ព័ត៌មានជាតិ

អត្រាបោះបង់ចោលការសិក្សានៅតែស្ថិតក្នុងការព្រួយបារម្ភ

បានផុស

៤ ខែ មុន

នៅ

ថ្ងៃព្រហស្បតិ៍ ១២ កុម្ភៈ ២០២៦

ដោយ

រដ្ឋលេខាធិការក្រសួងអប់រំលោក ណាត ប៊ុនរឿន បានលើកឡើងពីក្ដីបារម្ភពីការបោះបង់ចោលការសិក្សារបស់សិស្សនៅកម្ពុជាដោយថានៅមានកម្រិតខ្ពស់ជាងនិន្នាការសកល។ លោកបន្ថែមថាបញ្ហានេះគឺជាកង្វល់របស់ក្រសួងអប់រំដែលត្រូវមានគោលនយោបាយ ឬវិធានការបន្ថែមដើម្បីទប់ស្កាត់កុំឱ្យសិស្សបោះបង់ការសិក្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីបើកសន្និបាតអប់រំ ព្រឹកថ្ងៃទី១១ ខែកុម្ភៈ ឆ្នាំ២០២៦ លោក ណាត ប៊ុនរឿន បានឱ្យដឹងថានិន្នាការសាកលបានកំណត់ថាការបោះបង់ការសិក្សាដែលលើសពី៥%នៃអត្រារួមគឺជាហានិភ័យ ខណៈការបោះបង់ការសិក្សានៅកម្ពុជាមានកម្រិតដល់១៤% សម្រាប់សិស្សអនុវិទ្យាល័យ និង ១១,១២% នៃសិស្សថ្នាក់វិទ្យាល័យ។

លោក ណាត ប៊ុនរឿន៖ «បើគាត់ដល់ថ្នាក់ទី៩ហើយគឺកាត់បន្ថយហើយ គឺចង់ឡើងទៅវិទ្យាល័យ។ បើបានរុញធ្វើមិចដល់ទី១២ហើយជាសន្ទុះគាត់ចង់ទៅឧត្ដមសិក្សាហើយ ឬរកអីផ្សេង។ អ៊ីចឹងជាយុទ្ធសាស្ត្រគន្លឹះធ្វើមិចជួយទប់ស្កាត់គាត់កុំឱ្យគាត់នៅត្រួតទី៩ រុញគាត់ឱ្យដល់ទី១២ គាត់នឹងមានភ័ព្វសំណាងនឹងទៅសិក្សាខ្ពស់ថែមទៀត»។

លោកជំរុញដល់សន្និបាតធ្វើយ៉ាងណាស្វែងរកវិធីសាស្ត្រដើម្បីជួយកាត់បន្ថយអត្រាបោះបង់ចោលការសិក្សារបស់សិស្សឱ្យបានដើម្បីសម្រេចគោលដៅឆ្នាំ២០៣០ជាប្រទេសមានប្រាក់ចំណូលមធ្យមកម្រិតខ្ពស់។

របាយការណ៍អប់រំឆ្នាំ២០២៥ឱ្យដឹងថាទោះបីជាការបោះបង់ការសិក្សានៅជាក្ដីព្រួយបារម្ភតែបានបង្ហាញសញ្ញាវិជ្ជមានផងដែរដោយថាចំនួនសិស្សដែលបានបញ្ចប់ការសិក្សាថ្នាក់ទី១២ក្នុងរយៈពេល១០ឆ្នាំចុងក្រោយមានការកើនឡើងពី២០,៩% នៅឆ្នាំ២០១៥ មកដល់៤១,៧%នៅឆ្នាំ២០២៥៕