ផ្លូវបេតុង ស្ពាន​ និងផ្លូវក្រាល​គ្រួសធម្មជាតិសមិទ្ធផល​សម្រេច​បាន​បន្តបន្ទាប់​ ផែនការអភិវឌ្ឍ​ឃុំដាក្នុង​ខេត្តក្រចេះ

សមិទ្ធិផលហេដ្ឋារចនាសម្ពន្ធ័នានាជាច្រើនដែលរដ្ឋបាលឃុំដារ អនុវត្តសម្រេចបានក្នុងឆ្នាំ២០២៥ រួមមានផ្លូវបេតុអាមេ ផ្លូវក្រាល​គ្រួសក្រហមធម្មជាតិ ប្រពន្ធ័លូ និងប្រពន្ធ័ធារាសាស្ត្រជាច្រើនបន្ថែមទៀត។

លោក ឈាង វត មេឃុំដារ ក្នុង​ស្រុកចិត្របុរី ខេត្ត​ក្រចេះ​បាន​ឲ្យ​ដឹងថា ដោយប្រើប្រាស់មូលនិធិស្រុកចិត្របុរី (គម្រោងឆ្នាំ២០២៤~២០២៥) រដ្ឋបាលឃុំដារសម្រេចបានសមិទ្ធិផលស្ពានបេតុង ១ កន្លែង ជាប្រភេទស្ពានបេតុងក្រោម ធ្នឹម​និងបង្កាន់ដៃដែក និងកម្រាលបាតឈើមានប្រវែង ២៥ម៉ែត្រ ទទឹង ៤,៥០ម៉ែត្រ នៅភូមិខ្នងពស់ ឃុំដារ ស្រុកចិត្របុរី។

សម្រាប់គម្រោងឆ្នាំ២០២៥ ដោយ​ប្រើប្រាស់មូលនិធិឃុំ រដ្ឋបាលឃុំដារ អនុវត្តសម្រេចបានផ្លូវបេតុងអាមេប្រវែងសរុប ១,២៥០ ម៉ែត្រ ទទឹង ៦ ម៉ែត្រ និងកម្រាស់ ១,៥មីលីម៉ែត្រ។ ក្នុងនោះ ភូមិខ្សារប្រវែង ៩០០ ម៉ែត្រ, ភូមិអញ្ចាញ និងស្ទឹងស្វាយប្រវែង ៣៥០ ម៉ែត្រ។

រដ្ឋបាលឃុំដារ សម្រេចការស្ថាបនាជួសជុលផ្លូវគ្រួសធម្មជាតិបានប្រវែងសរុប ១២,៨៧០ម៉ែត្រ ទទឹង ៥ម៉ែត្រ លូប្រអប់ ១ កន្លែង លូមុខ៦០ ចំនួន ៤ កន្លែង។ ក្នុងនោះ ផ្លូវគ្រួសធម្មជាតិក្នុង​ភូមិ ខ្សារ ប្រវែង ៥,៦០០ម៉ែត្រ ភូមិ អូរគគី ប្រវែង ៤៤៥ម៉ែត្រ ភូមិ សេរីភាព ប្រវែង ៣,១៤៦ម៉ែត្រ ភូមិ ស្ទឹងស្វាយ ប្រវែង ២០៣៨ម៉ែត្រ និង ភូមិ តាងួន ប្រវែង ១,៦៤១ម៉ែត្រ។

អត្ថបទ៖ ប្រុញ វិធិន