ស្ពានឆ្លងទន្លេ​មេគង្គក្រចេះ​ ជិត​បើក​ឲ្យ​ពលរដ្ឋ​ឆ្លង​ជា​ផ្លូវការ ខណៈបង្គោលភ្លើង​បំភ្លឺ​សង​ខាង​ស្ពាន​ជាង ១០០ ដើម​តម្លើងរួចរាល់

ស្ពានមិត្តភាពកម្ពុជា-ចិន មេគង្គខេត្តក្រចេះ បច្ចុប្បន្នត្រូវបានក្រុមការងារបច្ចេកទេសសាងសង់តម្លើងបង្គោលអំពូលភ្លើងនៅសងខាងលើបង្កាន់ដៃស្ពានរួចរាល់ជាស្ថាពរ ខណៈដែលកំណាត់ផ្លូវ ៦០B តភ្ជាប់ពីរង្វង់មូលខ្លាស្ទុះ​ទៅកាន់គល់ស្ពានឆ្លងកាត់ទន្លេមេគង្គក្រចេះនៅត្រើយខាងកើត និងពីគល់ស្ពានត្រើយខាងលិចចម្ងាយប្រមាណជា ៥ គីឡូម៉ែត្រ បាននឹងកំពុងចាក់ក្រាលថ្មម៉ិចដើម្បីត្រៀមអ៊ុតកៅស៊ូដូចគ្នាផងដែរ។

អំពូលភ្លើងទាំងអស់​ប្រមាណ ១១៦ ដើម ជាប្រភេទអំពូល LED ប្រើប្រាស់អគ្គិសនី ដាក់ពង្រាយលើបង្កាន់ដៃស្ពានទាំងសងខាងចន្លោះពីមួយទៅមួយជាង ២០ ម៉ែត្រ។ រីឯបាតស្ពាននៅពុំទាន់រួចរាល់ទាំងស្រុងនោះទេ ដោយរង់​ចាំការចាក់អ៊ុតកៅស៊ូពីលើបន្ថែមទៀត។

ជាមួយគ្នានោះ កំណាត់ផ្លូវ ៦០B តភ្ជាប់ពីរង្វង់មូលខ្លាស្ទុះឆ្ពោះទៅគល់ស្ពានមេគង្គឆ្លងកាត់ទន្លេដែលជាផ្លូវបង្កើតថ្មី និងជាផ្លូវក្រវ៉ាង់​ក្រុងដ៏សំខាន់របស់ខេត្ត ត្រូវបានក្រុមវិស្វកម្មកំពុងមមាញឹកក្នុងការចាប់ផ្ដើមចាក់ក្រាលថ្មម៉ិចដើម្បីត្រៀមអ៊ុតកៅស៊ូឈានទៅបញ្ចប់ជាស្ថាពរនៅពេលដ៏ខ្លីខាងមុខ៕

អត្ថបទ៖ ប្រុញ វិធិន