ឆ្នាំ២០២៥ ក្រសួងវប្បធម៌ អនុវត្តការងារសម្រេចបានជាង៩០% ទោះបីប្រឈមនឹងបញ្ហាជាច្រើនក្តី

រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា មានប្រសាសន៍ថា ការអនុវត្តសកម្មភាពការងារឆ្នាំ២០២៥ របស់ក្រសួងវប្បធម៌ និងវិចិត្រសិល្បៈ សម្រេចបានរហូតជាង៩០% បើទោះបីជាប្រឈមនឹងបញ្ហាជាច្រើនក្តី។

លោកស្រី បានថ្លែងបែបនេះ ក្នុងពិធីបិទសន្និបាតបូកសរុបការងារវប្បធម៌ និងវិចិត្រសិល្បៈឆ្នាំ២០២៥ និងលើកទិសដៅការងារសម្រាប់ឆ្នាំ២០២៦ នាព្រឹកថ្ងៃទី៥ ខែកុម្ភៈ ឆ្នាំ២០២៦ នៅសាលសន្និសីទចតុម្មុខ។ លោកស្រីបានបន្ថែមថា លទ្ធផលនេះកើតចេញពីកិច្ចខិតខំប្រឹងប្រែងរបស់ថ្នាក់ដឹកនាំ មន្រ្តីរាជការ និងជួយឧបត្ថម្ភគំាទ្រពីសំណាក់ក្រសួងស្ថាប័នពាក់ព័ន្ធ ព្រមទាំងអាជ្ញាធរដែនដីគ្រប់លំដាប់ថ្នាក់។

លោកស្រី បញ្ជាក់ថា «កិច្ចការអភិរក្ស និងអភិវឌ្ឍសិល្បៈវប្បធម៌ជាតិ គឺជាកិច្ចការគ្មានទីបញ្ចប់ និងទាមទារឱ្យមានកិច្ចខិតខំប្រឹងប្រែងជាប់មិនដាច់ ព្រមទាំងកសាងឱ្យបាននូវយុវជនបន្តវេនប្រកបដោយជំនាញវិជ្ជាជីវៈ និងមនសិការខ្ពស់។ កិច្ចសហការប្រមូលផ្តុំកម្លាំងរួមរវាងអង្គភាពជំនាញរបស់ក្រសួងវប្បធម៌ និងវិចិត្រសិល្បៈ ជាមួយក្រសួងស្ថាប័នពាក់ព័ន្ធ វិស័យឯកជន និងប្រជាជនគ្រប់មជ្ឈដ្ឋាន គឺជាភាពចាំបាច់បំផុតដែលនាំឱ្យយើងសម្រេចបានទិសដៅការងារដែលបានគ្រោងទុក»។

ក្នុងឱកាសនោះ លោកស្រីក៏បានផ្តល់កិត្តិយសបំពាក់គ្រឿងឥស្សរិយយស ជូនដល់ថ្នាក់ដឹកនាំ និងមន្រ្តីរាជការរបស់ក្រសួងផងដែរ៕