារនៅលើផ្លូវថ្មើរជើងនេះឡើយ ដោយទុកសម្រាប់តែអ្នកដើរថ្មើរជើង ឬការជិះកង់ប៉ុណ្ណោះ។ នេះបើតាមលោក គាត ហ៊ុល។

លោក គាត ហ៊ុល បានបញ្ជាក់ថា ការរៀបចំផ្លូវថ្មើរជើងជាផ្នែកមួយដើម្បីលើកកម្ពស់មុខមាត់ទីក្រុងប៉ោយប៉ែតឲ្យកាន់តែមានសោភណភាព និងរបៀបរៀបរយល្អ ជាពិសេសក៏ជួយសម្រួលដល់ពលរដ្ឋ និងភ្ញៀវទេសចរទាំងជាតិនិងអន្តរជាតិងាយស្រួលក្នុងការធ្វើដំណើរ៕